Mediante Orde da Consellería de Facenda do 17 de novembro de 2015 foi autorizado o alleamento, mediante poxa, dun inmoble situado na praza do Teucro 18 do concello de Pontevedra.
Logo de publicarse no Diario Oficial de Galicia do 3 de decembro de 2015, número 231, e en xornais de ampla difusión (La Voz de Galicia, Diario de Pontevedra e Faro de Vigo do mesmo día), o anuncio da Secretaría Xeral Técnica e do Patrimonio, de alleamento do citado inmoble, e posteriormente no Diario Oficial de Galicia número 26, do 9 de febreiro de 2016, tivo lugar o 15 de marzo de 2016 a poxa pública anunciada, polo que, á vista das actas da mesa de contratación, de conformidade co disposto no artigo 70 do Decreto 50/1989, polo que se aproba o Regulamento do patrimonio da Comunidade Autónoma de Galicia, e tras a proposta da Secretaría Xeral Técnica e do Patrimonio,
DISPOÑO:
Primeiro. Declarar deserta en segunda poxa a adxudicación do seguinte inmoble a un prezo de setecentos catro mil cincocentos vinte e nove euros con noventa e nove céntimos:
Casa situada na praza do Teucro 18, esquina rúa Real da cidade de Pontevedra, composta de semisoto, baixo e un piso de 276 m2, segundo o Rexistro da Propiedade, e duns 496 m2, segundo os datos da Dirección Xeral do Catastro, que linda: á fronte, praza do Teucro; á dereita, herdeiros de Jaime Facorro Gantad; á esquerda, rúa Real, e ao fondo, predio da familia Magdalena García. Referencia catastral 9280503NG2998S0001GL. Inscrita no Rexistro da Propiedade de Pontevedra número 1 como predio nº 3753, tomo 306, libro 98 e folio 120.
Segundo. Anunciar a realización da terceira poxa pública do inmoble, a un prezo de cincocentos oitenta mil douscentos un euros con dezasete céntimos, que terá lugar o día 15 de abril de 2016, ás 11.30 horas, na sala de conferencias do edificio administrativo de Pontevedra, na rúa Fernández Ladreda 43.
Terceiro. Contra esta resolución, que pon fin á vía administrativa, poderase interpor recurso potestativo de reposición, ante esta consellería, no prazo dun mes contado desde o día seguinte ao da súa publicación no Diario Oficial de Galicia, ou recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses.
Santiago de Compostela, 21 de marzo de 2016
P.D. (Orde do 9.1.2012; DOG núm. 9, do 13 de xaneiro)
Mª del Socorro Martín Hierro
Secretaria xeral técnica e do Patrimonio da Consellería de Facenda