A Consellería de Política Social convocou no ano 2018, a través da Orde do 24 de xullo de 2018 (DOG núm. 148, do 3 de agosto) as bases do procedemento de concesión de axudas as corporacións locais para o investimento en centros de inclusión e emerxencia social e a inclusión social da poboación xitana, inmigrante e outras persoas en risco de exclusión, e procédese á súa convocatoria para os anos 2018 e 2019 (cofinanciada parcialmente polo Fondo Social Europeo e polo Fondo Europeo de Desenvolvemento Rexional no marco dos programas operativos FSE Galicia 2014-2020 e Feder Galicia 2014-2020).
De conformidade co artigo 18 da antedita orde, a resolución dos expedientes de axudas corresponde, por delegación, ao director xeral de Inclusión Social.
As resolucións das solicitudes sometidas a un procedemento de concorrencia competitiva estarán motivadas e indicarán a puntuación acadada no proceso de valoración. Coa notificación ao beneficiario informarase das condicións da axuda, de conformidade co establecido nos artigos 125.3.c) e d), 125.4.a) e 67.6) do Regulamento (UE) nº 1303/2013 do Parlamento Europeo e do Consello, do 17 de decembro de 2013, no artigo 10 do Regulamento de execución (UE) nº 1011/2014 da Comisión, do 22 de setembro de 2014, e no anexo III do Regulamento delegado (UE) nº 480/2014 da Comisión, do 3 de marzo.
No seu artigo 13 establece que os actos administrativos e a correspondente resolución ditada no procedemento para a concesión de subvencións publicaranse no Diario Oficial de Galicia, de conformidade co establecido no artigo 45 da Lei 39/2015, do 1 de outubro, do procedemento administrativo común das administracións públicas. Esta publicación producirá os efectos de notificación.
Polo exposto,
RESOLVO:
Ordenar a publicación no Diario Oficial de Galicia do contido integro da Resolución do 8 de novembro de 2018, ditada no procedemento BS623C de concesión de axudas as corporacións locais para o investimento en centros de inclusión e emerxencia social e a inclusión social da poboación xitana, inmigrante e outras persoas en risco de exclusión, que se xunta esta resolución no anexo.
Santiago de Compostela, 3 de decembro de 2018
Arturo Parrado Puente
Director xeral de Inclusión Social
ANEXO
Resolución do 8 de novembro de 2018 ditada no procedemento BS623C de concesión de axudas ás corporacións locais para o investimento en centros de inclusión e emerxencia social e a inclusión social da poboación xitana, inmigrante e outras persoas en risco de exclusión
Conforme o establecido no artigo 18 da Orde do 24 de xullo de 2018 pola que se establecen as bases reguladoras de subvencións para o investimento en centros de inclusión e emerxencia social e de programas desenvolvidos polas corporacións locais para a inclusión social da poboación xitana, inmigrante e outras persoas en risco de exclusión e se procede á súa convocatoria para os exercicios 2018-2019, cofinanciada polo Fondo Europeo de Desenvolvemento Rexional e Fondo Social Europeo 2014-2020.
Vista a proposta de aprobación e denegación de subvencións feita pola comisión de valoración con data 6 de novembro de 2018, conforme os artigos 15 e 16 da orde citada e fiscalizada de conformidade pola Intervención Delegada da Consellería de Política Social a proposta de disposición de gasto
RESOLVO:
1º. A concesión de subvencións ás siguintes entidades locais polas seguintes tipoloxías (relación anexo I).
2º. A inadmisión/denegación das solicitudes que se relacionan (relación anexo II).
3º. As contías correspondentes aos programas dirixidos á inclusión sociolaboral de colectivos vulnerables sinalados no artigo 4.1 das bases reguladoras están subvencionadas nun 80 % polo FSE no programa operativo de Galicia 2014-2020, con encaixe no obxectivo temático 9 (promover a inclusión social e loitar contra a pobreza e calquera forma de discriminación); prioridade de investimento 9.1 (a inclusión activa, tamén con vistas a promover a igualdade de oportunidades, así como a participación activa e a mellora da posibilidade de encontrar un emprego); obxectivo específico 9.1.1 (mellorar a inserción socio-laboral de persoas en situación ou risco de exclusión social, a través da activación e de itinerarios integrados e personalizados de inserción). As contías correspondentes ás actuacións do artigo 4.3, de investimento en centros de inclusión e emerxencia social, están subvencionadas nun 80 % polo Feder dentro do programa operativo de Galicia 2014/2020, con encaixe no obxectivo temático 9 (promover a inclusión social e loitar contra a pobreza e calquera forma de discriminación); prioridade de investimento 9.7 (investimento en infraestruturas sociais e sanitarias que contribúan ao desenvolvemento nacional, rexional e local e reduzan as desigualdades sanitarias, e o fomento da inclusión social mediante unha mellora do acceso aos servizos sociais, culturais e recreativos e a transición dos servizos institucionais aos servizos locais); obxectivo específico 9.7.1 (investimento en infraestrutura social e sanitaria que contribúa ao desenvolvemento nacional, rexional e local, e reduza as desigualdades sanitarias e transición dos servizos institucionais aos servizos locais); actuación CPSO 9.7.1.2 (axudas para o investimento en centros de inclusión social e en centros de menores para a adaptación ás necesidades funcionais); categoría de intervención CE055_outra infraestrutura social que contribúa ao desenvolvemento rexional e social e deberán cumprir as normas establecidas no Regulamento UE 1303/2013 do Parlamento Europeo e do Consello, do 17 de decembro de 2013, polo que se establecen disposicións comúns relativas ao Fondo Europeo de Desenvolvemento Rexional, ao Fondo Social Europeo, ao Fondo de Cohesión, ao Fondo Europeo de Desenvolvemento Rural e ao Fondo Europeo Marítimo e da Pesca, e polo que se establecen disposicións xerais relativas ao Fondo Europeo de Desenvolvemento Rexional, ao Fondo Social Europeo, ao Fondo de Cohesión e ao Fondo Europeo Marítimo e da Pesca, e se derroga o Regulamento (CE) núm, 1083/2006 do Consello, nos regulamentos UE 1301/2013, e 1304/2013 do Parlamento Europeo e do Consello, do 17 de decembro de 2013, sobre o Fondo Europeo de Desenvolvemento Rexional e Fondo Social Europeo, polo que se derroga o Regulamento (CE) nº 1081/2006, do Consello e nas normas de subvencionabilidade ditadas pola autoridade de xestión para o período 2014-2020.
4º. O método utilizado para a estimación dos custos será, para aquelas axudas subvencionadas polo FSE, de baremos estándar de custos unitarios e no caso das axudas financiadas por Feder será o de custos reais a través da conta xustificativa.
5º. A aceptación da subvención implica a aceptación da inclusión das persoas beneficiarias na lista de operacións que se publicará co contido previsto no anexo XII do Regulamento (UE) núm. 1303/2013, así como na Base de datos nacional de subvenciones (BDNS).
6º. A recepción deste documento implica aceptar a obriga de aplicar medidas antifraude eficaces e proporcionadas no seu ámbito de xestión e cumprir a normativa comunitaria, estatal e autonómica de aplicación, en particular, a normativa en materia de subvencións (RDC art. 125.4.c). A detección de feitos que puidesen ser constitutivos de fraude ou irregularidade serán comunicados ao Servizo Nacional de Coordinación Antifraude (SNCA) nos termos establecidos na Comunicación 1/2017 do SNCA, do 6 de abril, sobre a forma na cal poden proceder as persoas que teñan coñecemento de feitos que puidesen ser constitutivos de fraude ou irregularidade en relación con proxectos ou operacións financiados total ou parcialmente con cargo a fondos procedentes da Unión Europea.
7º. Dispón de 10 días para comunicar a súa aceptación. No caso de non comunicación entenderase tacitamente aceptada en todas as súas condicións.
8º. O pagamento das axudas farase de acordo co establecido no artigo 25 da orde de convocatoria.
As entidades beneficiarias deberán xustificar cada anualidade de xeito independente. O primeiro período comprende as actuacións realizadas entre o 1 de xullo de 2018 ata o 30 de novembro e presentarase con data límite do 5 de decembro de 2018. O segundo período comprende as actuacións realizadas entre o 1 de decembro de 2017 e o 31 de outubro de 2019 e a xustificación presentarase con data límite do 5 novembro de 2019.
9º. En xeral as axudas concedidas condicionaranse ao cumprimento das obrigas establecidas na orde, polo que deberá:
a) Executar e acreditar a realización da actuación que fundamenta a concesión da subvención e o cumprimento dos requisitos e das condicións desta ante o órgano concedente. En todo caso, as actuacións prestaranse de acordo co establecido na Carteira de servizos sociais de inclusión definida no Decreto 61/2016, do 11 de febreiro, en todos os aspectos que sexan de aplicación.
b) Manter un sistema de contabilidade separado en relación con todas as transaccións relacionadas coa operación. No caso das subvencións financiadas polo programa operativo FSE Galicia 2014-2020, manter de forma separada na contabilidade o ingreso da axuda percibida.
c) En todo caso, respecto das axudas cofinanciadas co programa operativo FSE Galicia 2014-2020 ou Feder, deberán conservar toda a documentación relativa á subvención durante un período de tres anos que se contará a partir do 31 de decembro seguinte á presentación das contas nas cales estean incluídos os gastos da operación perante a Comisión Europea. O comezo deste prazo será oportunamente comunicado pola Dirección Xeral de Política Financeira, Tesouro e Fondos Europeos.
d) Os beneficiarios comprométense a asumir a responsabilidade de adoptar as medidas necesarias para facer chegar ao publico información sobre as operacións financiadas polo programa operativo Feder/FSE de acordo co estipulado no artigo 2.2 do anexo XII do Regulamento (UE) nº 1303/2013 do Parlamento Europeo e do Consello de 17 de decembro de 2013. En particular, deberán facer constar en todo tipo de publicidade e información das actuacións realizadas, a condición de subvencionadas pola Consellería de Política Social, de ser o caso, polo Feder 2014/2020 ou PO FSE Galicia 2014-2020 segundo ou establecido no anexo XII do Regulamento (UE) nº 1303/2013 do Parlamento Europeo e do Consello do 17 de decembro de 2013. En todas as medidas de información e comunicación que leve a cabo, o beneficiario deberá recoñecer o apoio recibido ao proxecto, no cal deberá figurar o emblema da Unión e unha referencia á Unión Europea, referencia ao fondo Feder ou FSE que dá apoio ao proxecto e aos lemas dos fondos. Durante a realización do proxecto e durante o período de duración dos compromisos de mantemento do investimento ou emprego informarase do apoio dos fondos a través dun cartel dun tamaño mínimo A3 nun lugar destacado e visible. Tamén se informará na páxina web, no caso de dispoñer dela, sobre a actuación e a axuda financeira recibida da Unión Europea e sobre os obxectivos e resultados da operación financiada. As características técnicas para a exhibición do emblema da Unión e referencia ao Fondo deberán axustarse ao establecido nos artigos 3, 4 e 5 do Regulamento de execución (UE) nº 821/2014 da Comisión do 28 de xullo de 2014, pola que se establecen disposicións de aplicación do Regulamento (UE) nº 1303/2013 do Parlamento Europeo e do Consello no cal se refire ás modalidades concretas de transferencia e xestión das contribucións do programa, a presentación de información sobre os instrumentos financeiros, as características técnicas das medidas de información e comunicación das operacións, e o sistema para o rexistro e almacenamento de datos.
e) Informar, de ser o caso, as persoas destinatarias de que as actuacións nas cales participan están financiadas pola Xunta de Galicia, a través da Consellería de Política Social, e no seu caso cofinanciadas polo Feder e/ou programa operativo FSE Galicia 2014-2020, así como dos obxectivos dos fondos, figurando os emblemas como mínimo nos partes de asistencia/participación, enquisas de avaliación ou certificados de asistencia.
f) Adecuar a metodoloxía das actuacións, así como a de recollida e proceso de datos de seguimento e acreditación da realización da actividade de persoas beneficiadas ás fórmulas que, de ser o caso, propoña a Consellería de Política Social e, se así é requirido, incorporarse como usuarias da aplicación informática deseñada e implantada para a xestión da Estratexia de inclusión social de Galicia 2014-2020. Así mesmo, deberán realizar as actuacións precisas para recoller información suficiente relativa ao desenvolvemento das actuacións que permita dar cumprimento aos requisitos de información a través de indicadores de produtividade e resultados enumerados non artigo 5 do Regulamento (UE) nº 1304/2013 do Parlamento Europeo e do Consello, do 17 de decembro de 2013. Os indicadores de produtividade relativos á persoa solicitante refírense á data inmediatamente anterior ao inicio da vinculación do participante coas actuacións subvencionadas, mentres que os indicadores de resultado inmediato deberán referirse ao período comprendido entre o día posterior á finalización da súa vinculación coa operación e ás catro semanas seguintes, no período de xustificación da correspondente subvención.
Así mesmo, a Administración poderá requirir novos datos no prazo de seis meses desde que finalice a vinculación do participante coa actividade cofinanciada, coa finalidade de formalizar os indicadores de resultado a longo prazo descritos no antedito regulamento. Para estes efectos, seralles facilitado o acceso á aplicación informática Participa 1420. Polo que respecta aos indicadores de produtividade relativos ás axudas de investimento en centros de inclusión e emerxencia social financiadas con Feder, realizarase un reconto global da capacidade máxima de persoas para as que está deseñado o centro e no caso de adquisición de equipamento de uso social, farase unha estimación da poboación beneficiaria durante a súa vida útil.
g) Axustarse na execución das accións aos obxectivos que no seu caso estableza a Consellería de Política Social a través da Dirección Xeral de Inclusión Social. En particular, e coa periodicidade coa que sexa requirida, deberá comunicar á Dirección Xeral de Inclusión Social o cumprimento das accións subvencionadas polas persoas participantes, comunicación na cal se fará constar toda a información precisa para dar cumprimento aos requirimentos de información asociados aos indicadores de produtividade e de resultado do FSE e Feder. En particular e, con respecto ás persoas participantes, solicitará información sobre os indicadores de produtividade e resultado para FSE. Para a acreditación deste extremo, a entidade deberá solicitar e custodiar unha declaración das persoas participantes ou outra documentación análoga que lle permita responsabilizarse da súa declaración conxunta perante a Dirección Xeral de Inclusión Social. Esta mesma obriga contraerase cos servizos sociais comunitarios de referencia da persoa participante, cando sexa solicitado para o seguimento da súa intervención social.
h) As infraestruturas e equipamentos subvencionados deberán permanecer destinadas ao fin concreto para o cal se concedeu por un período de cinco anos desde o pagamento final ao beneficiario, segundo establece o artigo 71 do Regulamento (UE) nº 1303/2013 do Parlamento Europeo e do Consello, do 17 de decembro de 2013 ao que se remite o artigo 7 da Orde HFP/1979/2016, de 29 de decembro. O incumprimento deste requisito dará lugar á revogación da subvención, co reintegro das cantidades percibidas, e á exixencia dos xuros de mora legalmente establecidos desde o momento do pagamento da subvención, segundo o establecido no artigo 26.
i) Comunicar as variacións das datas de inicio e remate das actuacións previstas na solicitude, así como os informes e demais documentación que reclamen os órganos competentes da Consellería de Política Social, en especial, os relativos ao subministro de información nos termos establecidos no artigo 4 da Lei 1/2016, do 18 de xaneiro, de transparencia e bo goberno (Diario Oficial de Galicia núm. 30, de 15 de febreiro), toda a información necesaria para o cumprimento por aquela das obrigas previstas no título I da Lei 1/2016, e certificado no cal se indique o número estimado da poboación beneficiada pola actuación no período subvencionado pola orde de convocatoria.
j) Controlar a asistencia ás accións formativas e expedir certificado de aproveitamento para os participantes que teñan asistido como mínimo ao 60 % do total das súas horas.
k) Solicitar, de ser o caso, á Dirección Xeral de Inclusión Social, a autorización das modificacións que afecten ás actuacións subvencionadas cunha antelación de cinco días á data na cal se produzan.
l) Remitir no prazo de dez días os informes e demais documentación que reclamen os órganos competentes da Consellería de Política Social.
m) Someterse ás actuacións de comprobación e control e facilitar toda a información requirida pola Dirección Xeral de Inclusión Social, e ás verificacións dos organismos implicados na xestión e seguimento do PO FSE Galicia 2014-2020 e Feder, incluídas as visitas sobre o terreo, que se establezan en aplicación dos artigos 72, 73 e 74 do Regulamento (UE) núm. 1303/2013 do Parlamento Europeo e do Consello, do 17 de decembro, así como pola Intervención Xeral da Comunidade Autónoma, o Consello de Contas, o Tribunal de Contas, e outros órganos de control impostos pola normativa comunitaria no exercicio das súas funcións de fiscalización e control.
n) Contratar un seguro para o alumnado ou participantes nas actuacións que cubra os riscos que poidan ter durante o desenvolvemento das actividades como nos desprazamentos para a asistencia a elas.
o) Proceder ao reintegro dos fondos percibidos, total ou parcialmente, no suposto de incumprimento das condicións establecidas para a súa concesión ou nos supostos previstos no título II da Lei 9/2007, do 13 de xuño.
p) A detección de irregularidades pode implicar a aplicación de correccións financeiras e a solicitude de devolución dos importes percibidos indebidamente, xunto cos correspondentes xuros de mora. As irregularidades detectadas no gasto xustificado do beneficiario reducirán a axuda Feder da operación.
q) Someterse ás actuacións de control e análise de riscos que poida efectuar a autoridade de xestión do programa operativo e, de ser o caso, os órganos competentes do organismo intermedio con axuda de ferramentas informáticas específicas da Unión Europea, en particular a aplicación informática Arachne.
r) O beneficiario deberá introducir os datos e os documentos dos que sexa responsable, así como todas as súas posibles actualizacións, nos sistemas de intercambio electrónico de datos de acordo ás especificacións determinadas na convocatoria de axudas, en cumprimento do artigo 122, punto 3, parágrafo primeiro, do Regulamento (UE) nº 1303/2013 e o artigo 10.1 do Regulamento 1011/2014, do 22 de setembro de 2014.
s) Todas aquelas obrigas e requisitos que se desprendan do articulado da orde e da Lei 9/2007, do 13 de xuño, e da súa normativa de desenvolvemento.
Contra a resolución, que esgota a vía administrativa, pode interpoñerse recurso contencioso administrativo ante o Tribunal Superior de Xustiza de Galicia no prazo de dous meses a partir do día seguinte ao da notificación da resolución e, potestativamente, e con anterioridade á interposición do referido recurso contencioso-administrativo, poderá interpoñerse recurso de reposición ante o órgano que ditou o acto no prazo dun mes a partir do día seguinte ao da notificación da dita resolución; neste caso, non poderá interpoñerse recurso contencioso administrativo ata que sexa resolto, expresamente ou por desestimación presunta, o recurso de reposición.
Santiago de Compostela, 8 de novembro de 2018. O/a conselleiro/a de Política Social. Por Delegación Orde do 24 de xullo de 2018. DOG núm. 148, do 3 de agosto de 2018. O director xeral de Inclusión Social, Arturo Parrado Puente.
