Antecedentes:
Primeiro. Con data do 10.4.2018, Greenalia Power, S.L.U. solicitou a autorización administrativa previa, a declaración de utilidade pública, en concreto, a necesidade de urxente ocupación que iso implica, a autorización administrativa de construción, o proxecto sectorial de incidencia supramunicipal, o estudo de impacto ambiental e a declaración de interese especial, e achegou a documentación técnica necesaria do proxecto.
Segundo. Con data do 26.4.2018, o Consello da Xunta de Galicia declarou de interese especial o proxecto da LAT 220 kV Campelo-Mesón, o que ten como efectos a tramitación de forma prioritaria, con carácter de urxencia e a redución á metade dos prazos necesarios na instrución do procedemento.
Os proxectos declarados de interese especial debían executarse e solicitar a autorización de explotación con anterioridade ao 1 de xaneiro de 2020. Queda, en caso contrario, sen efectos esta declaración de interese especial.
Terceiro. Con data do 6.7.2018, mediante Acordo da Xefatura Territorial da Consellería de Economía, Emprego e Industria da Coruña, someteuse a información pública a solicitude de autorización administrativa previa, a declaración de utilidade pública, en concreto, a necesidade de urxente ocupación que iso implica, a autorización administrativa de construción, o proxecto sectorial de incidencia supramunicipal e o estudo de impacto ambiental, realizada por Geenalia Power, S.L.U. (DOG núm. 148, do 3.8.2018).
Cuarto. Con data do 7.2.2019, a Dirección Xeral de Enerxía e Minas tomou razón do cambio de denominación da sociedade Greenalia Power, S.L.U. a Greenalia Wind Power, S.L.U.
Quinto. Debido ás correccións introducidas polos informes emitidos por organismos e entidades, con datas do 11.3.2019, 25.3.2019 e 12.4.2019, o promotor, Greenalia Wind Power, S.L.U., presentou nova documentación técnica que supón unha modificación do proxecto con respecto á documentación que foi exposta mediante o Acordo de 6 de xullo de 2018, publicado no DOG núm. 148, do 3 de agosto (antecedente terceiro).
Sexto. Con data do 3.5.2019, mediante Acordo da Xefatura Territorial da Consellería de Economía, Emprego e Industria da Coruña, someteuse a información pública a solicitude de autorización administrativa previa, a declaración de utilidade pública, en concreto, a necesidade de urxente ocupación que iso implica, a autorización administrativa de construción, o proxecto sectorial de incidencia supramunicipal e o estudo de impacto ambiental, realizada por Geenalia Wind Power, S.L.U. (DOG núm. 100, do 28.5.2019).
Sétimo. Novamente, debido ás correccións introducidas motivadas polos informes emitidos por organismos e entidades, con datas 28.2.2020, 12.3.2020 e 3.8.2020, o promotor, Greenalia Wind Power, S.L.U., presentou nova documentación técnica (febreiro 2020-visado o 27.2.2020), que supón unha modificación do proxecto con respecto á documentación que foi exposta mediante o Acordo de 3 de maio de 2019, publicado no DOG núm. 100, do 28 maio (antecedente sexto).
Polo anterior, en cumprimento do disposto na Lei 24/2013, do 26 de decembro, do sector eléctrico; na Lei 21/2013, do 9 de decembro, de avaliación ambiental; no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica; na Lei 8/2009, do 22 de decembro, pola que se regula o aproveitamento eólico en Galicia e se crea o canon eólico e o Fondo de Compensación Ambiental (modificada pola Lei 5/2017, do 19 de outubro, de fomento da implantación de iniciativas empresariais en Galicia); na Lei 10/1995, do 23 de novembro, de ordenación do territorio de Galicia; no Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, e demais normas vixentes de aplicación, sométese a información pública a solicitude relacionada coa instalación que se describe a continuación:
Solicitante/promotor: Greenalia Wind Power, S.L.U.-NIF B70501473 (antes coa denominación social de Greenalia Power, S.L.U.).
Enderezo social: praza María Pita, nº 10, 1º, 15001 A Coruña.
Denominación do proxecto: LAT 220 kV Campelo-Mesón (modificado) (do 27.2.2020 e visado 20200475 o 27.2.2020).
Municipios afectados: concellos de Carballo, Carral, Cerceda, Coristanco, Ordes e Tordoia (A Coruña).
Orzamento: 10.156.357,69 €.
Obxecto:
Co fin de evacuar a enerxía xerada polos parques eólicos proxectados de Campelo (IN661A 2011/16), Bustelo (IN408A 2017/002) e Monte Toural (IN408A 2017/017), proxéctase unha liña de alta tensión de 220 kV con inicio na subestación do parque eólico de Campelo proxectada (IN661A 2011/16) e final na subestación de transporte existente de Mesón do Vento.
Características técnicas das instalacións:
– LAT a 220 kV simple circuíto de 38.574 m, coa seguinte configuración técnica:
– LATA a 220 kV simple circuíto dúplex, de 35.334 m, condutor tipo LA-455 Al, con orixe no pórtico da SET do parque eólico de Campelo proxectada (IN661A 2011/16), e remate no paso A/S do apoio nº 103 proxectado. Os apoios proxectados son do tipo celosía de aceiro.
– LATS a 220 kV, de 1.186 m, condutor tipo RHZ1-RA+2OL (AS) 127/220 2×(1×630) Al, con orixe no PA/S do apoio nº 103 proxectado e final no paso A/S do apoio nº 104 proxectado. Conexión equipotencial das terras en ambos os dous extremos en condutor tipo RV 0,6/1 kV 1×Cu185 mm².
– LATA a 220 kV simple circuíto dúplex, de 809 m, condutor tipo LA-455 Al, con orixe no paso A/S do apoio nº 104 proxectada, e final no paso A/S do apoio nº 107 proxectado. Os apoios proxectados son do tipo celosía de aceiro.
– LATS a 220 kV, de 1.244 m, condutor tipo RHZ1-RA+2OL (AS) 127/220 2×(1×630) Al, con orixe no PA/S do apoio nº 107 proxectado e final na posición prevista na SET Mesón do Vento de transporte. Conexión equipotencial das terras en ambos os dous extremos en condutor tipo RV 0,6/1 kV 1×Cu185 mm².
Obxecto da información pública:
– A autorización administrativa previa, a declaración de utilidade pública, en concreto, a necesidade de urxente ocupación que iso implica, a autorización administrativa de construción, o proxecto sectorial de incidencia supramunicipal e o estudo de impacto ambiental das instalacións. A declaración de utilidade pública levará implícita, de acordo co artigo 56 da Lei 24/2013, do 26 de decembro, do sector eléctrico, a necesidade da urxente ocupación para os efectos da expropiación forzosa, dos bens e dereitos afectados necesarios para o establecemento destas instalacións.
– Documentación que se expón:
1. O proxecto de execución (febreiro 2020-visado o 27.2.2020).
1.1. A relación concreta e individualizada dos propietarios de bens e dereitos afectados pola modificación do proxecto (RBDA-xullo 2020), que figura nos anexos que se insire neste acordo.
1.2. Plano xeral do proxecto da LAT Campelo-Mesón (modificado).
1.3. Planos individuais dos predios afectados pola 2ª modificación do proxecto (RBDA-xullo 2020).
2. O estudo de impacto ambiental (EIA) (abril 2018).
2.1. A addenda ao estudo de impacto ambiental (marzo 2019).
2.2. A 2ª addenda ao estudo de impacto ambiental (febreiro 2020).
3. O proxecto sectorial de incidencia supramunicipal (febreiro 2020-visado o 27.2.2020).
O que se fai público, de conformidade co artigo 33.8 da Lei 8/2009, do 22 de decembro, pola que se regula o aproveitamento eólico en Galicia e se crea o canon eólico e o Fondo de Compensación Ambiental (modificada pola Lei 5/2017, do 19 de outubro, de fomento da implantación de iniciativas empresariais en Galicia), para o coñecemento xeral, así como, en particular, dos propietarios dos predios que figuran nas relacións anexas a este acordo, e das persoas que sendo titulares de dereitos reais ou intereses económicos sobre os bens afectados que fosen omitidas, para que poidan examinar a documentación técnica anteriormente relacionada e, se é o caso, presentar as alegacións ou observacións que consideren oportunas dentro do prazo de trinta (30) días, que se contará a partir do día seguinte ao da última publicación deste acordo.
A documentación estará á disposición dos interesados nas dependencias da Sección de Enerxía desta Xefatura Territorial da Coruña da Consellería de Economía, Emprego e Industria (rúa Vicente Ferrer, nº 2, 2º andar, 15071 A Coruña, das 9.00 as 14.00 horas, de luns a venres, con cita previa no correo electrónico seccion.enerxia.coruna@xunta.es ou nos teléfonos 981 18 49 83 e 981 18 49 23), así como nos concellos de Carballo, Carral, Cerceda, Coristanco, Ordes e Tordoia (A Coruña). Ademais, tamén se poderá consultar no portal web da Consellería de Economía, Emprego e Industria https://ceei.xunta.gal/transparencia/informacion-publica/en-tramitacion/instalacions-de-xeracion?content=expediente_0008.html
O estudo de impacto ambiental estará tamén dispoñible, durante o mesmo prazo, nas dependencias da Xefatura Territorial da Coruña da Consellería de Medio Ambiente, Territorio e Vivenda.
A Coruña, 19 de agosto de 2020
Isidoro Martínez Arca
Xefe territorial da Coruña