Dentro do plan de actividades da Escola Galega de Administración Pública para o ano 2015 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, convócase un curso monográfico sobre medidas para previr a comisión de delitos no ámbito administrativo, conforme as seguintes bases:
1. Obxectivos.
O presente curso ten como obxectivo principal servir de base para desenvolver medidas para previr a existencia de delitos no ámbito da Administración pública autonómica. Con esta finalidade, preténdese dar a coñecer as novidades esenciais da recente reforma operada pola Lei orgánica 1/2015, do 30 de marzo, pola que se reforma o Código penal, e á vez o estado actual das vías para previr e perseguir a delincuencia no marco dunha xurisprudencia evolutiva.
2. Contidos.
Serán tratados, entre outros, os seguintes temas:
– Delitos contra a Administración pública. A prevaricación administrativa.
– Xestión de fondos públicos.
– Contratación pública.
– O delito de suborno.
– As relacións dentro da Administración.
– A relación da Administración cos cidadáns.
– A investigación dos delitos.
– A cooperación da Administración cos xulgados, tribunais e fiscalías.
– Tratamento informativo das causas de corrupción.
3. Destinatarios.
Trátase dun curso preferentemente dirixido aos empregados públicos da Administración xeral da Xunta de Galicia e entidades públicas instrumentais do sector público autonómico que teñan encomendadas tarefas de dirección ou coordinación de órganos e/ou unidades administrativas.
4. Desenvolvemento.
Lugar: EGAP, rúa Madrid, 2-4, Santiago de Compostela.
Datas: 13, 20 e 27 de outubro de 2015.
Horario: xornada de tarde.
Duración: 12 horas lectivas.
5. Número de prazas.
Limitado pola capacidade do local.
6. Inscrición.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/
O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o 9 de outubro de 2015.
Poderá obterse calquera outra información, das 8.30 ás 14.30 horas, nos teléfonos: 981 54 62 41 e 981 54 62 39.
7. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento deste curso, así como a facultade de cancelalo se o escaso número de solicitudes non xustificase a súa realización.
8. Certificado de asistencia oficial.
Ao final do curso entregarase un certificado de asistencia a aquelas persoas inscritas que participen asiduamente e sempre que a súa asistencia sexa igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización do curso e o selo oficial da institución.
Santiago de Compostela, 25 de setembro de 2015
Sonia Rodríguez-Campos González
Directora da Escola Galega de Administración Pública