O día 2 de decembro de 2019 publicouse no Diario Oficial de Galicia número 229, a Resolución do 19 de novembro de 2019 pola que se establecen as bases reguladoras para a concesión, en réxime de concorrencia non competitiva, de axudas para actuacións de mellora paisaxística e de embelecemento de bens e recursos que se atopen no Camiño de Santiago, e se establece a súa convocatoria para o ano 2020 (código de procedemento TU501D).
No artigo 21.1 das bases reguladoras establécese que a data límite para executar o proxecto e presentar a documentación xustificativa dos investimentos será o 20 de outubro de 2020.
A situación provocada pola evolución da epidemia do coronavirus COVID-19 e as medidas adoptadas tras a declaración do estado de alarma para a xestión da situación de crise sanitaria ocasionada polo COVID-19, polo Real decreto 463/2020, do 14 de marzo, e as súas prórrogas, afectaron de xeito directo a tramitación do presente procedemento de concesión de subvencións, motivo polo que resulta preciso ampliar os prazos de execución e xustificación dos investimentos por parte das persoas beneficiarias, co fin de posibilitar que se poidan executar os investimentos que resulten subvencionados.
De acordo co anterior, vista a Lei 9/2007, do 13 de xuño, de subvencións de Galicia, e o Decreto 11/2009, do 8 de xaneiro, polo que se aproba o seu regulamento,
RESOLVO:
Ampliar ata o día 15 de novembro de 2020 (inclusive) o prazo de execución e xustificación dos investimentos que foron obxecto de subvención ao abeiro da Resolución do 19 de novembro de 2019, pola que se establecen as bases reguladoras para a concesión, en réxime de concorrencia non competitiva, de axudas para actuacións de mellora paisaxística e de embelecemento de bens e recursos que se atopen no Camiño de Santiago, e se establece a súa convocatoria para o ano 2020 (código de procedemento TU501D).
Santiago de Compostela, 10 de agosto de 2020
A directora da Axencia Turismo de Galicia
P.S. (Artigo 19.6 do Decreto 196/2012, do 27 de setembro,
DOG núm. 193, do 9 de outubro)
Mª Elena Barca Ramos
Xerente da Axencia Turismo de Galicia