O Consello da Xunta de Galicia acordou, na súa reunión do 7 de xuño de 2018, declarar o proxecto sectorial para a ampliación do Hospital Gran Montecelo como de incidencia supramunicipal, para os efectos previstos na Lei 10/1995, de ordenación do territorio de Galicia, e atribuíu á Consellería de Sanidade o seu impulso e a súa tramitación.

Mediante a Resolución do 9 de xaneiro de 2019, da Dirección Xeral de Recursos Económicos, someteuse a información pública este proxecto sectorial, xa que, como sinalan os artigos 25 da Lei 10/1995, do 23 de novembro, de ordenación do territorio de Galicia; 13 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, e a Lei 21/2013, do 9 de decembro, de avaliación ambiental, os proxectos sectoriais, con todos os documentos que o integran, incluído o estudo ambiental estratéxico, se someterán aos trámites de información pública e se lles dará audiencia aos concellos sobre os cales incida o proxecto.

O Consello da Xunta de Galicia, na súa reunión do 26 de xuño de 2019, aprobou definitivamente este proxecto sectorial e, en consecuencia,

RESOLVO:

1. Dar publicidade ao Acordo do Consello da Xunta, do 26 de xullo de 2019, de aprobación definitiva do proxecto sectorial de incidencia supramunicipal para a ampliación do Hospital Gran Montecelo, de conformidade co establecido no artigo 13 do Decreto 80/2000, do 23 de marzo, que regula os plans e proxectos sectoriais de incidencia supramunicipal.

2. Publicar o proxecto sectorial de incidencia supramunicipal para a ampliación do Hospital Gran Montecelo, en cumprimento do previsto no artigo 4 da Lei 10/1995, do 23 de novembro, de ordenación do territorio de Galicia, ao cal se poderá acceder a través do seguinte enderezo web: https://www.sergas.es/Recursos-Economicos/Proxecto-sectorial-para-a-ampliacion-do-Hospital-Gran-Montecelo.

Santiago de Compostela, 16 de setembro de 2019

María Jesús Piñeiro Bello
Directora xeral de Recursos Económicos