O Instituto Galego da Vivenda e Solo (en diante, IGVS), en virtude do artigo 4.2 da Lei 3/1988, do 27 de abril, de creación do IGVS, acordou someter a información pública, polo prazo dun mes, mediante inserción de anuncios no Diario Oficial de Galicia, no taboleiro de edictos dos concellos das Neves e de Salvaterra de Miño e nun xornal dos de maior circulación na provincia, o proxecto modificado da ETAP da Plisan, zona de captación, para que aquelas persoas que poidan resultar interesadas formulasen as observacións e reclamacións que xulgaran convenientes.
Simultaneamente ao trámite sinalado no parágrafo anterior e para os efectos previstos no artigo 17 da Lei de expropiación forzosa, e nos artigos 16 e 17 do Decreto do 26 de abril de 1957, polo que se aproba o Regulamento de expropiación forzosa, tamén se someteu a información pública, polo mesmo prazo dun mes, a relación individual de bens, dereitos e propietarios afectados pola realización da obra correspondente, para que as persoas afectadas presentasen cantas alegacións ou rectificacións considerasen oportunas en canto aos bens e dereitos descritos na relación anexa de expropiacións. Para tal efecto, notificouse este anuncio ás persoas que aparecen afectadas e ao Ministerio Fiscal, para os efectos establecidos no artigo 5 da Lei de expropiación forzosa.
Durante os citados trámites non se presentou ningunha alegación.
De conformidade co disposto no artigo 52 da Lei do 16 de decembro de 1954, de expropiación forzosa, o Consello da Xunta de Galicia, na sesión do 30 de xaneiro de 2020, acordou a declaración de urxente ocupación, para os efectos de expropiación forzosa, dos bens e dereitos para a execución das obras do proxecto denominado modificado da estación de tratamento de auga potable (ETAP) da plataforma loxística industrial Salvaterra de Miño-As Neves (Plisan), zona de captación, así como en calquera das modificacións que sexan necesarias realizar para a súa execución.
En virtude do artigo 52.1 da citada Lei de expropiación, co citado acordo entenderase cumprido o trámite de declaración de necesidade de ocupación dos bens que serán expropiados segundo o citado proxecto e dará dereito á ocupación inmediata.
O punto 2 do citado artigo establece que se notificará aos interesados o día e a hora en que se levantará a acta previa á ocupación cunha antelación mínima de oito días. Coa mesma anticipación publicarase nos taboleiros de edictos oficiais, nun xornal da localidade e en dous diarios da capital de provincia, se os houbese.
En consecuencia, acórdase:
Convocar e citar os posibles titulares dos bens e dereitos afectados que aparecen no anexo para o levantamento das actas previas á ocupación, as cales se levarán a cabo no salón de plenos do Concello das Neves, praza da Cristiandade, 1, o día 28 de febreiro de 2020, ás 10.00 horas.
Nas ditas actas recolleranse as manifestacións e os datos necesarios para determinar os bens e dereitos afectados e os prexuízos, de ser o caso, derivados da rápida ocupación, sen prexuízo de se trasladaren ao lugar do predio se o consideran necesario.
Para proceder ao levantamento destas actas, deberán comparecer todos os titulares persoalmente, presentar o NIF e copia deste, ou ben representados por persoa debidamente autorizada para actuar no seu nome, con poder notarial suficiente do que, igualmente, achegarán copia. Para os casos de sucesión dos dereitos derivados do expediente expropiatorio, ademais, achegarán documentos suficientes acreditativos da sucesión alegada e da lexitimidade da persoa interesada para o cobramento das cantidades en cuestión (certificado de defunción, actos de última vontade, liquidación do imposto de sucesións, testamento, operacións particionais, etc.).
Este anuncio publicarase no Diario Oficial de Galicia, no taboleiro de edictos do Concello das Neves, no xornal da localidade e en dous diarios da capital da provincia correspondente. Ademais, notificaráselle ao Ministerio Fiscal para os efectos do establecido no artigo 5 da Lei de expropiación forzosa.
Tamén, notificaráselles individualmente aos titulares dos predios que figuran no listado anexo, a data, a hora e o lugar en que se procederá ao levantamento das actas previas á ocupación.
Así mesmo, publicarase no taboleiro de edictos único do Boletín Oficial del Estado, o que servirá de notificación aos interesados descoñecidos, dos cales se ignore o lugar de notificación ou aos que, intentada a notificación, non se puidese efectuar, de conformidade co artigo 44 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 7 de febreiro de 2020
Heriberto García Porto
Director xeral do Instituto Galego da Vivenda e Solo
