Unha vez aprobado o programa de actividades formativas da Escola Galega de Administración Pública (EGAP) para o ano 2018 polo Consello Reitor, de conformidade co artigo 6.2 da Lei 4/1987, do 27 de maio, de creación da EGAP, procede convocar as actividades de formación para o persoal ao servizo da Administración local de Galicia do ano 2018 que se detallan nos anexos desta resolución.

RESOLVO:

Convocar as actividades formativas que figuran no anexo II, que se deberán desenvolver segundo as bases detalladas no anexo I.

Santiago de Compostela, 27 de febreiro de 2018

Sonia Rodríguez-Campos González
Directora da Escola Galega de Administración Pública

ANEXO I
Bases

Primeira. Requisitos dos participantes

Poderán participar nas accións formativas convocadas nesta resolución os empregados públicos e as empregadas públicas ao servizo das entidades locais da Comunidade Autónoma de Galicia, así como os/as funcionarios e funcionarias da Administración local con habilitación de carácter nacional que estean prestando servizos noutras administracións públicas de Galicia, que se encontren en situación de servizo activo, permiso por maternidade, adopción ou acollemento ou excedencia polo coidado dun/dunha fillo/a ou dun/dunha familiar e que reúnan os requisitos establecidos nesta convocatoria e para cada un dos casos no anexo II.

Toda persoa solicitante que ao inicio do curso estea en situación de baixa laboral por incapacidade temporal quedará automaticamente excluída da listaxe do persoal seleccionado. Esta incidencia deberá ser comunicada á EGAP con carácter inmediato.

Segunda. Desenvolvemento das actividades de formación

Os cursos realizaranse cos requirimentos, duración e condicións que para cada un deles se indiquen na convocatoria. A información relativa ao desenvolvemento das actividades, así como as súas posibles modificacións, será actualizada e ampliada na páxina web https://egap.xunta.gal

Terceira. Solicitudes

1. O prazo de presentación de solicitudes será de dez días naturais contados a partir do seguinte ao da publicación desta resolución no Diario Oficial de Galicia.

2. As solicitudes de participación nas actividades formativas só se poderán realizar mediante o formulario de matrícula telemática dispoñible no enderezo https://egap.xunta.gal/matricula desde as 8.00 horas da data de inicio do prazo de presentación de solicitudes e ata as 23.55 horas da data de finalización. As solicitudes entenderanse presentadas unha vez que se complete correctamente o proceso de matriculación.

3. O número máximo de cursos que se poden solicitar limítase a cinco.

4. Non está permitida a realización de actividades de formación que teñan simultaneidade de horarios nunha o varias sesións presenciais das actividades. Cando o/a alumno/a teña coñecemento de que foi seleccionado/a para un curso que teña coincidencia horaria con outro en que xa foi seleccionado/a debe renunciar a un deles. No caso de que se comprobe con posterioridade que se realizaron simultaneamente varias actividades, non se lle expedirá certificación de ningunha delas, e pasará ao final das listaxes de todas as actividades formativas que solicite e cuxo prazo de matrícula comece dentro do ano seguinte contado desde que se detecte o feito.

5. Serán excluídas automaticamente aquelas solicitudes que non se axusten ao formulario de solicitude, non teñan cubertos correctamente os datos precisos para realizar o proceso de selección ou sexan presentadas fóra de prazo.

6. As persoas que oculten ou falseen datos esenciais para a selección serán automaticamente excluídas das actividades solicitadas e pasarán ao final das listas de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.

7. As persoas interesadas en recibir mensaxes sobre o proceso de selección deberán facilitar un enderezo de correo electrónico e/ou un número de teléfono móbil.

8. As persoas solicitantes de actividades impartidas na modalidade de teleformación deberán dispor dunha conta de correo electrónico cuxo enderezo terán que indicar na solicitude e dun equipo informático que cumpra os seguintes requisitos técnicos:

– Un ordenador con conexión á internet.

– Un navegador web co plugin de flash.

9. As persoas que necesiten acreditar circunstancias específicas (maternidade, discapacidade, etc.) de acordo cos criterios de selección deberanlle remitir á EGAP a correspondente documentación complementaria, xunto cunha copia do formulario da matrícula, ao enderezo de correo electrónico xestion.egap@xunta.gal, sen prexuízo do previsto no artigo 16.4 da Lei 39/2015, do 1 de outubro, do procedemento administrativo común das Administracións públicas (BOE núm. 236, do 2 de outubro). Esta documentación deberase enviarse por unha única das vías indicadas; no caso contrario só serán considerados os datos achegados por correo electrónico. A documentación deberase presentar dentro do prazo sinalado no punto 1 desta base.

10. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través dos números de teléfono 981 54 62 57 e 981 54 62 54 e do enderezo de correo electrónico xestion.egap@xunta.gal

Cuarta. Criterios de selección

1. Os criterios selectivos que serán empregados son os sinalados con carácter xeral na Resolución da Escola Galega de Administración Pública do 4 de xaneiro de 2008 (DOG núm. 7, do 10 de xaneiro).

Para os efectos do previsto no punto segundo da citada resolución, o baremo que se empregará para a selección establécese sobre unha base de 100 puntos, dos cales o 60 % estará vinculado ao número de horas de formación recibidas nos dous últimos anos e o 40 % restante á antigüidade na Administración.

Os empates desfaranse de acordo co resultado do sorteo a que se refire o artigo 9 do Regulamento de selección de persoal da Administración da Comunidade Autónoma de Galicia, aprobado polo Decreto 95/1991, do 20 de marzo (DOG núm. 58, do 25 de marzo). Para o ano 2018, segundo a Resolución da Consellería de Facenda do 16 de xaneiro (DOG núm. 19, do 26 de xaneiro), comezarase pola letra G.

2. No caso de que non haxa un suficiente número de solicitantes que cumpran os requisitos do curso poderase completar o número de alumnos/as asignado mediante a apertura dun novo prazo público na páxina web da EGAP.

Quinta. Publicación das relacións do alumnado seleccionado

1. A EGAP publicará no enderezo https://egap.xunta.gal unha relación das persoas seleccionadas para participar no dito curso, así como un número adecuado de reservas de acordo co disposto no artigo 45.1.b) da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

O prazo de presentación de alegacións será de cinco días naturais desde a súa publicación.

Entenderase que as persoas que non figuren na relación foron excluídas por algunha das razóns expresadas nas bases da convocatoria ou ocupan un posto máis afastado na listaxe de agarda.

2. Transcorrido o prazo de alegacións, a EGAP publicará no enderezo <https://egap.xunta.gal> a listaxe definitiva de persoas admitidas no curso.

Sexta. Cambios ou substitucións na selección, renuncia, asistencia e puntualidade

1. Os cambios ou as substitucións na selección:

En ningún caso serán admitidos cambios ou substitucións entre as persoas seleccionadas.

2. A renuncia:

a) As persoas seleccionadas só poderán renunciar á actividade formativa:

– Por causa de forza maior suficientemente acreditada.

– Por necesidades do servizo debidamente motivadas por parte das persoas responsables dos centros directivos.

– Por outras causas xustificadas documentalmente.

b) A renuncia debe ser comunicada por escrito á Escola Galega de Administración Pública cunha antelación mínima de tres días naturais anteriores ao inicio da actividade formativa. Na páxina web da escola está dispoñible un modelo de renuncia.

Para isto poderase utilizar preferentemente o enderezo de correo electrónico xestion.egap@xunta.gal, ademais do previsto no artigo 16.4 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

c) As persoas que incumpran o previsto nas alíneas a) e b) pasarán ao final das listas de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

3. A asistencia e a puntualidade:

a) Son obrigatorias a asistencia ás sesións da actividade formativa e mais a puntualidade.

b) Durante a actividade formativa terá lugar un control permanente de asistencia e puntualidade, incluídos controis extraordinarios.

c) As faltas de asistencia nas actividades presenciais:

1. Non poden superar en ningún caso o 10 % das horas lectivas presenciais. En todo caso, as faltas de asistencia deberanse xustificar documentalmente ante as persoas responsables da actividade formativa nun prazo máximo de 10 días contados a partir do día da finalización desta actividade. As persoas que incumpran o antedito perderán o dereito ao certificado de participación na actividade formativa.

2. Aquelas persoas cuxas faltas de asistencia superen o 50 % das horas lectivas presenciais pasarán ao final das listaxes de agarda de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

d) Seguimento das actividades de teleformación:

As persoas que non completen o 50 % das actividades e tarefas propostas pola titoría pasarán ao final das listaxes de agarda de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

e) Seguimento das actividades impartidas na modalidade mixta:

As faltas de asistencia nas horas presenciais da actividade non poderán superar o 10 % da duración desta. As persoas que incumpran o antedito perderán o dereito ao certificado de participación na actividade formativa.

As persoas que non completen o 50 % das actividades e tarefas propostas pola titoría na parte de teleformación da actividade pasarán ao final das listaxes de agarda de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

Sétima. Realización de probas

a) Para poder superar as actividades de formación, o alumnado deberá superar as probas de avaliación que para os efectos se establezan, tanto na modalidade de teleformación, na mixta, como nos cursos que se impartan de xeito presencial. As probas desenvolveranse con carácter xeral de xeito descentralizado nas sedes que se determinen no comezo de cada actividade.

b) Para poder superar os cursos de teleformación é necesario cumprir unha serie de requisitos obrigatorios na súa totalidade:

– A adecuada realización de todas as actividades que a titoría propoña. Estas deben constar debidamente presentadas nos prazos estipulados na programación didáctica do curso. A non superación das actividades obrigatorias suporá a perda automática do dereito a participar no exame final presencial.

– A superación das probas de avaliación que para os efectos se establezan.

No anexo II desta convocatoria figuran as probas de avaliación previstas, así como as datas e horario en que estas terán lugar. Salvo que se determine outra cousa, nestas actividades as probas de avaliación finais serán presenciais nos lugares e nas datas que se establezan. A EGAP informará a través da súa páxina web e tamén a través da plataforma de teleformación das posibles modificacións das datas e das horas da proba final.

Oitava. Certificados

Para obter o certificado de aproveitamento o alumnado deberá acadar a avaliación positiva do seu profesorado, quen emitirá un informe en que declare apto/a ou non apto/a a cada alumno/a en función do resultado da proba de avaliación.

Novena. Facultades da EGAP

1. A EGAP resolverá aquelas incidencias que se poidan producir no desenvolvemento e na xestión das actividades formativas e pode suprimir algunha, ampliar novas edicións da programación ou programar outras actividades diferentes cando así o exixan as circunstancias que afecten a súa organización ou docencia. Tamén lle corresponde á EGAP prover canto sexa necesario para a execución e o cumprimento desta resolución.

2. A execución material das actividades queda condicionada á existencia de crédito orzamentario adecuado e dispoñible e á autorización correspondente do gasto.

3. No suposto de que o número de admitidos/as sexa inferior ao 50 % das prazas convocadas, a EGAP reserva para si o dereito a suspender, cancelar ou agrupar varias edicións das actividades, caso en que empregará os medios de notificación ás persoas interesadas previstos na normativa vixente.

4. A EGAP poderá modificar os contidos, o desenvolvemento, as datas e os lugares das actividades formativas, así como resolver todas as continxencias que poidan xurdir. Todas as modificacións que afecten o desenvolvemento das actividades serán anunciadas na páxina web da Escola.

5. A EGAP garantirá na totalidade das actividades derivadas desta convocatoria a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.

ANEXO II

Código	Denominación	Prazas	Horas	Cualificación	Valoración	Destinatarios/as	Localidade/ Modalidade	Datas	Data da proba de avaliación	Horario
Réxime xurídico e xestión das entidades locais
LO18003	Aplicación dos sistemas de información xeográfica no ámbito local	25	25	Aproveitamento	----	Persoal ao servizo das entidades locais da Comunidade Autónoma de Galicia.	Presencial Santiago	2.4.2018 13.4.2018	13.4.2018 19.30 h	16.30 a 20.30 h
LO18004	As intervencións administrativas en materia de urbanismo	30	30	Aproveitamento	Estatal: 0,45 Autonómica: 0,30	Persoal ao servizo das entidades locais da Comunidade Autónoma de Galicia.	Presencial Santiago	15.10.2018 25.10.2018	25.10.2018 18.30 h	16.30 a 20.30 h
LO18005	As relacións de postos de traballo na Administración local	30	25	Aproveitamento	Estatal: 0,50 Autonómica: 0,30	– Persoal funcionario con habilitación de carácter nacional que estea prestando servizos na Administración local ou noutras administracións públicas de Galicia. – Persoal ao servizo das entidades locais de Galicia.	Presencial Santiago	12.11.2018 21.11.2018	21.11.2018 18.30 h	16.30 a 20.30 h
LO18006	Auditoría no sector público local	25	15	Aproveitamento	Estatal: 0,50	– Persoal funcionario con habilitación nacional. – Persoal funcionario da escala de Administración xeral das entidades locais que desenvolva os seus posto na área da Intervención. Persoal das corporacións locais da Comunidade Autónoma de Galicia.	Presencial Santiago	2.4.2018 18.4.2018	18.4.2018 18.30 h	16.30 a 19.30 h
LO18007	Contabilidade pública local. Nivel I	25	20	Aproveitamento	Estatal: 0,50	– Persoal funcionario pertencente á subescala de secretarios interventores da Administración local. – Persoal funcionario e laboral da Administración local con competencias en materia contable.	Presencial Santiago	7.5.2018 23.5.2018	23.5.2018 18.30 h	16.30 a 19.30 h
LO18008	Elaboración de pregos de cláusulas administrativas e de prescricións técnicas na Administración local	50	30	Aproveitamento	Estatal: 0,50	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	22.10.2018 20.11.2018	23.11.2018	Proba de avaliación 16.30 h
LO18009	Extinción e liquidación de entes municipais. Remunicipalización dos servizos sociais	50	30	Aproveitamento	Estatal: 0,50 Autonómica: 0,30	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	22.10.2018 20.11.2018	23.11.2018	Proba de avaliación 19.00 h
LO18010	Guías prácticas de exercicio da función interventora en pequenos e medianos concellos	35	30	Aproveitamento	Estatal: 0,55	Persoal funcionario pertencente á escala de interventores de concellos de menos de 20.000 habitantes, secretarios interventores e técnicos de servizos económicos dos subgrupos A1 e A2.	Mixto: 12 h presenciais e 18 h teleformación	10.10.2018 8.11.2018 Clases presenciais: 15, 22 e 29 de outubro e 5 de novembro das 16.30 ás 19.30	14.11.2018	Proba de avaliación 19.00 h
LO18011	Lei 39/2015, do 1 de outubro, do procedemento administrativo común das administracións públicas	50	25	Aproveitamento	Estatal 0,50	Persoal ao servizo das entidades locais de Galicia.	Teleformación	25.5.2018 18.6.2018	21.6.2018	Proba de avaliación 16.30 h
LO18011	Lei 39/2015, do 1 de outubro, do procedemento administrativo común das administracións públicas	50	25	Aproveitamento	Estatal: 0,50	Persoal ao servizo das entidades locais de Galicia.	Teleformación	1.10.2018 25.10.2018	30.10.2018	Proba de avaliación 17.30 h
LO18012	Lei 40/2015, do 1 de outubro, de réxime xurídico do sector público	50	25	Aproveitamento	Estatal: 0,50	Persoal ao servizo das entidades locais de Galicia.	Teleformación	3.4.2018 27.4.2018	3.5.2018	Proba de avaliación 19.00 h
LO18012	Lei 40/2015, do 1 de outubro, de réxime xurídico do sector público	50	25	Aproveitamento	Estatal: 0,50	Persoal ao servizo das entidades locais de Galicia.	Teleformación	25.5.2018 18.6.2018	21.6.2018	Proba de avaliación 17.30 h
LO18013	Lei xeral de dereitos das persoas con discapacidade e da súa inclusión social	50	20	Aproveitamento	----	Persoal ao servizo das entidades locais de Galicia.	Teleformación	9.4.2018 27.4.2018	3.5.2018	Proba de avaliación 16.30 h
LO18014	Liquidación práctica dos tributos locais de Galicia	20	15	Aproveitamento	Estatal: 0,40	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo da Administración pública nos concellos e nas deputacións.	Presencial Santiago	28.5.2018 25.6.2018	25.6.2018 18.30 h	16.30 a 19.30 h
LO18015	Persoal laboral temporal na Administración local. Procedementos de consolidación de emprego e funcionarización	50	30	Aproveitamento	Estatal: 0,50 Autonómica: 0,30	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	30.4.2018 28.5.2018	31.5.2018	Proba de avaliación 19.00 h
LO18016	Responsabilidade patrimonial e procedemento sancionador. Especialidades no ámbito local	50	30	Aproveitamento	Estatal: 0,50	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	9.5.2018 7.6.2018	12.6.2018	Proba de avaliación 16.30 h
LO18017	Simplificación administrativa e desburocratización no ámbito local	50	30	Aproveitamento	-----	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	9.5.2018 7.6.2018	12.6.2018	Proba de avaliación 17.30 h
LO18018	Xestión de tesouraría municipal	50	30	Aproveitamento	Estatal: 0,45	– Persoal funcionario con habilitación de carácter nacional que estean prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	26.9.2018 25.10.2018	30.10.2018	Proba de avaliación 16.30 h
Administración electrónica, protección de datos e calidade administrativa
LO18026	A calidade na Administración pública. Procesos e procedementos	50	25	Aproveitamento	---	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	25.5.2018 18.6.2018	21.6.2018	Proba de avaliación 19.00 h
LO18027	Certificado dixital	50	30	Aproveitamento	---	– Persoal funcionario con habilitación de carácter nacional que estean prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	24.9.2018 23.10.2018	26.10.2018	Proba de avaliación 19.00 h
LO18028	Introdución á protección de datos persoais. Regulamento europeo 2016/679 de protección de datos	50	30	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	22.10.2018 20.11.2018	23.11.2018	Proba de avaliación 17.30 h
Comunicación, organización do traballo e mellora das habilidades
LO18019	A calidade da redacción administrativa. Técnicas para mellorala	50	18	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	5.10.2018 22.10.2018	26.10.2018	Proba de avaliación 16.30 h
LO18020	Atención á cidadanía	50	25	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	28.9.2018 22.10.2018	26.10.2018	Proba de avaliación 17.30 h
LO18021	Como deseñar presentacións eficaces	50	20	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	9.4.2018 27.4.2018	3.5.2018	Proba de avaliación 17.30 h
LO18022	Linguaxe administrativa non sexista e imaxe igualitaria na práctica da xestión pública	50	30	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	9.5.2018 7.6.2018	12.6.2018	Proba de avaliación 19.00 h
LO18023	Modelos de comunicación cos residentes: como comunicarse cos residentes que presentan deterioración cognitiva	30	15	Aproveitamento	---	Persoal ao servizo das entidades locais da Comunidade Autónoma de Galicia.	Presencial Santiago	24.4.2018 8.5.2018	8.5.2018 18.30 h	16.30 a 19.30 h
LO18024	Prevención e xestión de conflitos	50	25	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	4.5.2018 28.5.2018	31.5.2018	Proba de avaliación 17.30 h
LO18025	Técnicas elementais de arquivos	50	25	Aproveitamento	---	Persoal ao servizo das entidades locais da Comunidade Autónoma de Galicia.	Teleformación	4.5.2018 28.5.2018	31.5.2018	Proba de avaliación 16.30 h
LO18029	Redacción de documentos técnico-xurídicos en galego	50	15	Aproveitamento	---	– Persoal funcionario con habilitación de carácter nacional que estea prestando servizos na Administración local ou noutra Administración pública de Galicia. – Persoal ao servizo das entidades locais de Galicia.	Teleformación	10.10.2018 24.10.2018	30.10.2018	Proba de avaliación 19.00 h