Os municipios de Cerdedo e Cotobade tramitaron un procedemento de fusión para constituírense nun único municipio, que deu lugar á aprobación do Decreto 134/2016, do 22 de setembro, polo que se aproba a fusión voluntaria dos municipios de Cerdedo e Cotobade e se constitúe o municipio de Cerdedo-Cotobade, publicado no Diario Oficial de Galicia nº 197, do 17 de outubro.

O citado Decreto 134/2016, do 22 de setembro, na súa disposición adicional establece que, conforme o disposto na Lei de bases do réxime local, se procederá ao nomeamento dunha comisión xestora da cal formarán parte todos os concelleiros e concelleiras dos municipios de Cerdedo e Cotobade, que se ocupará de rexer e administrar o novo municipio ata as vindeiras eleccións municipais.

Mediante a Orde do 17 de outubro de 2016 pola que se designa a Comisión Xestora do municipio de Cerdedo-Cotobade, publicada no Diario Oficial de Galicia nº 198, do 18 de outubro, procedeuse á designación dos membros da Comisión Xestora do municipio fusionado de Cerdedo-Cotobade.

Esta comisión constituíuse con data do 20 de outubro de 2016, ás 12.00 horas, como dispón o propio artigo 3 da Orde do 17 de outubro de 2016.

A Comisión Xestora, en sesión do 31 de xaneiro de 2019, tomou coñecemento da renuncia presentada o día 24 de xaneiro pola vogal designada, María Luz Castro Gil, e remitiu certificación do acordo á Vicepresidencia e Consellería de Presidencia, Administracións Públicas e Xustiza, para os efectos oportunos.

A seguinte persoa con dereito a ser nomeada membro da Comisión Xestora do municipio de Cerdedo-Cotobade en substitución de María Luz Castro Gil era María Lourdes Ovelleiro Garrido pero, con data do 11 de marzo de 2019, a interesada comunica que por incompatibilidade co seu cargo de funcionaria renuncia ao seu nomeamento como vogal. De acordo con isto, a seguinte persoa á cal lle corresponde é a seguinte da lista da candidatura do Partido Popular de Cerdedo publicada no BOP de Pontevedra do 28 de abril de 2015, Diana Calvo Álvarez, que cumpre os requisitos para substituír calquera vogal da comisión xestora emanado desa lista.

A designación da nova vogal faise seguindo os mesmos criterios de repartición utilizados para as eleccións municipais e segundo os resultados producidos nestas no conxunto dos municipios afectados. Segundo o artigo 182 da Lei orgánica 7/1985, do 19 de xuño, do réxime electoral xeral, no caso de renuncia dun concelleiro o escano atribuiráselle ao candidato ou, de ser o caso, ao suplente da mesma lista a quen corresponda, atendendo á súa orde de colocación.

En consecuencia, no exercicio das facultades outorgadas polo Decreto 74/2018, do 5 de xullo, polo que se establece a estrutura orgánica da Vicepresidencia e Consellería de Presidencia, Administracións Públicas e Xustiza, de conformidade co disposto polo artigo 39 da Lei 5/1997, do 22 de xullo, reguladora da Administración local de Galicia, e dándolle cumprimento ao establecido na disposición adicional do Decreto 134/2016, do 22 de setembro, polo que se aproba a fusión voluntaria dos municipios de Cerdedo e Cotobade e se constitúe o municipio de Cerdedo-Cotobade,

DISPÓN:

Primeiro. Designar como membro da Comisión Xestora do municipio de Cerdedo-Cotobade, en substitución de María Luz Castro Gil, a Diana Calvo Álvarez.

Segundo. Esta orde producirá efectos desde o mesmo día da súa publicación no Diario Oficial de Galicia.

Santiago de Compostela, 24 de abril de 2019

Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza