O 2 de agosto de 2010, a Xunta de Galicia, o organismo autónomo Augas de Galicia, o Concello de Vigo e AcuaNorte asinaron un convenio para a construción de infraestruturas hidráulicas da actuación de saneamento de Vigo.
Dentro do marco destas actuacións, o 7 de setembro de 2012, Augas de Galicia aprobou o proxecto construtivo das obras de ampliación e modernización da estación depuradora de augas residuais (no sucesivo, EDAR) de Lagares, que incorpora os condicionantes establecidos na declaración de impacto ambiental formulada o 16 de marzo de 2009 pola Dirección Xeral de Calidade e Avaliación Ambiental da Consellería de Medio Ambiente e publicada no Diario Oficial de Galicia núm. 50, do 15 de marzo de 2010.
As actuacións inicialmente previstas foron obxecto do proxecto modificado núm. 1 das obras de ampliación e modernización da EDAR de Lagares, por un orzamento líquido estimado de 117.626.021,92 € e un orzamento adicional aproximado sobre o orzamento de adxudicación de 1.740.441,00 €.
O 11 de novembro de 2014, a Secretaría Xeral de Calidade e Avaliación Ambiental da Consellería de Medio Ambiente, Territorio e Infraestruturas emite informe en relación co proxecto modificado que non é necesaria unha nova tramitación de avaliación ambiental, sendo de aplicación as exixencias establecidas na declaración de impacto ambiental formulada o 16 de marzo de 2009.
A declaración de impacto ambiental do anteproxecto para a ampliación e modernización da EDAR de Lagares, do 16 de marzo de 2009, e o informe da Secretaría Xeral de Calidade e Avaliación Ambiental, do 11 de novembro de 2014, relativo ao modificado número 1 do proxecto construtivo de ampliación e modernización da EDAR de Lagares poden ser consultados na páxina web de Augas de Galicia (http://augas.cmati.xunta.es).
O 20 de xullo de 2015, o director de Augas de Galicia ditou unha resolución cuxa parte resolutiva dispón:
Aprobar técnica e definitivamente o proxecto das obras do proxecto modificado do proxecto construtivo de ampliación e modernización da EDAR de Lagares. Vigo (Pontevedra), de clave OH.336.1083.M1, redactado en xaneiro de 2015 polo enxeñeiro Ignacio Aldatz Molina, cun orzamento de execución por contrata (sen IVE e segundo prezos base de licitación) de cento cincuenta e sete millóns novecentos corenta e catro mil cincocentos trinta e nove euros con trinta e nove céntimos (157.944.539,39 €) e un prazo de execución das obras de corenta meses e doce meses de posta en marcha da EDAR.
O orzamento adicional do modificado (sen IVE e segundo prezos base de licitación) é de dous millóns trescentos corenta e catro mil trescentos euros (2.344.300,00 €).
Contra esta resolución cabe interpoñer recurso contencioso-administrativo no prazo de dous meses contados desde o día seguinte ao da súa publicación, sen prexuízo de que con carácter previo e potestativo se poida presentar recurso de reposición ante o director da entidade pública empresarial Augas de Galicia no prazo dun mes contado desde o día seguinte ao da súa publicación, de conformidade co previsto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común.
O que se fai público de conformidade co indicado no artigo 48 da Lei 21/2013, do 9 de decembro, de avaliación ambiental.
Santiago de Compostela, 28 de setembro de 2015
Gonzalo Mosqueira Martínez
Director de Augas de Galicia