O Pleno da Corporación Provincial, na sesión ordinaria realizada o día 18 de decembro de 2020, aceptou por unanimidade a delegación do Concello de Vilamarín na Deputación Provincial do exercicio das competencias de xestión, liquidación e recadación en voluntaria e executiva e revisión de actos de tributos e outros ingresos de dereito público, de conformidade co disposto no artigo 7 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais, e no artigo 106.3 da Lei 7/1985, do 2 de abril, reguladora das bases do réxime local, publícase o citado acordo nos seguintes termos:
Aceptar a delegación de competencias efectuada polo Concello de Vilamarín a favor da Deputación Provincial, mediante o Acordo plenario do 27 de outubro de 2020, nas condicións recollidas no acordo de delegación:
Primeiro. Delegar na Deputación Provincial de Ourense, de acordo co disposto na normativa mencionada, as facultades que este concello ten atribuídas en materia de xestión tributaria, liquidación e recadación voluntaria e executiva, así como a revisión dos actos ditados dos seguintes tributos:
– Imposto de bens inmobles (IBI).
– Imposto sobre vehículos de tracción mecánica (IVTM).
– Imposto sobre actividades económicas (IAE).
– Imposto sobre construcións, instalacións e obras (ICIO) en executiva.
– Taxa pola recollida de residuos sólidos urbanos.
– Taxa polo abastecemento de auga (excepto os dereitos de conexión á rede xeral).
– A recadación dos gastos derivados de execucións forzosas, ao abeiro do establecido no artigo 106.3 da Lei 7/1985, reguladora das bases do réxime local.
A delegación abarcará as actuacións pendentes dos últimos catro anos e as anteriores non prescritas sobre os mesmos tributos, co alcance, contido, condicións e vixencia que se establecen no presente acordo.
Segundo. En virtude da delegación conferida, será competencia da Deputación Provincial de Ourense a xestión, liquidación e recadación, así como a revisión dos actos ditados dos tributos delegados, e comprenderá, entre outras, as seguintes funcións:
– Recepción e tramitación de declaracións, autoliquidacións, comunicacións de datos e demais documentos con transcendencia tributaria.
– Recoñecemento e denegación de exencións e bonificacións.
– Realización das liquidacións conducentes á determinación das débedas tributarias.
– Emisión de listas cobratorias e documentos de cobramento.
– Realización de actuacións de control do cumprimento da obriga de presentar declaracións tributarias e doutras obrigas formais.
– Realización de actuacións de verificación de datos, comprobación de valores e de comprobación limitada.
– Emisión de certificados tributarios.
– Liquidacións de xuros de demora.
– Resolución dos expedientes de devolución de ingresos indebidos.
– Resolución dos recursos que se interpoñan contra os actos anteriores.
– Actuacións para a asistencia e información ao contribuínte referidas ás anteriores materias.
– Aprobación e mantemento dos censos tributarios.
– Tramitación de solicitudes de aprazamento e fraccionamento.
– Ditado da providencia de constrinximento e expedición de relacións certificadas de debedores.
Co fin de dotar da necesaria efectividade a xestión tributaria do imposto sobre bens inmobles, delégase igualmente na Deputación Provincial de Ourense a facultade, conforme o previsto no artigo 77 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais, para establecer acordos ou convenios de colaboración co Centro de Xestión Catastral e Cooperación Tributaria conducentes á formación do padrón do imposto deste termo municipal e ao ditado dos actos administrativos que motiven a modificación deste conforme se determina no artigo 77 da citada lei.
Terceiro. De conformidade co disposto no artigo 106.3 da Lei 7/85, do 2 de abril, reguladora das bases do réxime local, e no artigo 8 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais, co obxecto de facilitar o exercicio das competencias delegadas na Deputación de Ourense, a entidade delegante deberá prestarlle a esta a colaboración necesaria, especialmente nos seguintes aspectos:
– Pór á disposición dos servizos tributarios da Deputación os seus rexistros e bases de datos que conteñan información de interese tributario, respectando en todo caso o que establece a Lei orgánica 3/2018, do 5 de decembro, de protección de datos de carácter persoal, e as normas que a desenvolven. Esta colaboración implica a obriga do Concello de remitir os padróns (por única vez) para os efectos de proceder á súa informatización pola Deputación, e de remitir, así mesmo, a relación de debedores dos últimos catro (4) anos, para os efectos de poder iniciar a executiva. A Tesouraría/Secretaría municipal expedirá para tal efecto certificación das débedas pendentes, para a xestión de débedas anteriores aos últimos catro (4) anos; a Tesouraría/Secretaría municipal expedirá, ademais, certificación de que as débedas non están prescritas e indicará as diferentes datas de notificación da débeda en executiva; remitirá á Deputación as altas, transferencias, baixas, cambios de domicilio e demais circunstancias que poidan afectar a liquidación dos tributos de que teñan coñecemento; remitirá as domiciliacións existentes; remitirá as ordenanzas fiscais aplicables.
– Remitir á Deputación calquera solicitude ou recurso que afecte os tributos obxecto de delegación, tales como solicitudes de exención ou bonificación, solicitudes de aprazamento ou fraccionamento, solicitudes de domiciliación, recursos de reposición...
– Localizar os suxeitos pasivos, contribuíntes, obrigados ao pagamento ou debedores, certificando ou informando respecto da súa veciñanza ou non no termo municipal, da posesión ou carencia de bens e do exercicio ou non de actividades.
– Expor publicamente no taboleiro de anuncios do Concello e noutros lugares de costume os edictos que se diten no exercicio das competencias delegadas.
A Deputación Provincial porá á disposición do Concello os medios necesarios para a subministración da colaboración e dará conta periodicamente dos resultados da xestión das competencias delegadas, pondo á súa disposición na sede electrónica da Deputación información sobre a situación dos recursos xestionados.
Cuarto. Outras condicións da delegación
1. Para o exercicio das facultades delegadas, o servizo aterase ao ordenamento local e á lexislación aplicable de acordo co establecido na Lei reguladora das facendas locais, así como na Ordenanza fiscal xeral de xestión, inspección e recadación tributaria da Deputación Provincial de Ourense (BOP nº 66, do 23 de marzo de 2015) e na Ordenanza fiscal reguladora da taxa pola prestación dos servizos de xestión, inspección e recadación pola Deputación Provincial de Ourense (BOP nº 210, do 12 de setembro de 2014).
2. Polo exercicio das funcións delegadas neste acordo, a Deputación Provincial percibirá as compensacións económicas previstas na vixente Ordenanza fiscal reguladora da taxa pola prestación dos servizos de xestión, inspección e recadación pola Deputación Provincial de Ourense. As cantidades a que dea lugar a dita compensación económica serán retiradas das entregas e liquidacións correspondentes que se realicen ao Concello.
3. A devolución dos ingresos indebidos que, de ser o caso, se produza, ocasionará a dedución da cantidade correspondente das liquidacións que deban renderse ao Concello.
A compensación de débedas en período voluntario que, de conformidade coa lexislación aplicable, o Concello poida acordar, requirirá a intervención do servizo para a súa realización. En calquera caso, deberanse entender como débedas cobradas para os efectos do premio de cobranza e das recargas ou participacións que á Deputación Provincial poidan corresponder nestas.
4. Os anticipos á conta da recadación rexeranse polo disposto na ordenanza fiscal antes mencionada. En todo caso, non se concederán anticipos sobre a recadación da taxa de recollida do lixo, dado que os gastos do servizo son asumidos integramente pola Deputación Provincial ao estar delegada a xestión nesta última.
5. As cantidades que correspondan pola recadación obtida serán transferidas ao Concello trimestralmente, xunto coa documentación xustificativa, e renderanse anualmente polo servizo, por conta da súa xestión recadatoria. Das ditas cantidades deduciranse, se é caso, as liquidacións emitidas polo Servizo de Xestión Tributaria e Recadación pola prestación dos distintos servizos efectuados pola Deputación, tales como recollida de residuos sólidos urbanos, limpeza viaria, verteduras, canceiras ou calquera outro.
Quinto. Entrada en vigor e prazo de vixencia
Unha vez aceptada pola Deputación Provincial, esta delegación entrará en vigor con efectos do 1 de xaneiro de 2021.
A presente delegación estará vixente por un período de catro anos e quedará tacitamente prorrogada por períodos iguais de catro anos, se ningunha das partes manifesta expresamente a súa vontade en contra, con comunicación á outra cunha antelación non inferior a seis meses á súa finalización ou á de calquera dos períodos de prórroga.
Sexto. Causas de resolución
Este acordo de delegación poderá resolverse polas seguintes causas:
– Por mutuo acordo entre as partes.
– Por denuncia de calquera das dúas partes, formulada cunha antelación mínima de seis meses ao remate de cada ano natural. En todo caso, a efectividade da resolución por denuncia de parte entenderase referida sempre ao 1 de xaneiro do exercicio seguinte.
– Por incumprimento de obrigas esenciais recollidas neste acordo de delegación.
Sétimo. Este acordo deberase notificar á Deputación Provincial de Ourense para efectos de que acepte a delegación aquí conferida.
Oitavo. Unha vez aceptada a delegación pola Deputación Provincial, este acordo publicarase no Boletín Oficial da provincia e no da Comunidade Autónoma, para xeral coñecemento, de acordo co previsto no artigo 7 do Real decreto lexislativo 2/2004, do 5 de marzo, polo que se aproba o texto refundido da Lei reguladora das facendas locais.
Ourense, 29 de decembro de 2020
José Manuel Baltar Blanco
Presidente da Deputación Provincial de Ourense