Co obxecto de levar a cabo a produción teatral prevista para o primeiro semestre do ano 2018 e en consecuencia proceder á selección dos actores e actrices que formarán parte do elenco, para a súa contratación mediante relación laboral de carácter especial, o Consello Reitor desta entidade aprobou as bases que rexerán este proceso selectivo.

Conforme o disposto na base oitava, para garantir a publicidade deste procedemento,

RESOLVO:

Anunciar a convocatoria para a selección de sete (7) prazas de actrices e actores, coa categoría de principais, para a produción do Centro Dramático Galego no ano 2018 dunha versión libre da obra Divinas Palabras de Ramón María del Valle-Inclán.

As bases que rexen este proceso, así como o resto da documentación relativa a esta convocatoria, poden consultarse na páxina web http://www.agadic.gal/, nas dependencias da Agadic e no taboleiro de anuncios do organismo.

A presentación de solicitudes e a documentación anexa deberá realizarse preferiblemente por vía electrónica a través do formulario normalizado dispoñible na páxina web da Agadic no enderezo de correo electrónico audicions.cdg@xunta.gal. Para a presentación poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e Chave365 (https://sede.xunta.es/chave365).

Opcionalmente, poderanse presentar en soporte papel en calquera dos lugares e rexistros establecidos no artigo 16.4 da Lei 39/2015, do 1 de outubro, do procedemento administrativo común, utilizando el formulario normalizado dispoñible na sede electrónica da Xunta de Galicia.

O prazo de presentación será de dez (10) días hábiles contados a partir do día seguinte ao da publicación deste anuncio.

Os sucesivos anuncios relacionados con esta convocatoria faranse conforme o disposto nas bases que se anuncian.

Contra esta convocatoria, que non pon fin á vía administrativa, poderase interpoñer recurso de reposición ante a Presidencia da Agadic no prazo dun mes contado desde o día seguinte ao da súa publicación.

Os actos que deriven desta convocatoria poderán ser impugnados nos casos e forma establecidos pola Lei 39/2015, do 1 de outubro, do procedemento administrativo común.

Santiago de Compostela, 20 de novembro de 2017

Román Rodríguez González
Presidente do Consello Reitor da Axencia Galega das Industrias Culturais