A base novena da Resolución da Dirección Xeral de Recursos Humanos do 10 de decembro de 2014 (Diario Oficial de Galicia nº 242, do 18 de decembro), pola que se convoca concurso-oposición para o ingreso na categoría de médico/a de familia de atención primaria do Servizo Galego de Saúde, dispón que o/a aspirante que non opte por un destino no prazo e de acordo co procedemento establecido, non poderá ser nomeado/a e quedarán sen efecto todas as súas actuacións. En todo caso, non serán tidas en conta causas de forza maior ou calquera outra causa para emendar a non elección de destino.
Neste suposto, a autoridade convocante procederá ao chamamento de novos/as aspirantes, no número que se corresponda coas prazas ofertadas e non elixidas, coa finalidade de que manifesten a súa opción por estas, logo de acreditar o cumprimento dos requisitos exixidos. Esta opción realizarase pola orde de prelación que resulte da lista definitiva.
A base décima da mesma resolución establece que, unha vez adxudicados os destinos, publicarase no Diario Oficial de Galicia a resolución pola que se declare finalizado o proceso selectivo, co nomeamento como persoal estatutario fixo do Servizo Galego de Saúde e a asignación de destino a aqueles/as aspirantes seleccionados/as que acrediten o cumprimento dos requisitos exixidos.
Ao abeiro da antedita resolución e do artigo 4 da Orde do 5 de xullo de 2012, sobre delegación de competencias en órganos centrais e periféricos do Servizo Galego de Saúde (Diario Oficial de Galicia nº 139, do 20 de xullo), esta dirección xeral, como órgano convocante do proceso,
RESOLVE:
Primeiro. En cumprimento da base 9.10 da Resolución da Dirección Xeral de Recursos Humanos do 10 de decembro de 2014, pola que se convoca concurso-oposición para o ingreso na categoría de médico/a de familia de atención primaria, excluír do proceso selectivo a aspirante Mª José Fandiño Carrillo, as súas actuacións quedan anuladas e decae en todos os dereitos derivados da súa participación no procedemento, e declárase, no seu lugar, como aspirante seleccionado, logo da acreditación do cumprimento dos requisitos exixidos, a Sergio Novo Porto.
Segundo. Declarar finalizado o concurso-oposición para o ingreso na categoría de médico/a de familia de atención primaria, convocado por Resolución da Dirección Xeral de Recursos Humanos do 10 de decembro de 2014 (Diario Oficial de Galicia nº 242, do 18 de decembro), modificada pola Resolución do 24 de abril de 2015 (Diario Oficial de Galicia nº 82, do 4 de maio).
Terceiro. Nomear como persoal estatutario fixo do Servizo Galego de Saúde, na categoría de médico/a de familia de atención primaria, os/as aspirantes seleccionados/as que se inclúen no anexo desta resolución.
Cuarto. Adxudicarlles aos/ás ditos/as aspirantes, con carácter de destino definitivo, a praza correspondente que figura no indicado anexo.
Quinto. Os/as aspirantes nomeados/as disporán do prazo dun mes, contado desde o día seguinte ao da publicación desta resolución no Diario Oficial de Galicia, para incorporarse á praza adxudicada.
De conformidade coa base décima da resolución de convocatoria do proceso, a toma de posesión da praza efectuarase no centro de xestión a que pertenza esta. A falta de incorporación no prazo referido, cando sexa imputable ao/á interesado/a e non responda a causas xustificadas, producirá o decaemento do seu dereito a obter a condición de persoal estatutario fixo como consecuencia do concreto proceso selectivo. No entanto, en casos de forza maior e por instancia do/da interesado/a, a Dirección Xeral de Recursos Humanos do Servizo Galego de Saúde poderá prorrogar o prazo de toma de posesión.
Sexto. Contra esta resolución, que pon fin á vía administrativa, poderase interpor recurso potestativo de reposición ante esta dirección, no prazo dun mes contado desde o día seguinte ao da súa publicación no Diario Oficial de Galicia, de conformidade co establecido nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou poderase impugnar directamente na xurisdición contencioso-administrativa nos termos da Lei 29/1998, do 13 de xullo.
Santiago de Compostela, 10 de febreiro de 2017
Margarita Prado Vaamonde
Directora xeral de Recursos Humanos
