De conformidade co establecido no Decreto 206/2005, do 22 de xullo, de provisión de prazas de persoal estatutario do Servizo Galego de Saúde, e a Orde da Consellería de Sanidade do 24 de maio de 2006 pola que se establecen as bases do procedemento para a provisión dos postos de xefatura e coordinación das institucións sanitarias do Servizo Galego de Saúde, convocouse pola Resolución do 29 de maio de 2019 (DOG núm. 115, do 19 de xuño do 2019), a provisión, polo sistema de concurso de méritos, de varios postos de encargado de quenda de celadores.
Con base no Decreto 137/2019, de 10 de outubro, polo que se establece a estrutura orgánica do Servizo Galego de Saúde, na Orde do 5 de xullo de 2012 sobre delegación de competencias en órganos centrais e periféricos do Servizo Galego de Saúde, e no Decreto 134/2019, do 10 de outubro, polo que se regulan as áreas sanitarias e os distritos sanitarios do Sistema público de saúde de Galicia, esta xerencia,
DISPÓN:
Primeiro. Resolver a convocatoria pública para a provisión de varios postos de encargado de quenda de celadores, convocada pola Resolución do 29 de maio de 2019.
Segundo. Nomear para os postos que se indican, as persoas citadas no anexo desta resolución.
Terceiro. O aspirante nomeado deberá cesar na praza que desempeñe dentro dos 3 días hábiles seguintes a aquel en que se publique esta resolución no Diario Oficial de Galicia.
A toma de posesión do posto de traballo adxudicado deberá efectuarse dentro dos 3 días hábiles seguintes ao do cesamento, se a praza desempeñada e o posto adxudicado son da mesma área de saúde, ou no prazo de 15 días hábiles, se son de distinta área de saúde. Para estes efectos, entenderase por praza desempeñada a efectivamente ocupada, con independencia de que sexa en condición de destino definitivo, adscrición ou destino provisional ou comisión de servizos.
Se así o permiten as necesidades do servizo, e por petición motivada do interesado, os prazos a que se refiren os parágrafos anteriores poderán ser prorrogados polo órgano convocante.
O prazo de toma de posesión e a súa prórroga terán a consideración de servizo activo, percibíndose os correspondentes haberes de conformidade co que estableza a orde sobre a confección de nóminas do persoal ao servizo da Administración autonómica.
Entenderase que solicita a excedencia voluntaria por interese particular, e será declarado nesa situación polo órgano competente, quen non se incorpore ao posto adxudicado no prazo establecido.
Cuarto. Contra esta resolución poderá interpoñer recurso de alzada, perante a Dirección Xeral de Recursos Humanos do Servizo Galego de Saúde, no prazo dun mes a partir do día seguinte ao da súa publicación, nos termos previstos nos artigos 121 e seguintes da Lei 39/2015, do 1 de outubro, do procedemento administrativo común das administracións públicas.
Vigo, 20 de xaneiro de 2020
Julio García Comesaña
Xerente da Área Sanitaria de Vigo
ANEXO
1. Denominación do posto: encargado de quenda de celadores-urxencias.
Nome e apelidos: Mónica Domínguez Graña.
DNI: ***4427**.
2. Denominación do posto: encargado de quenda de celadores-servizos xerais.
Nome e apelidos: María José Álvarez Cadilla.
DNI: ***5941**.
3. Denominación do posto: encargado de quenda de celadores-servizos xerais.
Nome e apelidos: María Estela Portas Blanco.
DNI: ***3909**.
