O Decreto 82/2018, do 2 de agosto, polo que se regula a Comisión de Espectáculos Públicos e Actividades Recreativas de Galicia, sinala, no seu artigo 6, que as persoas titulares das vogalías serán nomeadas pola persoa titular da consellería competente en materia de espectáculos públicos e actividades recreativas, por proposta da Secretaría Xeral da Presidencia no ámbito da Presidencia da Xunta de Galicia respecto das vogalías en representación dos órganos superiores dependentes da Presidencia da Xunta de Galicia, das diferentes consellerías para os demais vogais en representación da Administración autonómica, da Federación Galega de Municipios e Provincias respecto das vogalías en representación da dita federación, e respecto das vogalías previstas no artigo 5.4.c) por proposta da dirección xeral con competencia en materia de espectáculos públicos, tendo en conta o seu grao de participación na elaboración da Lei 10/2017, do 27 de decembro, a representatividade que as entidades desempeñen, así como o ámbito territorial que abranguen.

En cumprimento desta, o día 24 de outubro de 2018, publicouse no Diario Oficial de Galicia a Orde do 17 de outubro de 2018, da Vicepresidencia e Consellería de Presidencia, Administracións Públicas e Xustiza, pola que se nomean as persoas membros titulares das vogalías da Comisión de Espectáculos Públicos e Actividades Recreativas de Galicia en representación dos sectores de espectáculos públicos e actividades recreativas, veciñanza e consumidores e usuarios.

Posteriormente, a Sentenza 78/2020, do 28 de febreiro, da Sala do Contencioso-Administrativo do Tribunal Superior de Xustiza de Galicia, anulou a referida Orde do 17 de outubro de 2018, no relativo ao nomeamento da vogal que representaba o sector das actividades recreativas.

Ao ser anulado o nomeamento de Mercedes Treviño Romero, en representación da Asociación de Empresarios da Verbena Galega (Asevega), pola antedita sentenza, procede facer un novo nomeamento para o sector das actividades recreativas, conforme coa proposta da Dirección Xeral de Emerxencias e Interior, e con base na fundamentación contida nela. En consecuencia,

DISPOÑO:

Artigo único. Nomeamento da persoa membro titular da vogalía en representación do sector das actividades recreativas

Nomear membro titular da vogalía da Comisión de Espectáculos Públicos e Actividades Recreativas de Galicia, en representación do sector das actividades recreativas, a persoa que a seguir se relaciona:

– Alberto Dopico González, en representación da Asociación de Empresarios da Música da Verbena Galega (Asevega).

Esta orde producirá efectos desde o día seguinte ao da súa publicación no Diario Oficial de Galicia.

Santiago de Compostela, 1 de setembro de 2020

O vicepresidente e conselleiro de Presidencia, Administracións Públicas e Xustiza
P.D. (Resolución do 31.8.2020)
Santiago Villanueva Álvarez
Director xeral de Emerxencias e Interior