Por Resolución da Dirección Xeral de Recursos Humanos do Servizo Galego de Saúde, do 29 de novembro de 2017 (DOG núm. 228, do 30 de novembro), convocouse concurso de traslados aberto e permanente para a provisión de prazas básicas de persoal estatutario de xestión e servizos.
Mediante Resolución da Dirección Xeral de Recursos Humanos do Servizo Galego de Saúde, do 11 de decembro de 2017 (DOG núm. 243, do 26 de decembro), convocouse concurso de traslados aberto e permanente para a provisión de prazas básicas de persoal estatutario, licenciado sanitario de atención primaria, sanitario diplomado e de formación profesional.
Por Resolución da Dirección Xeral de Recursos Humanos do Servizo Galego de Saúde, do 29 de novembro de 2018 (DOG núm. 234, do 10 de decembro), convocouse concurso de traslados aberto e permanente para a provisión de prazas básicas de persoal estatutario das categorías de facultativo/a especialista de área, médico/a de urxencias hospitalarias, médico/a de admisión e documentación clínica, médico/a asistencial do 061 e técnico/a en farmacia.
Unha vez finalizado o prazo de presentación de solicitudes do ciclo de adxudicación correspondente ao ano 2019, e de conformidade coas bases 3.5.2), 7.1), 8.1) e 8.2) da Resolución do 20 de novembro de 2017, pola que se aproban as bases do procedemento de concurso de traslados aberto e permanente para a provisión de prazas básicas de persoal estatutario do Sistema público de saúde de Galicia (DOG núm 227. do 29 de novembro), esta dirección xeral
RESOLVE:
Primeiro. Aprobar a relación provisional de solicitantes admitidos/as e excluídos/as no ciclo de adxudicación correspondente ao ano 2019 do concurso de traslados aberto e permanente para a provisión de prazas básicas de persoal estatutario sanitario e de xestión e servizos.
As listas coa relación provisional de admitidos/as e excluídos/as en cada unha das categorías están publicadas, á disposición das persoas interesadas, na páxina web do Servizo Galego de Saúde (www.sergas.es).
Ademais, o estado de cada solicitude pode ser consultado polo/a solicitante no seu expediente electrónico persoal en Fides/expedient-e/sección de procesos.
De conformidade coa base oitava da resolución de bases do 20 de novembro de 2017, as persoas excluídas disporán dun prazo de dez días hábiles contados a partir do seguinte ao da publicación desta resolución no Diario Oficial de Galicia para poder corrixir, se é o caso, o defecto que motivou a exclusión, mediante solicitude que deberán dirixir á unidade de validación a que se dirixise a solicitude de participación no concurso.
As persoas que, tendo presentado debidamente a súa solicitude de participación para este ciclo, non consten como admitidas nin excluídas, disporán do mesmo prazo para formular a súa reclamación.
A estimación ou desestimación das emendas solicitadas entenderase implícitas na resolución da Dirección Xeral de Recursos Humanos do Servizo Galego de Saúde pola que se declaren con carácter definitivo os/as admitidos/as e excluídos/as, e que fará públicas, así mesmo, as puntuacións e destinos provisionalmente asignados.
As persoas solicitantes que dentro do prazo indicado non emenden os defectos motivo da exclusión, serán definitivamente excluídas da participación neste ciclo.
Segundo. Aprobar a oferta de destinos correspondente ao ciclo de adxudicación do ano 2019 do concurso de traslados aberto e permanente para a provisión de prazas básicas de persoal estatutario sanitario e de xestión e servizos.
A relación de prazas ofertadas por categoría e os centros en que poden existir resultas está publicada na páxina web do Servizo Galego de Saúde (www.sergas.es), na sección de emprego público/concurso de traslados/concurso de traslados aberto e permanente 2019.
Ademais, poderá ser consultada polo/a solicitante no seu expediente electrónico persoal en Fides/expedient-e/sección de procesos.
Terceiro. Os/as profesionais que figuren na relación de participantes deste ciclo disporán dun prazo de quince días naturais, contado desde o seguinte ao da publicación desta resolución no Diario Oficial de Galicia, para poder modificar a través de Fides/expedient-e, no seu formulario de participación, a selección de destinos efectuada, se así o desexan.
As modificacións que se realicen na selección de destinos deberán presentarse por rexistro electrónico e non requirirán a entrega de ningunha documentación. Terase en conta a última modificación presentada por rexistro electrónico, dentro do prazo indicado.
De igual forma, os/as aspirantes que, resultando admitidos con carácter provisional neste proceso, non tivesen seleccionado na instancia de participación ningún destino, disporán do prazo de quince días naturais contado desde o seguinte ao da publicación desta resolución para efectuar, a través de Fides/expedient-e mediante o oportuno rexistro electrónico, a selección de destinos que consideren.
De conformidade coa base 3.5.1 da Resolución do 20 de novembro de 2017, pola que se aproban as bases do procedemento de concurso de traslados aberto e permanente, aquelas solicitudes de participación que, logo do prazo anteriormente sinalado, non conteñan a selección de, polo menos un destino, non terán a consideración de solicitude validamente presentada e quedarán excluídas automaticamente do ciclo de adxudicación en curso.
Cuarto. Os/as profesionais que opten a algún dos destinos que exixen habilitacións específicas para o seu desempeño, deberán rexistrar, dentro do prazo de quince días naturais seguintes ao da publicación desta resolución no Diario Oficial de Galicia, a posesión de tal competencia en Fides/expedient-e, na epígrafe de «Outros méritos», e deberán acreditar documentalmente, no mesmo prazo, mediante certificación orixinal ou copia compulsada dirixida á mesma unidade de validación en que presentou a solicitude de participación, a posesión de tal habilitación.
Os/as profesionais que tendo optado a algún destes postos non acreditasen na forma e no prazo expostos as condicións exixidas para o seu desempeño, non poderán resultar adxudicatarios deles.
Santiago de Compostela, 18 de marzo de 2019
Margarita Prado Vaamonde
Directora xeral de Recursos Humanos
