O artigo 55 da Lei 1/2021, do 8 de xaneiro, de ordenación do territorio de Galicia (DOG núm. 8, do 14 de xaneiro), regula o procedemento de aprobación dos instrumentos de ordenación do territorio que deban someterse a avaliación ambiental estratéxica simplificada.
Para os efectos previstos no artigo 55.5 da Lei 1/2021, do 8 de xaneiro, de ordenación do territorio de Galicia, sométense a información pública, durante o período dun (1) mes contado a partir do día seguinte ao da publicación deste anuncio no Diario Oficial de Galicia, os documentos titulados:
– Proxecto de interese autonómico do Complexo Medioambiental de Cerceda (A Coruña) elaborado pola sociedade ICEACSA Consultores, datado en decembro de 2021 e asinado polo enxeñeiro de camiños, canais e portos, Roberto Núñez de Arenas Basteiro (colexiado número 16.760).
– Acordo de aprobación inicial do proxecto de interese autonómico do Complexo Medioambiental de Cerceda (CMC).
Para que calquera interesado poida consultalos e, de ser o caso, formular no citado prazo as alegacións, suxestións ou observacións que considere oportunas, o documento estará á disposición dos administrados, en horario de atención ao público, nas seguintes dependencias:
– Dirección Xeral de Calidade Ambiental, Sostibilidade e Cambio Climático, Servizo de Prevención e Control Integrados da Contaminación (rúa de San Lázaro, s/n, 15781 Santiago de Compostela).
Ademais, poderán acceder a esta información na páxina web da Consellería de Medio Ambiente, Territorio e Vivenda (http://cmatv.xunta.gal/→medioambiente e sostibilidade→prevención e control de actividades→autorización ambiental integrada→proxectos en información pública).
Santiago de Compostela, 7 de abril de 2022
María Sagrario Pérez Castellanos
Directora xeral de Calidade Ambiental,
Sostibilidade e Cambio Climático
ANEXO
Memoria resumo
Clave do expediente: 2021-IPPC-M-29.
Peticionaria: Sociedade Galega do Medio Ambiente (Sogama).
CIF: A15379803.
Enderezo social: lugar de Morzós, 10, baixo, As Encrobas, Cerceda, A Coruña.
Ámbito do proxecto: lugar de Morzós, 10, baixo, As Encrobas, Cerceda, A Coruña.
Actividade: tratamento e eliminación de residuos urbanos.
Descrición: o proxecto de interese autonómico (en diante, PIA) elabórase para a futura ampliación do complexo ambiental existente de Cerceda, que é unha dotación urbanística destinada ao tratamento e eliminación de residuos urbanos (incluído dentro do establecido nos números 1.a) e 2.a) do artigo 40 da Lei 1/2021, do 8 de xaneiro, de ordenación do territorio de Galicia) e dos terreos adxacentes vinculados á xestión e tratamento de residuos.
Os proxectos de interese autonómico desenvólvense mediante a Lei 1/2021, do 8 de xaneiro, de ordenación do territorio de Galicia. Dentro dos obxectivos fundamentais desta lei está o desenvolvemento de proxectos que transcendan o ámbito municipal pola súa incidencia territorial, económica, social ou cultural, a súa magnitude ou as súas singulares características que as fagan portadoras dun interese supramunicipal cualificado.
Neste caso, debido á imposibilidade de desenvolver a futura ampliación ao abeiro do plan urbanístico vixente por falta de previsión e incompatibilidade coas súas determinacións, exponse a tramitación dun proxecto de interese autonómico. O presente proxecto de interese autonómico ten como obxecto, por tanto, a definición das ordenanzas para a ampliación das instalacións do Complexo Ambiental de Cerceda e de futuras edificacións de servizos auxiliares e complementarios do uso principal do complexo ambiental.
