En cumprimento do disposto polo artigo 37 da Lei 4/2015, do 17 de xuño, de mellora da estrutura territorial agraria de Galicia, notifícolle que o director xeral de Desenvolvemento Rural resolveu, con data do 7 de outubro de 2019, poñer á disposición os predios para a toma de posesión provisional dos predios resultantes do proceso de concentración/reestruturación parcelaria da zona de Castelaus (Calvos de Randín-Ourense), na cal figura vostede como propietario.
As datas para tomar posesión dos predios son as seguintes:
1. Para terreos de prado, pasteiro, labradío sen colleita e monte, o día 7 de xaneiro de 2020.
2. Para os restantes terreos, no momento en que, segundo o costume, se retiren as colleitas actuais (cereais...).
Para o caso de que se pretenda retirar arboredo, a data límite é o día 7 de abril de 2020 e deberase contar co preceptivo permiso do Servizo de Montes, e xestionar o aproveitamento con suxeición ao establecido no Decreto 50/2014, do 10 de abril, e na Orde do 20 de abril de 2018, que modifica os seus anexos II, III e VI.
(Información no enderezo https://mediorural.xunta.gal/es/areas/forestal/ordenacion/distritos/)
No prazo de dous meses contados a partir do seguinte á data establecida para a posta á disposición dos predios, poderá reclamar por defecto de superficie nos predios que lle fosen atribuídos, xuntando unha medición pericial asinada por un técnico competente, sobre diferenzas de superficie superiores a unha marxe de tolerancia variable entre a medición in situ e a que conste no boletín de atribucións dos novos predios, conforme o disposto no antedito artigo 37.
Importante: as persoas propietarias das parcelas de achega deben permitir aos titulares dos novos predios o acceso a eles para proceder, no prazo dos dous meses arriba sinalado, á súa medición.
Debe terse en conta que:
A falta de superficie dun predio non será compensada cando exista exceso de superficie no conxunto dos predios atribuídos ao mesmo propietario, e esta sexa suficiente para compensar en valor de puntuación o conxunto das atribucións.
A falta de superficie en terreos de núcleo rural (total ou parcialmente) será compensada nesta mesma clase. No caso de non existir dispoñible terreo deste tipo e o mesmo titular ter exceso de superficie en terreos doutra clase, a compensación farase sobre os ditos terreos.
Non se admitirá reclamación no caso de que o predio obxecto desta coincida exactamente, na súa delimitación cartográfica, coa parcela achegada polo mesmo titular.
Impedir ou obstaculizar a toma de posesión considérase unha infracción moi grave (artigo 90 da Lei 4/2015), e está sancionada con multa de 1.501 a 6.000 euros.
Sen prexuízo do indicado no punto anterior, a toma de posesión poderá darse, logo de apercibimento, mediante compulsión directa sobre a/as persoa/s que a impidan.
Os planos do acordo e as coordenadas dos marcos están accesibles na internet na páxina web da Consellería do Medio Rural, no enderezo:
http://mediorural.xunta.gal/areas/infraestruturas/concentracions_parcelarias/publicacions
Ourense, 24 de outubro de 2019
Yago Borrajo Sánchez
Xefe territorial de Ourense