O Pleno da Corporación, na sesión ordinaria do día 30 de xaneiro de 2015, adoptou entre outros, o seguinte acordo:
Aprobar definitivamente o Plan especial de protección e acondicionamento do parque arqueolóxico da Rocha (PE-7R), segundo o documento reformado presentado polo Consorcio da Cidade de Santiago de Compostela o pasado día 20 de xaneiro de 2015, e coa condición de que se elabore un documento refundido completo que incorpore:
– Todos os planos de información.
– Un anexo que recolla os condicionantes sinalados por Augas de Galicia para a execución das actuacións de desenvolvemento do plan.
– A clarificación dos efectos meramente informativos do catálogo respecto dos elementos exteriores ao ámbito do PE-7R.
– A obrigatoriedade de obter a autorización de Patrimonio Cultural para calquera intervención nos elementos catalogados.
O acordo notificarase persoalmente a todos os interesados e publicarase no Diario Oficial de Galicia. Así mesmo, publicarase, xunto co texto íntegro da normativa urbanística aprobada, no Boletín Oficial da provincia.
Así mesmo, remitirase á Consellería de Medio Ambiente, Territorio e Infraestruturas comunicación do acordo de aprobación definitiva, xunto con dous exemplares dilixenciados do documento definitivamente aprobado.
O 16 de febreiro de 2015, o Consorcio da Cidade de Santiago de Compostela presentou un documento refundido que incorpora os aspectos sinalados no acordo plenario de aprobación definitiva. O Pleno da Corporación, o 4 de marzo toma coñecemento da presentación do citado documento refundido.
O acto de aprobación definitiva do citado plan especial foi comunicado á Consellería de Medio Ambiente, Territorio e Infraestruturas, o 30 de marzo de 2015, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).
O anuncio de aprobación definitiva, xunto coa normativa, publicouse no Boletín Oficial da provincia da Coruña número 69, do 15 de abril de 2015.
Contra o acordo de aprobación definitiva, poderase interpoñer directamente recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ao da publicación deste anuncio.
Santiago de Compostela, 15 de abril de 2015
(Decretos 4867/2014 e 4903/2014, do 9 e 11 de xullo, respectivamente)
Teresa Gutiérrez López
Concelleira de Área de Desenvolvemento Urbano e Sostible