O Concello de San Amaro eleva, para a súa aprobación definitiva, o expediente da delimitación de solo de núcleo rural da Reguenga, de conformidade co previsto na disposición adicional segunda da LOUG, do 30 de decembro, de ordenación urbanística e protección do medio rural de Galicia.
Unha vez analizado o expediente remitido, e vista a proposta subscrita pola Subdirección Xeral de Urbanismo, resulta:
I. Antecedentes:
1. O Concello de San Amaro non conta con ningunha figura de planeamento xeral, polo que son de aplicación as Normas complementarias e subsidiarias provinciais (AD 03/04/1991).
2. Constan informes municipais: xurídico do 6.5.2014; e técnico do 26.6.2014.
3. O Concello de San Amaro someteu a información pública o expediente durante o prazo dun mes, mediante anuncio que nos xornais La Región e La Voz de Galicia do día 3.7.2014; e no DOG do 23.7.2014. Non se presentaron alegacións.
4. O pleno do Concello, en sesión do 4 de setembro de 2014, aprobou provisionalmente a delimitación de solo de núcleo rural da Reguenga.
II. Análise e consideracións:
II.1. Obxecto.
O ámbito da actuación abrangue a zona que ocupa o asentamento da Reguenga, identificado administrativamente no Decreto 332/1996, do 26 de xullo, polo que se aproba o nomenclátor das entidades de poboación da provincia de Ourense.
2. A delimitación do núcleo da Reguenga adaptada á LOUG ampárase na aplicación do establecido no número 2 da disposición adicional segunda da LOUG.
II.2. Contido.
1. Proponse unha delimitación do asentamento poboacional da Reguenga, como núcleo rural común, cunha superficie de 12.511 m2, conforme o establecido no artigo 13 da LOUG e no punto 3.1.7 das determinacións das directrices de ordenación do territorio, aprobadas polo Decreto 19/2011, do 10 de febreiro.
2. A información contida no proxecto argumenta que o núcleo pertence á parroquia de San Fiz de Navío e se atopa situado no terzo central do municipio e sinala a inexistencia de elementos de valor cultural ou de equipamentos e espazos libres.
3. O asentamento común está constituído por 5 edificacións, das cales 2 son tradicionais de uso residencial, cunha de consolidación edificatoria dun 71,42 %, segundo o método gráfico e dun 62,94 % segundo o cálculo numérico ou simplificado.
4. O documento fixa as condicións de uso e de edificación nos terreos delimitados e define o trazado viario.
5. Á vista da ordenación aplicable, a delimitación do solo de núcleo rural conta cos requisitos establecidos no artigo 13.3. da LOUG. O réxime xurídico aplicable aos terreos incluídos na delimitación será o establecido pola LOUG para o solo de núcleo rural.
De acordo co punto 2 da disposición adicional segunda da LOUG, e co artigo 1 do Decreto 44/2012, do 19 de xaneiro, polo que se establece a estrutura orgánica da Consellería de Medio Ambiente, Territorio e Infraestruturas, a competencia para resolver sobre a aprobación definitiva dos expedientes de delimitación de solo de núcleos rurais corresponde á Secretaría Xeral de Ordenación do Territorio e Urbanismo.
III. Resolución.
Visto canto antecede,
RESOLVO:
1. Aprobar o proxecto de delimitación do solo de núcleo rural da Reguenga, no concello de San Amaro.
2. Contra esta resolución, que non pon fin á vía administrativa, poderase interpoñer recurso de alzada ante a CMATI, no prazo dun mes contado a partir do día seguinte ao da notificación desta resolución, sen prexuízo de que os interesados poidan exercer, se for o caso, calquera outro que consideren procedente (artigos 48, 58, 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro). Se o interesado é unha administración pública, non caberá interpoñer recurso en vía administrativa, e pódese interpoñer recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados desde o día seguinte ao da notificación, sen prexuízo da formulación, se for o caso, do requirimento previo en igual prazo (artigos 44 e 46 da Lei 29/1998, do 13 de xullo, da xurisdición contencioso-administrativa).
3. Notifíquese ao concello e publíquese no Diario Oficial de Galicia.
Santiago de Compostela, 26 de decembro de 2014
María Encarnación Rivas Díaz
Secretaria xeral de Ordenación do Territorio e Urbanismo