A Axencia Galega das Industrias Culturais (Agadic) publicou no Diario Oficial de Galicia do día 13 de xaneiro de 2019 a Resolución do 26 de decembro de 2018 pola que se establecen as bases reguladoras, en réxime de concorrencia competitiva, para a concesión de subvencións de creación audiovisual para o desenvolvemento e promoción do talento audiovisual galego, e se convocan para o ano 2019 (código de procedemento CT207E).
A base décimo sétima establece que o prazo de xustificación da subvencións para a modalidade C rematará o 30 de xullo de 2020.
O artigo 45.3 do Decreto 1172009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, establece a posibilidade de que o órgano concedente das subvencións outorgue, salvo precepto en contra contido nas bases reguladoras, unha ampliación do prazo establecido para presentar a xustificación, que non excederá a metade deste e sempre que con iso non se prexudiquen dereitos de terceiros.
O artigo 32 da Lei 39/2015, de 1 de outubro, do procedemento administrativo común das administracións públicas, indica que a ampliación poderá acordarse de oficio ou por instancia de parte antes do vencemento do prazo de que se trate e se as circunstancias así o aconsellan.
En consecuencia, tendo en conta a data de xustificación da modalidade C, as solicitudes de ampliación deste prazo por parte de beneficiarios, polas das dificultades que están atopando para presentar a súa xustificación como consecuencia da declaración do estado de alarma polo Real decreto 463/2020, do 14 de marzo, por mor do COVID-19, o que provocou unha suspensión dos prazos administrativos, unha parálise total da actividade económica e un novo escenario social.
Polas razóns antes expostas,
RESOLVO:
Modificar a data límite de xustificación establecida na base décimo sétima da Resolución do 26 de decembro de 2018 pola que se establecen as bases reguladoras, en réxime de concorrencia competitiva, para a concesión de subvencións de creación audiovisual para o desenvolvemento e promoción do talento audiovisual galego, e se convocan para o ano 2019, para a modalidade C ampliando o prazo para presentar a documentación xustificativa ata o 30 de setembro de 2020.
Disposición derradeira.
Esta resolución entrará en vigor o día seguinte ao da súa publicación.
Santiago de Compostela, 14 de xullo de 2020
Román Rodríguez González
Presidente do Consello Reitor da Axencia
Galega das Industrias Culturais