Para os efectos previstos no artigo 16 do Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación (BOE núm. 316, do 31 de decembro) faise público que, por espazo de 30 días hábiles contados a partir do seguinte ao da publicación deste anuncio no Diario Oficial de Galicia, quedará exposto o documento titulado:
– Proxecto básico de solicitude de autorización ambiental integrada aplicada ás instalacións de Alumisel, S.A.U., situadas no Porriño (Pontevedra).
Para que calquera interesado poida consultalos e, de ser o caso, formular dentro do dito prazo as alegacións, suxestións ou observacións que considere convenientes. Os documentos poderán consultarse:
– Na Dirección Xeral de Calidade Ambiental e Cambio Climático, Servizo de Prevención e Control Integrados da Contaminación (rúa de San Lázaro, s/n, 15781 Santiago de Compostela), en horario de atención ao público;
– Na páxina web da Consellería de Medio Ambiente e Ordenación do Territorio (http://cmaot.xunta.gal>>medio ambiente e sostibilidade>>prevención e control de actividades>>autorización ambiental integrada>>proxectos en información pública).
As alegacións, suxestións ou observacións dirixiranse ao Servizo de Prevención e Control Integrados da Contaminación.
Santiago de Compostela, 13 de xuño de 2018
María Cruz Ferreira Costa
Directora xeral de Calidade Ambiental e Cambio Climático
ANEXO
Memoria resumo
Titular: Alumisel, S.A.U., no Porriño (Pontevedra).
CIF: A36058634.
Domicilio social: Polígono Industrial das Gándaras, A Granxa, s/n, O Porriño (Pontevedra).
Localización da instalación: Polígono da Granxa (Budiño) s/n, O Porriño (Pontevedra).
Actividade: recepción, reciclaxe e recuperación de metais e de compostos metálicos.
Procesos: as liñas principais de tratamento comprenden o almacenamento de residuos perigosos na instalación (recepción e almacenamento dos residuos no espazo habilitado para iso previamente á súa expedición a xestor autorizado), valorización de residuos non perigosos consistentes en residuos férricos e non férricos mediante a súa clasificación, prensaxe, cizalladura ou fragmentación (pretrituración, trituración e proceso de clasificación), e valorización de vehículos fóra de uso (recepción de vehículos, descontaminación do vehículo fóra de uso e entrega dos residuos a xestor autorizado).
Verteduras: a instalación verte augas pluviais (procedentes das cubertas das naves; éstas son vertidas directamente á rede de saneamento do polígono), augas pluviais con posible contaminación por hidrocarburos (procedentes do escorremento das augas pluviais na superficie da instalación; previamente á súa vertedura á rede de saneamento, trátanse por separadores de hidrocarburos) e augas asimilables a uso doméstico (procedentes dos sanitarios da caseta de servizos; unhas vértense directamente á rede de saneamento das augas residuais do polígono e outras son almacenadas nun pozo séptico).