De acordo co disposto no artigo 67 do Decreto 206/2005, do 22 de xullo (DOG núm. 145, do 29 de xullo), de provisión de prazas de persoal estatutario do Servizo Galego de Saúde, en virtude das competencias atribuídas polo Decreto 137/2019, do 10 de outubro (DOG núm. 208, do 31 de outubro), polo que se establece a estrutura orgánica do Servizo Galego de Saúde, e no Decreto 134/2019, do 10 de outubro (DOG núm. 204, do 25 de outubro) polo que se regulan as áreas sanitarias e os distritos sanitarios do Sistema público de Galicia, así como na Orde do 22 de abril de 2020 (DOG núm. 82, do 29 de abril), sobre delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, modificada pola Orde do 25 de maio de 2020 (DOG num. 103, do 29 de maio), esta xerencia

DISPÓN:

Primeiro. Anunciar a convocatoria para cubrir, mediante vinculación temporal, a cobertura de dúas prazas, con características específicas, da categoría de facultativo/a especialista de área de cirurxía xeral e do aparello dixestivo (coloproctoloxía).

Segundo. As bases íntegras da convocatoria estarán expostas nos taboleiros de anuncios do Complexo Hospitalario Universitario de Lugo (Oficina de Atención ao Traballador), no do Hospital Público da Mariña, no do Hospital Público de Monforte, e na intranet da Xerencia da Área Sanitaria de Lugo, A Mariña e Monforte de Lemos, así como na páxina web do Servizo Galego de Saúde (www.sergas.es).

Terceiro. As solicitudes para participar na presente convocatoria, xunto coa documentación a que se refiren as bases, presentaranse preferentemente, dirixidas ao xerente da Área Sanitaria, nos rexistros de entrada do Complexo Hospitalario Universitario de Lugo, sito na rúa Dr. Ulises Romero, nº 1, 27003 Lugo, do Hospital Público da Mariña, sito na rúa Rafael Vior, s/n, 27780 Burela (Lugo), ou do Hospital Público de Monforte, sito na rúa Corredoira, s/n, 27400 Monforte de Lemos (Lugo), podendo presentarse tamén a través de calquera dos procedementos do artigo 16 da Lei 39/2015, do 1 de outubro, do procedemento administrativo común das administracións públicas, no prazo de dez (10) días hábiles contados a partir do día seguinte ao da publicación deste anuncio no Diario Oficial de Galicia.

Lugo, 12 de abril de 2021

Ramón Ares Rico
Xerente da Área Sanitaria de Lugo, A Mariña
e Monforte de Lemos