Para os efectos previstos no Real decreto lexislativo 1/2016, do 16 de decembro, polo que se aproba o texto refundido da Lei de prevención e control integrados da contaminación (BOE núm. 316, do 31 de decembro), e no artigo 36 da Lei 21/2013, do 9 de decembro, de avaliación ambiental (BOE núm. 296, do 11 de decembro), faise público que por espazo de trinta (30) días hábiles, contados a partir do seguinte ao da publicación deste anuncio no Diario Oficial de Galicia, quedará exposto o documento titulado:
«Proxecto básico e estudo de impacto ambiental para solicitar a autorización ambiental integrada dunha ampliación de explotación de galiñas poñedoras campeiras.
Promotora: Ovos Xalo, S.C.
Localización: monte da Graña, Fisteus, Curtis, A Coruña».
Para que calquera interesado poida consultalos e, se é o caso, formular no citado prazo as alegacións, suxestións ou observacións que considere oportunas. O documento estará á disposición dos administrados, en horario de atención ao público, nas seguintes dependencias:
Dirección Xeral de Calidade Ambiental e Cambio Climático, Servizo de Prevención e Control Integrados da Contaminación (rúa de San Lázaro, s/n, 15781 Santiago de Compostela).
Ademais poderán acceder a esta información na páxina web da Consellería de Medio Ambiente e Ordenación do Territorio http://cmaot.xunta.gal/seccion-tema/c/CMAOT_Prevencion_e_control_de_actividades?content=SX_Calidade_Avaliacion_Ambiental/Autorizacion_ambiental_integrada/seccion.html&ui=SX_Calidade_Avaliacion_Ambiental/Autorizacion_ambiental_integrada/dinamico/listado_ippc_central.html
Santiago de Compostela, 10 de novembro de 2017
María Cruz Ferreira Costa
Directora xeral de Calidade Ambiental e Cambio Climático
ANEXO
Memoria resumo
Clave do expediente: 2017-IPPC-I-55.
Peticionaria: Ovos Xalo, S.C.
CIF: J15926256.
Domicilio social: rúa Río Mandeo, núm. 17, Teixeiro, 15310 Curtis (A Coruña).
Localización da instalación: rúa Río Mandeo, núm. 17, Teixeiro, 15310 Curtis (A Coruña). Un punto de localización da explotación avícola é o definido polas coordenadas UTM (Fuso 29, Datum ETRS89): X: 572573, Y: 4775863.
Actividade: explotación de galiñas poñedoras campeiras dedicada á produción de ovos para consumo.
Descrición: o proxecto consiste na ampliación dunha explotación de galiñas poñedoras campeiras. A actividade actual realízase nunha nave cunha capacidade máxima autorizada de 24.273 galiñas e proxéctase a construción dunha nova nave, tras a cal a explotación pasará a contar cunha capacidade máxima de 47.505 galiñas. A explotación existente conta cunha esterqueira de 255 m2 e proxéctase a construción dunha nova esterqueira similar á existente.
Os ciclos de produción terán unha duración da orde de 385 días (con período de descanso de 30 días con retirada da galiñaza, limpeza, desinfección e preparación do novo ciclo), as poliñas entran ao inicio de posta con 150 días e son enviadas ao matadoiro ao finalizar o ciclo produtivo. Contará con zona dedicada a parque de exercicio ao cal as galiñas terán acceso directamente desde a nova nave. O esterco xerado na explotación será valorizado en parcelas agrícolas.
A auga de limpeza das naves irá á esterqueira xunto coa galiñaza, a auga dos aseos irá a unha fosa séptica e as augas pluviais verteranse directamente ao terreo.
Inclúese na documentación presentada o grao de implantación das mellores técnicas dispoñibles, atendendo ao recollido na Decisión de execución (UE) 2017/302 da Comisión, do 15 de febreiro de 2017, pola que se establecen as conclusións sobre as mellores técnicas dispoñibles (MTD) no marco da Directiva 2010/75/UE do Parlamento Europeo e do Consello respecto á cría intensiva de aves de curral ou de porcos.