O Pleno do Concello de Xinzo de Limia, en sesión ordinaria do día 15 de marzo de 2019, aprobou provisionalmente a modificación do escudo heráldico e a creación da bandeira do Concello de Xinzo de Limia mediante acordo do seguinte teor literal:
«1. Ratificar a solicitude de elaboración de bandeira e escudo realizada mediante o Acordo da Xunta de Goberno Local de data 23 de xuño de 2016 polo que se decidiu solicitar á Comisión Heráldica da Xunta de Galicia a revisión do brasonamento do escudo municipal vixente de Xinzo de Limia, e unha proposta de modelo adecuado para a súa representación gráfica, así como proposta dunha bandeira ou insignia municipal.
2. Aprobar provisionalmente o novo deseño de escudo nos seguintes termos segundo a proposta remitida pola Comisión Heráldica de Galicia: “Partido e medio cortado. Primeiro, de prata (branco), a banda de sable (negro) e brochante, en orla, a cadea de ouro (amarelo). Segundo, de ouro, o galo de goles (vermello). Terceiro, de sinople (verde), dúas espigas de ouro dispostas en aspa. Ao timbre, a coroa real pechada”.
3. Aprobar provisionalmente o deseño de bandeira nos seguintes termos segundo a proposta remitida pola Comisión Heráldica de Galicia: “O pano branco, coa banda de negro e, brochante, en orla, a cadea de amarelo. Partida e medio e cortada, ao batente: primeiro de amarelo, co galo de vermello, e segundo de verde, coas espigas cruzadas de amarelo”.
4. Someter este acordo a información pública durante o prazo dun mes mediante anuncio no DOG e no taboleiro de edictos, prazo durante o cal se poderán presentar alegacións».
En cumprimento do disposto no Regulamento de símbolos das entidades locais de Galicia, aprobado polo Decreto 19/2010, do 11 de febreiro, nos artigos 258 a 262 da Lei 5/1997, do 22 de xullo, de Administración local de Galicia, e nos artigos 22.2.b) e 47.2.e) da Lei 7/1985, reguladora das bases de réxime local, sométese o expediente a información pública durante o prazo dun mes mediante este anuncio no Diario Oficial de Galicia, para que as persoas interesadas poidan examinar o expediente e presentar as reclamacións que consideren oportunas.
Se transcorrido o dito prazo non se presentan reclamacións, considerarase aprobado definitivamente o acordo por parte do Pleno municipal, e remitirase o expediente completo á Comisión Heráldica co fin de que emita informe preceptivo e vinculante, o cal será elevado ao Consello da Xunta para a súa aprobación.
Xinzo de Limia, 29 de marzo de 2019
Manuel Cabas López
Alcalde presidente