O Pleno da Corporación do Concello de Vila de Cruces, en sesión extraordinaria urxente do día 20 de marzo de 2018, adoptou o seguinte acordo:

Primeiro. Aprobar definitivamente a alteración da cualificación xurídica dos inmobles sitos na parcela con referencia catastral 8282924NH6388S, que linda coa rúa Costa das Carretillas, núcleo urbano de Vila de Cruces, actualmente vinculado ao servizo educativo como «vivendas dos mestres»; para os efectos de ser destinado en diante a centro sociocultural e pista de pádel; como mutación demanial interna ou obxectiva, sen que supoña cambio da súa natureza de ben de dominio público, afecto a un servizo público.

Segundo. Aprobar de acordo co disposto no artigo 42.5 da Lei 2/2016, do solo de Galicia, o cambio de uso previsto no planeamento urbanístico dos citados terreos, pasando de equipamento público de uso educativo a equipamento público de uso deportivo e sociocultural, respectivamente, mantendo o seu carácter público, segundo se describe na memoria subscrita pola técnico medio en urbanismo municipal do 22 de xaneiro de 2018.

Terceiro. Publicar o presente acordo no Diario Oficial de Galicia, e no Boletín Oficial da provincia de Pontevedra, e comunicalo á Dirección Xeral de Ordenación do Territorio e Urbanismo da Consellería de Medio Ambiente e Ordenación do Territorio, para os efectos da súa inclusión nos sistemas de información urbanística da Comunidade Autónoma.

Vila de Cruces, 20 de marzo de 2018

Jesús Otero Varela
Alcalde