BDNS (Identif.): 463915.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo pode consultarse na Base de datos nacional de subvencións (http://www.pap.hacienda.gob.es/bdnstrans/index).
Primeiro. Entidades beneficiarias
Entidades sen ánimo de lucro cuxo obxecto ou actividades estean relacionadas coa minaría. As ditas entidades non deberán exercer unha actividade económica ofrecendo bens ou servizos nun mercado determinado, salvo que dispoñan de contabilidade separada para as actividades económicas e as subvencionadas.
En todo caso, serán admitidas como entidades sen ánimo de lucro as universidades, con ensinanzas universitarias e/ou apoio á investigación en ámbitos do coñecemento relacionados coa minaría, e os colexios profesionais dos enxeñeiros de minas, enxeñeiros técnicos de minas e xeólogos.
As persoas beneficiarias deberán desenvolver actividade no territorio da Comunidade Autónoma de Galicia.
Segundo. Obxecto
Aprobar as bases polas que se rexerá a concesión de axudas da Consellería de Economía, Emprego e Industria a entidades sen ánimo de lucro cuxo obxecto ou actividades estean relacionadas coa minaría, así como a súa convocatoria para o ano 2019, que teñen por obxecto a realización de accións que contribúan a mellorar as prácticas preventivas e ambientais do sector mineiro galego, ao aproveitamento racional e eficiente dos recursos minerais, á investigación e innovación no seu aproveitamento e á transferencia de coñecemento no marco dun desenvolvemento sustentable, así como á divulgación do sector na sociedade, incluíndo a investigación e divulgación da historia da minaría de Galicia e a recuperación e posta en valor do patrimonio mineiro.
Terceiro. Bases reguladoras
Inclúense no anexo I da Orde do 19 de xuño de 2019.
Cuarto. Contía
O crédito destinado a esta convocatoria é de 1.000.000,00 euros.
Quinto. Prazo de presentación de solicitudes
Un mes a partir do día seguinte ao da publicación da Orde do 19 de xuño de 2019 no Diario Oficial de Galicia.
Santiago de Compostela, 19 de xuño de 2019
Francisco José Conde López
Conselleiro de Economía, Emprego e Industria