A Xunta de Goberno local, por delegación da Alcaldía (Decreto do 18 de xuño de 2015) da competencia que lle atribúe o artigo 21.1.j) da Lei 7/1985, reguladora das bases do réxime local, acordou, na sesión ordinaria do 10 de xullo de 2017, aprobar inicialmente o Plan especial de protección do conxunto histórico-artístico de Monforte de Lemos, expediente de iniciativa municipal redactado pola entidade Oficina de Planeamiento, S.A. en virtude do servizo contratado polo Concello, e sometelo a información pública polo prazo de dous meses, de acordo co establecido no artigo 75.1 da Lei 2/2016, do solo de Galicia.
O dito prazo de dous meses remata o 3 de outubro de 2017, dado que o anuncio ao respecto foi publicado no Diario Oficial de Galicia núm. 147, do 3 de agosto de 2017.
Dado que o dito prazo é mínimo segundo a norma citada, sen prexuízo do prazo que resulta para os interesados que reciben a notificación regulamentaria persoal, a Xunta de Goberno local, en sesión ordinaria do 25 de setembro de 2017, acordou o seguinte:
«Primeiro. Ampliar en dous meses (ata o 4 de decembro de 2017) o período de información pública do Plan especial de protección do conxunto histórico-artístico de Monforte de Lemos.
Segundo. Publicar o anuncio da dita ampliación de prazo no Diario Oficial de Galicia, no Boletín Oficial da provincia, na páxina web municipal e nos xornais de maior difusión na provincia».
O que se fai público para xeral coñecemento e para a efectividade do acordado pola Xunta de Goberno local.
Monforte de Lemos, 25 de setembro de 2017
José Tomé Roca
Alcalde