Para os efectos previstos no artigo 15.5.a) e no artigo 41 do Real decreto 815/2013, do 18 de outubro, polo que se aproba o Regulamento de emisións industriais e de desenvolvemento da Lei 16/2002, do 1 de xullo, de prevención e control integrados da contaminación (BOE núm. 251, de 19 de outubro de 2013), faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedarán expostos os documentos titulados:
– Solicitude de modificación substancial da autorización ambiental integrada (expediente 2018-IPPC-M-94) para a implantación dunha instalación de coincineración (planta de gasificación e combustión) de fariñas de carne e óso de categoría 1, para o aproveitamento do sintegás nos termoxidores actuais
Proxecto básico
Queixas-Cerceda (A Coruña)
Outubro 2018.
– Solicitude de modificación substancial da autorización ambiental integrada (expediente 2018-IPPC-M-94) para a implantación dunha instalación de coincineración (planta de gasificación e combustión) de fariñas de carne e óso de categoría 1, para o aproveitamento do sintegás nos termoxidores actuais
Resumo non técnico
Queixas-Cerceda (A Coruña)
Outubro 2018.
– Proxecto técnico e proxecto de explotación para a valorización do residuo de fariñas de carne e óso de categoría 1, mediante instalación dunha planta de coincineración (planta de gasificación e combustión) para o aproveitamento do sintegás nos termoxidores existentes na instalación actual.
Gestora de Subproductos de Galicia, S.L., lugar de Areosa, s/n, Queixas-Concello de Cerceda.
Para que calquera interesado poida consultalos e, se for o caso, formular no citado prazo as alegacións, suxestións ou observacións que coide oportunas, os documentos poderán consultarse:
– Na Dirección Xeral de Calidade Ambiental e Cambio Climático, Servizo de Prevención e Control Integrados da Contaminación (rúa de San Lázaro, s/n, 15781 Santiago de Compostela), en horario de atención ao público.
– Na páxina web da Consellería de Medio Ambiente, Territorio e Vivenda (http://cmatv.xunta.gal>>medio ambiente e sostibilidade>>prevención e control de actividades>>autorización ambiental integrada>>proxectos en información pública).
As alegacións, suxestións ou observacións dirixiranse ao Servizo de Prevención e Control Integrados da Contaminación.
Santiago de Compostela, 6 de novembro de 2018
María Cruz Ferreira Costa
Directora xeral de Calidade Ambiental e Cambio Climático
ANEXO I
Memoria resumo
Clave do expediente: 2018-IPPC-M-94.
Peticionaria: Gestora de Subproductos de Galicia, S.L.
CIF: B15862667.
Enderezo social: lugar Areosa, s/n, Queixas, 15186 A Coruña.
Localización da instalación: lugar Areosa, s/n, Queixas, 15186 A Coruña. Un punto de localización da planta é o definido polas coordenadas UTM (fuso 29, DATUM ETRS89): X: 543550, Y: 4775694.
Actividade: planta de tratamento de subprodutos cárnicos.
Descrición da modificación: o proxecto consiste na instalación dunha planta de coincineración de fariñas de carne e óso de categoría 1, para o aproveitamento enerxético das fariñas como combustible. O gas de síntese (syngas), obtido por gasificación das fariñas, introducirase nos oxidadores térmicos actuais aproveitándose o calor nas caldeiras de recuperación instaladas actualmente para xerar o vapor que demandan as plantas de transformación de subprodutos de categorías 1 e 2. A planta de gasificación terá unha superficie construída de 331,5 m2, e irá anexa á actual nave de procesado de subproduto de categoría 1 do complexo industrial.
O gasificador que se vai instalar terá unha capacidade de 1,3 toneladas/hora e unha potencia térmica total esperada de 10 MWt.
O titular declara que todas as augas residuais que se poidan xerar no módulo de coincineración serán conducidas á actual planta de transformación de categoría 1, onde irán a un depósito con capacidade para 30 m3 en espera de ser incorporadas ao proceso a través de esterilización, xunto co resto de subprodutos, polo que non se producirán modificacións nas calidades e cantidades de vertido actuais.