A Resolución do 26 de xuño de 2020 (DOG núm. 140, do 15 de xullo), pola que se establecen as bases reguladoras do II Premio empregados/as públicos/as innovadores/as e se procede á súa convocatoria para o ano 2020 (código de procedemento IN822D), sinalaba, no seu artigo 19, que o prazo de presentación fose de dous meses contados a partir do día seguinte ao da publicación desta convocatoria no Diario Oficial de Galicia. Entendíase como último día do prazo o correspondente ao mesmo ordinal do día de publicación, o que correspondería co 15 de setembro.
Nos últimos meses asistimos a unha situación excepcional pola COVID-19, ademais de que o prazo de presentación de solicitudes coincide co desfrute, por parte do persoal ao servizo da Administración, das vacacións regulamentarias no período ordinario (meses de xuño a setembro de 2020).
Por todo o exposto,
RESOLVO:
Modificar o artigo 19 da Resolución do 26 de xuño de 2020 pola que se establecen as bases reguladoras do II Premio empregados/as públicos/as innovadores/as, de maneira que a data límite de presentación de solicitudes se amplía ata o 1 de outubro de 2020.
Santiago de Compostela, 11 de setembro de 2020
Patricia Argerey Vilar
Directora da Axencia Galega de Innovación