O Consello da Xunta de Galicia acordou, na súa xuntanza do 21 de xaneiro de 2016, declarar a incidencia supramunicipal do proxecto sectorial de ampliación das instalacións de Exlabesa en Padrón e Rois, para os efectos previstos na Lei 10/1995, do 23 de novembro, de ordenación do territorio de Galicia.
Polo tanto, en cumprimento do disposto no artigo 13.2 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal, segundo o cal os plans e proxectos que o Consello da Xunta de Galicia declare como de incidencia supramunicipal se someterán, polo prazo mínimo dun mes, ao trámite de información pública, mediante anuncio publicado no Diario Oficial de Galicia e nun dos diarios dos de maior circulación na Comunidade Autónoma, e ao trámite de audiencia aos concellos afectados,
RESOLVE:
Someter a información pública o proxecto sectorial de ampliación das instalacións de Exlabesa en Padrón e Rois, declarado como de incidencia supramunicipal por acordo do Consello da Xunta de Galicia do 21 de xaneiro de 2016, por un prazo dun mes contado a partir da última das dúas publicacións que se farán desta resolución no Diario Oficial de Galicia e nun dos xornais de maior circulación da Comunidade Autónoma.
Durante o prazo referido, calquera persoa poderá examinar o devandito proxecto sectorial na Dirección Xeral de Enerxía e Minas (Edificio Administrativo San Caetano, s/n, bloque 5, 4º andar, 15781 Santiago de Compostela), na Xefatura Territorial da Coruña da Consellería de Economía, Emprego e Industria (rúa Vicente Ferrer, 2, 15071 A Coruña) ou nos concellos afectados (Padrón e Rois), e presentar as alegacións que considere pertinentes.
Santiago de Compostela, 20 de outubro de 2017
Ángel Bernardo Tahoces
Director xeral de Enerxía e Minas