Expediente: IN407A 2016/695-1.

Promotor: Unión Fenosa Distribución, S.A.

Instalación: LMT, CT, RBT Sante-Grixalba.

Concello: Sobrado.

Feitos.

1. O 3 de maio de 2016 o promotor solicitou a autorización administrativa previa, a autorización administrativa de construción e a declaración de utilidade pública da instalación de distribución eléctrica indicada.

2. Características técnicas:

– Liña eléctrica de media tensión aérea a CT Sante, a 15 kV, cunha lonxitude de 0,554 km, coa orixe no apoio nº 60-B-31-27 da LMT SDG709, condutor tipo LA-56 mm2 e final no CT Sante (proxectado).

– Centro de transformación intemperie Sante, cunha potencia de 100 kVA e unha relación de transformación de 15.000/400-230 V.

3. O proxecto someteuse ao trámite de información pública mediante resolución publicada nos seguintes medios:

– Resolución información pública: 14 de xuño de 2016.

– DOG: 25 de agosto de 2016.

– BOP: 8 de agosto de 2016.

– Xornal La Voz de Galicia: 2 de setembro de 2016.

– Taboleiro de anuncios do concello: segundo certificado municipal do 12 de setembro de 2016.

Ao mesmo tempo realizáronse notificacións individuais aos titulares que figuran na relación de bens e dereitos afectados.

4. Durante o período en que se someteu ao trámite de información pública foron presentadas as seguintes alegacións:

– José Manuel Ramos Fernández, mediante escrito do 24 de outubro de 2016, solicita ser informado sobre a afección e que se modifique o trazado alegando, en síntese, que así se reduciría a afección ás súas parcelas.

– Francisco Suárez Fernández e outro, mediante escrito do 25 de agosto de 2016, solicitan información sobre o expediente.

Destas alegacións déuselle traslado ao promotor que contestou:

– Escrito do 23 de novembro de 2016, en que se valoran as alegacións presentadas por José Manuel Ramos Fernández no cal, en síntese, manifesta o seguinte:

• Puxéronse en contacto con el para explicar as afeccións e informar de que as modificacións que afecten terceiros deberán ter consentimento expreso dos seus propietarios.

• Que non existen limitacións á constitución da servidume establecidas no artigo 58 da Lei do sector eléctrico, como no artigo 161 do Real decreto 1955/2000.

– Escrito do 16 de setembro de 2016, no que se informa sobre as instalacións segundo Francisco Suárez Fernández e outro. Remítese a resposta aos alegantes.

5. Solicitouse o preceptivo informe ás distintas administracións, organismos ou, se é o caso, empresas de servizo público ou de servizos de interese xeral afectados. O promotor manifestou a súa conformidade cos condicionados establecidos.

6. Os servizos técnicos da xefatura territorial emitiron informe favorable sobre a dita solicitude.

Consideracións legais e técnicas.

1. Lexislación de aplicación:

– Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

– Lei 40/2015, do 1 de outubro, de réxime xurídico do sector público (BOE núm. 236, do 2 de outubro).

– Lei 24/2013, do 26 de decembro, do sector eléctrico (BOE núm. 310, do 27 de decembro).

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).

– Real decreto 842/2002, do 2 de agosto, polo que se aproba o Regulamento electrotécnico para baixa tensión (BOE núm. 224, do 18 de setembro).

– Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro).

– Decreto 36/2001, do 25 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 34, do 16 de febreiro).

– Decreto 146/2016, do 13 de novembro, polo que se establece a estrutura orgánica da Xunta de Galicia (DOG núm. 217, do 14 de novembro).

– Decreto 175/2015, do 3 de decembro, polo que se establece a estrutura orgánica da Consellería de Economía, Emprego e Industria (DOG núm. 232, do 4 de decembro).

– Lei do 16 de decembro de 1954, sobre expropiación forzosa (BOE núm. 351, do 17 de decembro).

– Decreto do 26 de abril de 1957, polo que se aproba o Regulamento da Lei de expropiación forzosa (BOE núm. 160, do 20 de xuño).

2. Na visita de campo realizada para examinar a localización das instalacións non se apreciou, nos predios sometidos a expropiación, ningunha das limitacións á constitución da servidume indicadas no artigo 58.a) da Lei 24/2013, do 26 de decembro, do sector eléctrico.

3. En relación coas alegacións formuladas e coas manifestacións do promotor, cómpre sinalar:

– Non procede atender a solicitude de modificación do trazado realizada por José Manuel Ramos Fernández por non presentar unha alternativa concreta xustificando a existencia das limitacións á constitución da servidume indicadas no artigo 161 do Real decreto 1955/2000, do 1 de decembro.

– No tocante á alegación realizada por Francisco Suárez Fernández e outro considérase suficiente a resposta presentada por Unión Fenosa Distribución.

4. No expediente consta un informe favorable dos servizos técnicos desta xefatura territorial.

De acordo con todo o indicado,

RESOLVO:

1. Conceder a autorización administrativa previa, a autorización administrativa de construción e a declaración de utilidade pública, en concreto, da instalación de distribución eléctrica indicada.

2. A instalación executarase no prazo dun ano, contado a partir da data de ocupación dos terreos.

A declaración de utilidade pública leva implícita a necesidade de ocupación dos bens e de adquisición dos dereitos afectados, e implicará a urxente ocupación para os efectos do artigo 52 da Lei de expropiación forzosa.

3. Para a posta en funcionamento da instalación autorizada, deberá presentar ante esta xefatura territorial unha solicitude que se acompañará da seguinte documentación:

– As declaracións de conformidade relativas ao material ou equipamento e as certificacións ou homologacións, se procede.

– Un certificado do director da montaxe en que se garantirá o cumprimento das especificacións do proxecto e prescricións complementarias, se as houber, así como das regulamentacións e normas oportunas para a montaxe da instalación e posta a punto.

4. Esta autorización outórgase sen prexuízo doutras que sexan de aplicación segundo a lexislación vixente, en especial a relativa á ordenación do territorio e o ambiente.

Contra esta resolución, que non é definitiva en vía administrativa, poderá interporse recurso de alzada ante o conselleiro de Economía, Emprego e Industria, no prazo dun mes, contado a partir do día seguinte ao da notificación ou publicación nos termos establecidos na Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que os interesados poidan interpor calquera outro recurso que se considere pertinente.

A Coruña, 12 de xaneiro de 2017

Isidoro Martínez Arca
Xefe territorial da Coruña