BDNS (Identif.): 382780.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións (http://www.pap.minhap.gob.es/bdnstrans/index)
Primeiro. Entidades beneficiarias
Empresas do sector turístico de Galicia que se agrupen para colaborar e que, polo menos unha delas, estean inscritas, conforme estableza a normativa turística, no Rexistro de Empresas e Actividades Turísticas da Xunta de Galicia (en diante, REAT), de acordo cos artigos 50 e 51 da Lei 7/2011, do 27 de outubro, do turismo de Galicia, que teñan a condición de microempresas e sexan entidades privadas autónomas galegas situadas no ámbito rural de Galicia, constituídas baixo calquera forma xurídica admisible, co obxecto de practicar de maneira efectiva a colaboración na súa actividade comercial, con domicilio social ou sede na Comunidade Autónoma de Galicia.
Tamén poderán ser beneficiarios das subvencións os consorcios, as asociacións e calquera outra forma de personificación xurídica xa constituída, en que estean asociadas as empresas do sector turístico de Galicia e que, polo menos unha delas, estea inscrita no REAT.
Segundo. Obxecto
Fomento da cooperación entre pequenos operadores turísticos para colaboraren na organización de procesos de traballo conxuntos e compartiren recursos de cara ao desenvolvemento e á promoción do turismo.
Os proxectos subvencionables consistirán no deseño, na creación e na promoción de produtos turísticos de Galicia.
Os produtos turísticos terán carácter innovador e deberán axustarse a algunha das liñas temáticas seguintes:
a) Produtos cabeceira de marca de Galicia.
Os produtos cabeceira de marca de Galicia, que poden ser consultados na páxina web oficial de Turismo de Galicia, na epígrafe denominada «experiencias» http://www.turismo.xunta.gal.
– Camiño de Santiago.
– Bosques de Galicia (natureza).
– Mananciais de Galicia (termalismo).
– Paseando entre viñedos (enogastronomía).
– Turismo mariñeiro.
– Ruta das camelias (xardíns de Galicia).
– Faros e praias salvaxes.
– Patrimonio oculto.
– Santuarios máxicos.
b) Produtos destinados á creación de oferta de turismo familiar.
c) Produtos destinados á creación de oferta para o turismo sénior.
d) Produtos destinados á xeración dunha oferta distintiva que se acomode ao concepto «que facer en Galicia cando chove».
e) Produtos innovadores e de descubrimento de novos nichos de mercado.
f) Creación de rutas turísticas innovadoras.
g) Produtos construídos baixo a idea da cultura celta de Galicia.
h) Produtos baseados na creación de fins de semana, pontes ou outros períodos temporais de carácter temático.
i) Produtos que se desenvolvan e valoren turisticamente os núcleos históricos de Galicia.
Terceiro. Bases reguladoras
Resolución do 29 de decembro de 2017 pola que se establecen as bases reguladoras para a concesión, en réxime de concorrencia competitiva, de subvencións á cooperación entre pequenos operadores turísticos para organizar procesos de traballo conxunto e compartir instalacións e recursos, así como para o desenvolvemento e a comercialización do turismo, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se anuncia a súa convocatoria para o ano 2018.
Cuarto. Importe
Contía de 666.667 €, con cargo á aplicación orzamentaria 04 A2 761A 770.0, proxecto 2016 00007, cofinanciada nun 75 % por fondos Feader, nun 22,5 % por fondos propios da Comunidade Autónoma e nun 2,5 % con fondos do Ministerio de Agricultura e Pesca, Alimentación e Medio Ambiente.
Quinto. Prazo de presentación de solicitudes
O prazo de presentación de solicitudes será dun mes contado a partir do día seguinte ao da súa publicación no Diario Oficial de Galicia.
Sexto. Prazo de xustificación da subvención
O prazo para a xustificación da subvención rematará o 1 de outubro de 2018.
Santiago de Compostela, 29 de decembro de 2017
Mª Nava Castro Domínguez
Directora da Axencia Turismo de Galicia
