O Pleno municipal do Concello do Carballiño, na sesión extraordinaria que tivo lugar o día 26 de novembro de 2020, acordou:
Aprobar o texto inicial do Convenio urbanístico entre o Concello do Carballiño e o Concello de Maside para a modificación puntual do Plan xeral de ordenación municipal do Carballiño e das normas subsidiarias de planeamento municipal de Maside para o desenvolvemento de solo industrial.
Unha vez asinado o convenio, sométese ao trámite de información pública, mediante anuncio publicado no Diario Oficial de Galicia e nun dos xornais de maior difusión da provincia, por un período dun mes. O anuncio indicará o lugar ou punto de acceso electrónico a un enderezo en que se poida consultar o seu contido íntegro; no anuncio constará a identidade das partes.
Tras a información pública, de non se presentaren alegacións, o texto inicial aprobado e o documento administrativo asinado entenderanse definitivos sen necesidade de nova sinatura nin da súa ratificación por parte do Pleno municipal, e producirá esta aprobación e a formalización acadada plenos efectos xurídicos. Calquera das partes poderá solicitar a elevación do documento administrativo a escritura pública. O texto íntegro do convenio publicarase no Diario Oficial de Galicia, anotarase no Rexistro de Convenios e remitirase copia ao Arquivo de Convenios, de conformidade co previsto no artigo 403 do Regulamento da Lei do solo de Galicia.
A eficacia do dito convenio queda condicionada á aprobación definitiva das modificacións dos respectivos planeamentos urbanísticos.
Durante o período de información pública, o texto íntegro do convenio, xunto co resto do expediente administrativo, atoparanse á disposición do público en xeral na páxina web do Concello do Carballiño http://www.carballino.gal/, no portal de transparencia, así como nas dependencias municipais (sitas na Casa do Concello, número 1, da Praza Maior do Carballiño), das 9.00 ás 13.00 horas, para a súa consulta e a presentación de cantos documentos ou escritos de alegacións consideren convenientes.
O Carballiño, 1 de decembro de 2020
Francisco José Fumega Piñeiro
Alcalde
