Examinado o expediente de extinción da Fundación Quinesia, adscrita ao protectorado da Consellería de Política Social, unha vez vista a proposta do subdirector xeral de Coordinación Administrativa, dítase esta orde baseada nos feitos e fundamentos de dereito que se expoñen a seguir:

Feitos:

Primeiro. O 20 de novembro de 2020 presentouse ante este protectorado solicitude de ratificación da extinción da Fundación Quinesia, adoptada por acordo do seu padroado.

Segundo. A Fundación Quinesia foi constituída en escritura pública outorgada o 8 de febreiro de 1996 en Vigo ante o notario Álvaro Moure Goyanes co número 185 do seu protocolo. Foi clasificada como benéfico-asistencial pola Orde do conselleiro da Presidencia e Administración Pública do 23 de abril de 1996 (Diario Oficial de Galicia número 83, do 27 de abril) e declarada de interese galego pola Orde do conselleiro de Sanidade e Servizos Sociais do 15 de xuño de 1996 (Diario Oficial de Galicia número 196, do 7 de outubro). Está adscrita ao protectorado da Consellería de Política Social pola Orde do vicepresidente e conselleiro de Presidencia, Administracións Públicas e Xustiza do 2 de febreiro de 2016 (Diario Oficial de Galicia número 34, do 19 de febreiro), figurando inscrita no Rexistro de Fundacións de Interese Galego co número 1996/6.

Terceiro. En virtude do disposto no artigo 6 dos seus estatutos, a fundación ten por obxecto:

a) A formación dos profesionais do ámbito das necesidades especiais.

b) A promoción de estudios e investigacións sobre recursos, modelos, normativa legal etc para a integración das persoas con necesidades especiais.

c) Promover accións para a Integración laboral de persoas con necesidades especiais e colectivos desfavorecidos, en xeral.

d) Asesorar a persoas, entidades e institucións sobre temas referidos ás necesidades especiais.

e) Constituír un centro de documentación e biblioteca.

f) Promover a formación de traballadores con especial incidencia dos colectivos desfavorecidos: discapacitados, mulleres, maiores de 45 anos, parados de longa duración e todos aqueles que teñan dificultades para a inserción laboral e social.

Cuarto. O órgano de goberno da fundación na súa reunión do 14 de xuño de 2020 adoptou acordo de extinción da fundación motivado na imposibilidade de realizar o fin fundacional.

No expediente tramitado consta a documentación prevista nos artigos 44 e 45 da Lei 12/2006, de fundacións de interese galego, e no artigo 48 do Decreto 14/2009, do 21 de xaneiro, polo que se aproba o regulamento das fundacións de interese galego.

Fundamentos de dereito:

Primeiro. O artigo 44 da Lei 12/2006, do 1 de decembro, establece entre as causas de extinción das fundacións a imposibilidade de realizar o fin fundacional, sendo necesario para tal efecto o acordo favorable do padroado, ratificado polo protectorado. O mesmo artigo establece que o acordo de extinción se inscribirá no Rexistro de Fundacións de Interese Galego.

Segundo. De acordo co disposto no artigo 7.2 do Decreto 15/2009, do 21 de xaneiro, polo que se aproba o regulamento do Rexistro de Fundacións de Interese Galego, en relación co Decreto 216/2020, do 3 de decembro, polo que se establece a estrutura orgánica da Consellería de Política Social, corresponde a esta consellería resolver esta solicitude.

Terceiro. Á vista do disposto na Lei 12/2006, do 1 de decembro, e nos decretos 14/2009, do 21 de xaneiro, e 15/2009, do 21 de xaneiro, resultan cumpridos os requisitos establecidos pola normativa vixente, polo que:

RESOLVO:

Primeiro. Ratificar o acordo de extinción adoptado polo padroado da Fundación Quinesia.

Segundo. Ordenar a inscrición do acordo de extinción da Fundación Quinesia no Rexistro de Fundacións de Interese Galego, sección da Consellería de Política Social.

Contra esta orde, que pon fin á vía administrativa, pode interpoñerse un recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia no prazo de dous meses, de conformidade co disposto na Lei 29/1998, do 13 de xullo, reguladora da xurisdición contencioso-administrativa, sen prexuízo de que, con carácter potestativo, poida interpoñerse recurso de reposición ante a conselleira de Política Social no prazo dun mes, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas.

Santiago de Compostela, 12 de novembro de 2021

A conselleira de Política Social
P.D. (Orde do 3.3.2016; DOG núm. 54, do 18 de marzo)
María Francisca Gómez Santos
Secretaria xeral técnica da Consellería de Política Social