Antecedentes.

En cumprimento do disposto na disposición adicional primeira da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, o Consello da Xunta de Galicia, na súa reunión do 21 de decembro de 2017, acordou declarar de interese especial varios proxectos de produción de enerxía eléctrica a partir de fontes renovables e as súas infraestruturas de evacuación asociadas.

RESOLVO:

Publicar no DOG a parte expositiva do Acordo do Consello da Xunta do 21 de decembro de 2017 co texto literal seguinte:

«Primeiro. Declarar de especial interese os seguintes proxectos de parques eólicos e das súas liñas de evacuación: Serra do Punago-Vacariza, Pastoriza Rodeiro, Monciro, Pena Forcada-Catasol II, Mouriños, Monte Tourado Eixe, Montes de Abella, Pena Ventosa Reformado, Serra das Penas, Pico Touriñán, Paradela, Cadeira, Sasdónigas Fase I, Sasdónigas Fase II, Neda, A Pastoriza, Carracedo e Singular de Mondoñedo.

Segundo. Esta declaración terá como efectos a tramitación de forma prioritaria e con carácter de urxencia e a redución á metade dos prazos necesarios na instrución do procedemento da autorización administrativa previa e/ou de construción, así como dos prazos na instrución do procedemento de avaliación ambiental que sexa necesario. Así mesmo, reduciranse á metade os prazos necesarios na tramitación do proxecto sectorial».

Santiago de Compostela, 26 de decembro de 2017

Ángel Bernardo Tahoces
Director xeral de Enerxía e Minas