Aprobado o programa de actividades formativas da Escola Galega de Administración Pública (EGAP) para o ano 2016 polo Consello Reitor, de conformidade co artigo 3.2 da Lei 4/1987, do 27 de maio, de creación da Escola Galega de Administración Pública, modificada pola Lei 10/1989, do 10 de xullo, e en colaboración coas universidades da Comunidade Autónoma de Galicia, convócanse as actividades de formación dirixidas ao seu persoal de administración e servizos (PAS), cuxas bases se detallan nos anexos desta resolución.

RESOLVO:

Publicar a convocatoria das actividades formativas que figuran nos anexos II e III, que deberán desenvolverse segundo as bases detalladas no anexo I.

Santiago de Compostela, 14 de xuño de 2016

Sonia Rodríguez-Campos González
Directora da Escola Galega de Administración Pública

ANEXO I
Bases

Primeira. Requisitos dos participantes

Poderá participar nas accións formativas convocadas nesta resolución o persoal de administración e servizos (PAS) das universidades da Comunidade Autónoma de Galicia que se encontra en situación de servizo activo, permiso por maternidade, adopción ou acollemento ou excedencia polo coidado dun fillo ou dun familiar e que reúna os requisitos establecidos na presente convocatoria.

Toda persoa solicitante que ao inicio do curso estea en situación de baixa laboral por incapacidade temporal quedará automaticamente excluída da listaxe do persoal seleccionado. Esta incidencia deberá ser comunicada á EGAP con carácter inmediato.

Segunda. Desenvolvemento das actividades de formación

Os cursos realizaranse cos requirimentos, duración e condicións que para cada un deles se indiquen na convocatoria. A información relativa ao desenvolvemento das actividades, así como as súas posibles modificacións, será actualizada e ampliada na páxina web <http://egap.xunta.es>.

Terceira. Solicitudes

1. O prazo de presentación de solicitudes será de dez días naturais contados a partir do seguinte ao da publicación desta resolución no Diario Oficial de Galicia.

2. As solicitudes de participación nas actividades formativas só poderán realizarse mediante o formulario de matrícula telemática dispoñible no enderezo <http://egap.xunta.es/matricula> desde as 8.00 horas da data de inicio do prazo de presentación de solicitudes ata as 14.00 horas da data de finalización. As solicitudes entenderanse presentadas unha vez que se complete correctamente o proceso de matriculación.

3. Dentro do prazo de presentación de solicitudes establecido no punto 1 desta base os solicitantes deberán presentar na EGAP, se for o caso, xunto cunha copia do formulario de solicitude, a seguinte documentación:

– Documentación complementaria acreditativa de circunstancias específicas (discapacidade, permiso de maternidade, etc.) de acordo cos criterios de selección sinalados na Resolución da Escola Galega de Administración Pública do 4 de xaneiro de 2008 (DOG do 10 de xaneiro).

Para isto poderase utilizar, ademais do previsto no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común (BOE do 27 de novembro) o enderezo de correo electrónico <xestion.egap@xunta.es>.

4. O número máximo de cursos que se pode solicitar durante o prazo de presentación de solicitudes limítase a cinco en todas as convocatorias cuxo prazo de matrícula sexa coincidente.

5. Serán excluídas automaticamente aquelas solicitudes que non se axusten ao formulario de solicitude, non teñan cubertos correctamente os datos precisos para a realización do proceso de selección ou sexan presentadas fóra de prazo.

6. As persoas que oculten ou falseen datos esenciais para a selección serán automaticamente excluídas das actividades solicitadas e pasarán ao final das listaxes de todas as actividades formativas que soliciten e cuxo prazo de matrícula comece dentro do ano seguinte contado desde que se detecte o feito.

7. As persoas interesadas en recibiren mensaxes sobre o proceso de selección deberán facilitar un enderezo de correo electrónico e/ou un número de teléfono móbil.

8. As persoas solicitantes de actividades impartidas na modalidade de teleformación deberán dispor dunha conta de correo electrónico cuxo enderezo terán que indicar na solicitude e dun equipo informático que cumpra os seguintes requisitos técnicos:

– Un computador con conexión á internet.

– Un navegador web co plugin de flash.

9. A EGAP adoptará as medidas necesarias para facilitar a presentación das solicitudes. As dúbidas, as dificultades técnicas e as peticións de información complementaria serán atendidas a través dos números de teléfono 981 54 62 57, 981 54 62 54 e 981 54 63 35, e do enderezo de correo electrónico <xestion.egap@xunta.es>.

Cuarta. Criterios de selección

1. Os criterios selectivos que serán empregados son os sinalados con carácter xeral na Resolución da Escola Galega de Administración Pública do 4 de xaneiro de 2008 (DOG do 10 de xaneiro).

Para os efectos do previsto no punto segundo da citada resolución, o baremo que se empregará para a selección establécese sobre unha base de 100 puntos, dos cales o 60 % estará vinculado ao número de horas de formación recibidas nos dous últimos anos e o 40 % restante á antigüidade na Administración.

Os empates desfaranse de acordo co resultado do sorteo a que se refire o artigo 9 do Regulamento de selección de persoal da Administración da Comunidade Autónoma de Galicia, aprobado polo Decreto 95/1991, do 20 de marzo (DOG do 25 de marzo). Para o ano 2016, segundo a Resolución do 3 de febreiro (DOG do 12 de febreiro), comezarase pola letra O.

2. A totalidade das prazas de cada actividade formativa repartirase proporcionalmente en función do número de efectivos de cada universidade da Comunidade Autónoma Galicia de acordo cos datos que figuran no boletín estatístico do persoal ao servizo das administracións públicas de xullo de 2015.

3. No caso de que non haxa un suficiente número de solicitantes que cumpran os requisitos do curso, poderá completarse o número de alumnos asignado mediante a apertura dun novo prazo público na páxina web da EGAP.

Quinta. Publicación das relacións do alumnado seleccionado

1. A EGAP publicará no enderezo <http://egap.xunta.es> unha relación das persoas seleccionadas para participar en cada curso, así como un número adecuado de reservas.

O prazo de presentación de alegacións será de cinco días naturais desde a súa publicación.

Ademais, quen facilite os correspondentes datos na solicitude será informado da súa selección a través do correo electrónico e da mensaxaría telefónica. Entenderase que as persoas que non figuren na relación foron excluídas por algunha das razóns expresadas nas bases da convocatoria ou ocupan un posto máis afastado na listaxe de espera, todo isto de acordo co disposto no artigo 59.6.b) da Lei de réxime xurídico das administracións públicas e do procedemento administrativo común.

2. Transcorrido o prazo de alegacións, a EGAP publicará no enderezo <http://egap.xunta.es> a listaxe definitiva de persoas admitidas no curso.

Sexta. Cambios ou substitucións na selección, renuncia e asistencia

1. Os cambios ou as substitucións na selección:

En ningún caso serán admitidos cambios ou substitucións entre as persoas seleccionadas.

2. A renuncia:

a) As persoas seleccionadas só poderán renunciar á actividade formativa:

– Por causa de forza maior suficientemente acreditada.

– Por necesidades do servizo debidamente motivadas por parte dos responsables dos centros directivos.

– Por outras causas xustificadas documentalmente.

b) A renuncia debe ser comunicada por escrito á Escola Galega de Administración Pública cunha antelación mínima de tres días hábiles anteriores ao inicio da actividade formativa. Na páxina web da escola está dispoñible un modelo de renuncia.

Para isto poderase utilizar, alén do previsto no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común (BOE do 27 de novembro) o enderezo de correo electrónico <xestion.egap@xunta.gal>.

c) As persoas que incumpran o previsto nas alíneas a) e b) pasarán ao final das listaxes de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

3. A asistencia e a puntualidade:

a) É obrigatoria a asistencia con puntualidade ás probas de avaliación. Para estes efectos, realizarase un único chamamento por orde alfabética. En ningún caso se admitirán cambios na asignación de quendas das probas.

b) As persoas participantes deberán vir provistas de DNI ou dun documento fidedigno acreditativo da súa identidade.

c) Para poder facer a proba de avaliación, cada participante debe lembrar o contrasinal que lle permite entrar na aula virtual, que coincide co que lle dá acceso á zona de matrícula.

d) Non se permitirá o uso de dispositivos electrónicos durante o desenvolvemento das probas.

4. Seguimento das actividades de teleformación:

As persoas que non completen o 75 % das actividades e tarefas propostas pola titoría pasarán ao final das listaxes de espera de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

Sétima. Realización de probas

1. Para poder superar as actividades de formación, o alumnado deberá superar unha proba de avaliación que se realizará ao final, tanto na modalidade de teleformación como nos cursos que se impartan de xeito presencial. As probas poderanse desenvolver de xeito descentralizado nas sedes que se determinen no comezo de cada actividade.

2. Para poder superar os cursos de teleformación é necesario cumprir unha serie de requisitos obrigatorios na súa totalidade:

– A asistencia á sesión presencial, se a houber.

– A adecuada realización de todas as actividades que o titor propoña. Estas deben constar debidamente presentadas nos prazos estipulados na programación didáctica do curso. A non superación das actividades obrigatorias suporá a perda automática do dereito a participar no exame final presencial.

– Para poder aprobar a actividade formativa, o alumnado deberá superar unha proba final de avaliación.

Ao inicio da actividade formativa publicarase o correspondente programa na plataforma de teleformación e indicaranse as probas de avaliación previstas, así como as datas en que estas terán lugar. Salvo que se determine outra cousa, nestas actividades as probas de avaliación finais serán presenciais nos lugares e nas datas que se establezan. A EGAP informará a través da súa páxina web e tamén a través da plataforma de teleformación das datas concretas e das horas da proba final.

Oitava. Certificado de aproveitamento

Para a obtención do certificado de aproveitamento, o alumnado deberá obter a avaliación positiva do seu profesorado, o cal emitirá un informe declarando apto ou non apto cada alumno/a en función do resultado da proba.

Non se expedirán certificados de asistencia sen a superación do curso.

Novena. Facultades da EGAP

1. A EGAP, xunto coas universidades da Comunidade Autónoma de Galicia, resolverá aquelas incidencias que poidan producirse no desenvolvemento e na xestión das actividades formativas e pode suprimir algunha, ampliar novas edicións da programación ou programar outras actividades diferentes cando así o exixan as circunstancias que afecten a súa organización ou docencia. Tamén corresponde á EGAP prover canto sexa necesario para a execución e cumprimento desta resolución.

2. A execución material das actividades queda condicionada á existencia de crédito orzamentario adecuado e dispoñible e á autorización correspondente do gasto.

3. No suposto de que o número de admitidos sexa inferior ao 50 % das prazas convocadas, a EGAP reserva para si o dereito a suspender, cancelar ou agrupar varias edicións das actividades, caso en que empregará os medios de notificación ás persoas interesadas previstos na normativa vixente.

4. A EGAP, xunto coas universidades da Comunidade Autónoma de Galicia, poderá modificar os contidos, o desenvolvemento, as datas e os lugares das actividades formativas, así como resolver todas as continxencias que poidan xurdir. Todas as modificacións que afecten o desenvolvemento das actividades serán anunciadas na páxina web da escola.

5. A EGAP, xunto coas universidades da Comunidade Autónoma de Galicia, garantirá na totalidade das actividades derivadas desta convocatoria a promoción da igualdade real e efectiva entre mulleres e homes, a eliminación de calquera tipo de discriminación e o fomento dos dereitos de conciliación.

ANEXO II
Bases

Primeira. Actividades do programa de autoformación: contidos e cuestionarios

1. As actividades do programa de autoformación son as seguintes:

Código	Denominación
UN16024	A calidade na Administración pública. Procesos e procedementos - Contidos
UN16026	Aplicacións informáticas para presentacións: gráficas de información (Microsoft office) - Contidos
UN16028	Cambio e motivación nas organizacións - Contidos
UN16030	Iniciación á Administración electrónica. Seguranza da información e protección de datos - Contidos
UN16032	Introdución á Union Europea e ao seu dereito - Contidos
UN16034	Lei 39/2015, do 1 de outubro, do procedemento administrativo común das administracións públicas. Contidos
UN16036	Lei xeral de dereitos das persoas con discapacidade e da súa inclusión social. Contidos
UN16038	Real decreto lexislativo 5/2015, do 30 de outubro, polo que se aproba o texto refundido do Estatuto básico do empregado público. Contidos
UN16040	Responsabilidade patrimonial da Administración pública - Contidos
UN16042	Técnicas para unha boa redacción dos documentos administrativos - Contidos
UN16044	Xénero e igualdade nas administracións públicas. A súa evolución normativa - Contidos

2. Cada unha das actividades está composta de contidos multimedia actualizados, material complementario e, dado que non existe a figura do titor, cuestionarios de corrección automática, que facilitan unha aprendizaxe autónoma máis efectiva.

O persoal de Administración e servizos (PAS) das universidades da Comunidade Autónoma de Galicia que desexe participar no programa de autoformación dispón de dúas opcións, compatibles entre elas pero independentes unha da outra. Por unha banda, pode acceder aos contidos das actividades sen máis trámite que o de inscribirse na zona de matrícula da EGAP. Por outra, pode solicitar presentarse ás probas de avaliación reguladas na base terceira deste mesmo anexo II.

Segunda. Actividades: acceso aos contidos

1. Todo o persoal de administración e servizos (PAS) das universidades da Comunidade Autónoma de Galicia pode acceder aos contidos das actividades do programa de autoformación sen pasar por un proceso de selección, inscribíndose na zona de matrícula da EGAP, no enderezo <http://egap.xunta.es/matricula>.

2. A inscrición para o acceso aos contidos pode facerse en calquera momento a partir do día seguinte ao da publicación desta resolución no Diario Oficial de Galicia e ata o 30 de decembro de 2016.

3. Cada persoa determinará libremente o número de actividades en que queira inscribirse e máis o período durante o cal vai traballar na actividade ou actividades do programa de autoformación elixidas. Os contidos van estar dispoñibles ata o 30 de decembro de 2016.

4. Unha vez inscrita, a persoa recibirá unha mensaxe de correo electrónico de confirmación e despois poderá acceder aos contidos da actividade ou actividades na aula virtual, no enderezo <http://egap.xunta.es/aulavirtual>.

5. O acceso aos contidos das actividades do programa de autoformación non implica a obriga de presentarse ás probas de avaliación reguladas no anexo II, nin é tampouco un requisito para matricularse nelas.

6. O acceso aos contidos das actividades do programa de autoformación non dá dereito á expedición do certificado regulado na base oitava do anexo I.

Terceira. Probas de avaliación das actividades do programa de autoformación: participación

1. Pode participar nas probas de avaliación das actividades do programa de autoformación o persoal de administración e servizos (PAS) das universidades da Comunidade Autónoma de Galicia que se encontra en situación de servizo activo, permiso por maternidade, adopción ou acollemento ou excedencia polo coidado dun fillo ou dun familiar.

Cuarta. Probas de avaliación: prazas convocadas, horas certificadas, datas, lugar e horario

1. As probas de avaliación das actividades do programa de autoformación que se convocan atéñense ao previsto na seguinte táboa:

Código	Actividade do programa de autoformación	Prazas	Horas certificadas	Datas
UN16025	A calidade na Administración pública. Procesos e procedementos - Proba de avaliación	100	25	13.10.2016
UN16027	Aplicacións informáticas para presentacións: gráficas de información (Microsoft office) - Proba de avaliación	100	30	19.10.2016
UN16029	Cambio e motivación nas organizacións - Proba de avaliación	100	25	18.10.2016
UN16031	Iniciación á Administración electrónica. Seguranza da información e protección de datos - Proba de avaliación	100	20	14.10.2016
UN16033	Introdución á Unión Europea e ao seu dereito - Proba de avaliación	100	24	11.10.2016
UN16035	Lei 39/2015, do 1 de outubro, do procedemento administrativo común das admininistracións públicas. Proba de avaliación	50	25	25.10.2016
UN16037	Lei xeral de dereitos das persoas con discapacidade e da súa inclusión social. Proba de avaliación	100	20	24.10.2016
UN16039	Real decreto lexislativo 5/2015, do 30 de outubro, polo que se aproba o texto refundido do Estatuto básico do empregado público. Proba de avaliación	50	25	25.10.2016
UN16041	Responsabilidade patrimonial da Administración pública - Proba de avaliación	100	25	10.11.2016
UN16043	Técnicas para unha boa redacción dos documentos administrativos - Proba de avaliación	100	15	6.10.2016
UN16045	Xénero e igualdade nas administracións públicas. A súa evolución normativa - Proba de avaliación	100	25	17.10.2016

2. As probas de avaliación do programa de autoformación terán lugar nas dependencias da EGAP, en Santiago de Compostela (rúa de Madrid, 2-4, As Fontiñas).

3. Na páxina web <http://egap.xunta.es> actualizarase e ampliarase a información sobre as actividades do programa de autoformación, incluído o horario de realización das probas de avaliación.

Quinta. Probas de avaliación: solicitudes de participación

1. O prazo de presentación de solicitudes de participación nas probas de avaliación das actividades do programa de autoformación será de dez días naturais contados a partir do seguinte ao da publicación desta resolución no Diario Oficial de Galicia.

2. As solicitudes só poden realizarse mediante o formulario de matrícula telemática dispoñible no enderezo <http://egap.xunta.es/matricula>. Entenderanse presentadas unha vez que se complete correctamente o proceso de matriculación.

Sexta. Probas de avaliación: desenvolvemento

1. As probas de avaliación das actividades do programa de autoformación teñen o seguinte formato:

Actividade do programa de autoformación: horas	Proba de avaliación
	Preguntas tipo test: número	Tempo dispoñible: minutos	Tentativas	Respostas incorrectas: desconto	Superación: porcentaxe de respostas correctas
Actividades de ofimática De 30 a 50 horas	30	90	Unha	Non	70 %
De 25 a 40 horas	40	60
De 15 a 24 horas	30	45

Para superaren as probas de avaliación, os alumnos deberán responder de forma correcta a un 70 % das preguntas da proba. As respostas incorrectas non descontarán acertos.

2. É obrigatoria a asistencia con puntualidade ás probas de avaliación. Levarase a cabo un único chamamento por orde alfabética.

3. As persoas participantes deben presentarse provistas do DNI ou doutro documento fidedigno acreditativo da súa identidade.

4. Para poder facer a proba de avaliación, cada participante debe lembrar o contrasinal que lle permite entrar na aula virtual, que coincide co que dá acceso á zona de matrícula.

5. Non se autoriza o uso de dispositivos electrónicos durante o desenvolvemento das probas de avaliación.

6. As persoas que se inscriban e non se presenten ás probas de avaliación pasarán ao final das listaxes de todas as actividades formativas que soliciten e cuxo prazo de matrícula comece dentro do ano seguinte contado a partir do día da finalización desta actividade.

Sétima. Certificado de equivalencia

1. As persoas que superen a proba de avaliación obterán o correspondente certificado de equivalencia .

2. Este certificado equivale a un de aproveitamento polas horas previstas na correspondente actividade do programa de autoformación.

ANEXO III

Código	Denominación	Prazas	Horas	Cualificación	Destinatarios	Localidade/modalidade	Datas	Data proba de avaliación	Horario
Réxime xurídico e actividade financeira das administracións públicas
UN16017	A Lei 2/2015, do 29 de abril, do emprego público de Galicia	50	20	Aproveitamento	Persoal de administración e servizos das universidades galegas	Teleformación	5.9.2016 25.9.2016	28.9.2016	Proba de avaliación 16.30 h
UN16018	A transparencia da Administración e os mecanismos de información	50	15	Aproveitamento	Persoal de administración e servizos das universidades galegas	Teleformación	10.10.2016 24.10.2016	26.10.2016	Proba de avaliación 16.30 h
UN16019	Lei 39/2015, do 1 de outubro, do procedemento administrativo común das administracións públicas	50	25	Aproveitamento	Persoal de administración e servizos das universidades galegas	Teleformación	26.10.2016 19.11.2016	23.11.2016	Proba de avaliación 16.30 h
UN16020	Lei 40/2015, do 1 de outubro, de réxime xurídico do sector público	50	25	Aproveitamento	Persoal de administración e servizos das universidades galegas	Teleformación	26.10.2016 19.11.2016	23.11.2016	Proba de avaliación 17.30 h
Comunicación, organización do traballo e mellora das habilidades
UN16022	Protocolo	50	20	Aproveitamento	Persoal de administración e servizos das universidades galegas	Teleformación	5.9.2016 25.9.2016	28.9.2016	Proba de avaliación 17.30 h
Unión Europea: políticas públicas e procedementos comunitarios
UN16023	Xestión de proxectos I+D+I no horizonte 2020	30	20	Aproveitamento	Persoal de administración e servizos das universidades galegas	Teleformación	9.11.2026 28.11.2016	2.12.2016	Proba de avaliación 16.30 h
Portal de idiomas
UN16021	Lingua inglesa	50	80	Aproveitamento	Persoal de administración e servizos das universidades galegas	Teleformación	7.9.2016 28.11.2016	1.12.2016	Proba de avaliación 18.00 h
Administración electrónica, protección de datos e calidade administrativa
UN16047	Xestión de documentos dixitais nas administracións. Rexistro electrónico. Dixitalización, identificación e autenticación	20	15	Aproveitamento	Persoal de administración e servizos das universidades galegas	Presencial	2.11.2016 16.11.2016	16.11.2016	Clases presenciais 17.00 a 20.00 (luns e mércores)
Bibliotecas
UN16016	A atención ao usuario na biblioteca híbrida	25	12	Aproveitamento	Persoal de administración e servizos das universidades galegas	Presencial	18.10.2016 27.10.2016	27.10.2016	Clases presenciais 17.00 a 20.00 (martes e xoves)
Programa de autoformación
UN16024	A calidade na Administración pública. Procesos e procedementos - Contidos	999	25		Persoal de administración e servizos das universidades galegas	Autoformación			Autoformación
UN16026	Aplicacións informáticas para presentacións: gráficas de información (Microsoft office) - Contidos	999	30		Persoal de administración e servizos das universidades galegas	Autoformación			Autoformación
UN16028	Cambio e motivación nas organizacións - Contidos	999	25		Persoal de administración e servizos das universidades galegas	Autoformación			Autoformación
UN16030	Iniciación á Administración electrónica. Seguranza da información e protección de datos - Contidos	999	20		Persoal de administración e servizos das universidades galegas	Autoformación			Autoformación
UN16O32	Introdución á Unión Europea e ao seu dereito - Contidos	999	24		Persoal de administración e servizos das universidades galegas	Autoformación			Autoformación
UN16034	Lei 39/2015, do 1 de outubro, do procedemento administrativo común das administracións públicas. Contidos	999	25		Persoal de administración e servizos das universidades galegas	Autoformación			Autoformación
UN16036	Lei xeral de dereitos das persoas con discapacidade e da súa inclusión social. Contidos	999	20		Persoal de administración e servizos das universidades galegas	Autoformación			Autoformación
UN16038	Real decreto lexislativo 5/2015, do 30 de outubro, polo que se aproba o texto refundido do Estatuto básico do empregado público. Contidos	999	25		Persoal de administración e servizos das universidades galegas	Autoformación			Autoformación
UN16040	Responsabilidade patrimonial da Administración pública - Contidos	999	25		Persoal de administración e servizos das universidades galegas	Autoformación			Autoformación
UN16042	Técnicas para unha boa redacción dos documentos administrativos - Contidos	999	15		Persoal de administración e servizos das universidades galegas	Autoformación			Autoformación
UN16044	Xénero e igualdade nas administracións públicas. A súa evolución normativa - Contidos	999	25		Persoal de administración e servizos das universidades galegas	Autoformación			Autoformación
UN16025	A calidade na Administración pública. Procesos e procedementos - Proba de avaliación	100	25	Equivalencia	Persoal de administración e servizos das universidades galegas	Autoformación		13.10.2016	17.00 a 20.00 h
UN16027	Aplicacións informáticas para presentacións: gráficas de información (Microsoft office) - Proba de avaliación	100	30	Equivalencia	Persoal de administración e servizos das universidades galegas	Autoformación		19.10.2016	17.00 a 20.00 h
UN16029	Cambio e motivación nas organizacións - Proba de avaliación	100	25	Equivalencia	Persoal de administración e servizos das universidades galegas	Autoformación		18.10.2016	17.00 a 20.00 h
UN16031	Iniciación á administración electrónica. Seguranza da información e protección de datos - Proba de avaliación	100	20	Equivalencia	Persoal de administración e servizos das universidades galegas	Autoformación		14.10.2016	17.00 a 20.00 h
UN16O33	Introdución á Unión Europea e ao seu dereito - Proba de avaliación	100	24	Equivalencia	Persoal de administración e servizos das universidades galegas	Autoformación		11.10.2016	17.00 a 20.00 h
UN16035	Lei 39/2015, do 1 de outubro, do procedemento administrativo común das administracións públicas. Proba de avaliación		25	Equivalencia	Persoal de administración e servizos das universidades galegas	Autoformación		25.10.2016	18.30 a 20.00 h
UN16037	Lei xeral de dereitos das persoas con discapacidade e da súa inclusión social. Proba de avaliación		20	Equivalencia	Persoal de administración e servizos das universidades galegas	Autoformación		24.10.2016	17.00 a 20.00 h
UN16039	Real decreto lexislativo 5/2015, do 30 de outubro, polo que se aproba o texto refundido do Estatuto básico do empregado público. Proba de avaliación		25	Equivalencia	Persoal de administración e servizos das universidades galegas	Autoformación		25.10.2016	17.00 a 18.30 h
UN16041	Responsabilidade patrimonial da Administración pública - Proba de avaliación		25	Equivalencia	Persoal de administración e servizos das universidades galegas	Autoformación		10.11.2016	17.00 a 20.00 h
UN16043	Técnicas para unha boa redacción dos documentos administrativos - Proba de avaliación		15	Equivalencia	Persoal de administración e servizos das universidades galegas	Autoformación		6.10.2016	17.00 a 20.00 h
UN16045	Xénero e igualdade nas administracións públicas. A súa evolución normativa - Proba de avaliación		25	Equivalencia	Persoal de administración e servizos das universidades galegas	Autoformación		17.10.2016	17.00 a 20.00 h