Por Resolución do 15 de febreiro de 2012, da Dirección Xeral de Administración Local, publicada no Diario Oficial de Galicia do 23 de febreiro de 2012, créanse e clasifícanse tres postos de traballo reservados a funcionarios con habilitación de carácter nacional no Concello de Santiago de Compostela: secretaría de apoio, intervención de apoio e tesouraría de apoio.
Por sentenza da Sala do Contencioso-Administrativo, Sección Primeira, do Tribunal Superior de Xustiza de Galicia do 5 de xuño de 2014 estimouse parcialmente o recurso contencioso-administrativo interposto pola Confederación Intersindical Galega contra o acordo adoptado polo Concello de Santiago de Compostela en sesión plenaria do 2 de febreiro de 2012, de aprobación definitiva da modificación do cadro de persoal correspondente ao exercicio do ano 2011. A sentenza indica que «anulamos parcialmente o dito acordo no que concerne á creación de tres prazas de funcionarios de habilitación de carácter estatal, de 1 secretario/a de apoio, 1 interventor/a de apoio, e 1 tesoureiro/a de apoio, pertencentes ao subgrupo A1, sen custas».
Para a execución da sentenza, a sala ditou un auto con data do 29 de xaneiro de 2015.
O Concello, en sesión plenaria extraordinaria e urxente que tivo lugar o 19 de marzo de 2015, adoptou acordo relativo a dar cumprimento á execución da sentenza e auto.
De conformidade cos artigos 2 e 9 do Real decreto 1732/1994, do 29 de xullo, modificado polo Real decreto 834/2003, do 27 de xuño, e no exercicio da competencia atribuída polo artigo 15.1º do Decreto lexislativo 1/2008, do 13 de marzo, polo que se aproba o texto refundido da Lei da función pública de Galicia, e a Orde do 14 de maio de 2013, sobre delegación de competencias, esta dirección xeral
DISPÓN:
Primeiro e único. Suprimir os postos do Concello de Santiago de Compostela de secretaría de apoio, intervención de apoio e tesouraría de apoio, reservados a funcionarios con habilitación de carácter nacional en execución da sentenza do Tribunal Superior de Xustiza de Galicia do 5 de xuño de 2014.
Santiago de Compostela, 4 de maio de 2015.
José Alberto Pazos Couñago
Director xeral de Administración Local