O Estatuto de autonomía de Galicia, no seu artigo 27.17º, atribúe á nosa comunidade autónoma competencias exclusivas en materia de artesanía. A Lei 1/1992, do 11 de marzo, de artesanía de Galicia, establece o marco legal de actuación do sector artesán.
A Consellería de Economía e Industria, consciente da importancia social, patrimonial e económica da artesanía galega, aposta por un sector artesán forte e capaz de adaptarse ás novas tendencias, motivo polo cal elaborou o Plan de artesanía de Galicia 2014-2016, que ten coma obxectivo fundamental o desenvolvemento dunha estratexia de promoción, impulso e mellora da competitividade do sector.
En Galicia, as actividades artesanais supoñen unha grande reserva desde o punto de vista cualitativo e cuantitativo. Forman parte do tecido produtivo básico sobre o cal se constrúe a nosa sociedade, ao tempo que actúan como fío condutor que posibilita a continuidade da nosa identidade e da nosa cultura.
O Decreto 110/2013, do 4 de xullo, polo que se establece a estrutura orgánica da Consellería de Economía e Industria, atribúe á Dirección Xeral de Comercio a planificación, coordinación e control das competencias da consellería en materia de artesanía.
De acordo con anteriormente exposto, e de conformidade co establecido no Decreto 110/2013, do 4 de xullo, a Dirección Xeral de Comercio resolve publicar as bases reguladoras dos Premios de Artesanía de Galicia 2014 convocados pola Fundación Centro Galego da Artesanía e do Deseño, que figuran no anexo.
Santiago de Compostela, 12 de decembro de 2014
Sol María Vázquez Abeal
Directora xeral de Comercio
Anexo
Bases reguladoras dos Premios Artesanía de Galicia 2014
Primeira. Convocatoria
A Fundación Centro Galego da Artesanía e do Deseño, dependente da Dirección Xeral de Comercio da Consellería de Economía e Industria, convoca os Premios Artesanía de Galicia 2014.
O obxectivo desta iniciativa é recoñecer a mellora continua no labor dos profesionais do sector artesán galego e contribuír ao seu desenvolvemento económico e promocional.
Segunda. Modalidades
Establécense as seguintes modalidades:
1. Premio Artesanía de Galicia 2014.
2. Premio Traxectoria.
3. Premio Bolsa Eloy Gesto.
1. Premio Artesanía de Galicia 2014.
Premiarase a obra que represente as liñas desexadas para unha artesanía competitiva no mercado actual como son o deseño, a adaptación ou conservación das técnicas e valores tradicionais máis característicos da nosa artesanía, a incorporación ás tendencias actuais, a innovación, a boa presentación e a calidade da obra tanto nos seus materiais como no seu desenvolvemento.
2. Premio Traxectoria.
Premio honorífico en recoñecemento á traxectoria profesional consolidada dun/dunha artesán/á galega/o. O premio será concedido tendo en conta as propostas dos obradoiros artesanais inscritos no Rexistro Xeral de Artesanía e das asociacións profesionais de artesáns de Galicia, encargadas de facer a presentación das candidaturas. Valorarase a traxectoria recoñecida da/o candidata/o, a súa contribución, posta en valor e promoción da artesanía galega, a calidade dos seus traballos realizados e o compromiso coa divulgación e transmisión pedagóxica dos principais valores positivos no eido da nosa artesanía.
3. Premio Bolsa Eloy Gesto.
Esta modalidade ten a finalidade de potenciar a remuda xeracional na artesanía, o acceso de novos talentos ao sector e a súa profesionalización. Premiarase a candidatura que presente unha proposta para a súa formación nun centro de referencia no eido da artesanía e o deseño. Valorarase o carácter innovador do proxecto, a transferencia de coñecemento que se pretende acadar con esa formación, a incorporación das novas tecnoloxías, o currículo da persoa candidata e a potencialidade de incorporación desta formación para a elaboración dun produto artesanal innovador. Tamén se terá en conta o grao de madurez, calidade na presentación da proposta, así como a colaboración entre distintas actividades artesanais.
Terceira. Participantes
1. Premio Artesanía de Galicia 2014.
Obradoiros artesanais inscritos no Rexistro Xeral de Artesanía de Galicia cuxo titular sexa un artesán ou artesá rexistrados como tales, de acordo coa Lei 1/1992, do 11 de marzo, de artesanía de Galicia, e co Decreto 218/2001, do 7 de setembro, polo que se refunde a normativa vixente en materia de artesanía.
2. Premio Traxectoria.
Artesáns en activo ou retirados que están ou estiveron inscritos como tales no Rexistro Xeral de Artesanía de Galicia e cunha actividade mínima e demostrable no sector de 20 anos.
Os obradoiros artesáns inscritos no Rexistro Xeral de Artesanía e as asociacións profesionais de Artesáns de Galicia serán as encargadas de facer a presentación das candidaturas desta categoría.
3. Premio Bolsa Eloy Gesto.
Artesáns inscritos no Rexistro Xeral de Artesanía de Galicia, cunha idade máxima de 40 anos no 2014.
Obradoiros artesanais inscritos no Rexistro Xeral de Artesanía de Galicia e cuxo titular sexa un artesán ou artesá rexistrado como tal e que acadasen unha idade máxima de 40 anos en 2014.
Cuarta. Documentación requirida
1. Premio Artesanía de Galicia 2014.
a) Sobre pechado no cal figurará o título da proposta e que conterá a seguinte documentación:
– Proposta da candidatura de acordo co modelo do anexo I. É obrigatorio que leve a sinatura e o selo da empresa, de ser o caso.
– Documentación acreditativa de que a persoa candidata se atopa ao día das obrigas tributarias e fronte á Seguridade Social.
– Fotocopia do documento nacional de identidade.
– Currículo do artesán ou do obradoiro.
– Declaración asinada de que o proxecto presentado pertence ao solicitante e non foi presentado a outros concursos nin publicado con anterioridade.
b) Sobre pechado no cal figurará o título da proposta e conterá a seguinte documentación:
En soporte dixital un dossier que conteña:
– Ficha técnica do proxecto que inclúa nome ou título da obra, peso, medidas, técnica utilizada, materiais empregados e ano de elaboración.
– Mínimo de 5 imaxes da obra presentada en formato jpg cunha resolución de 300 dpi.
– Memoria descritiva do proceso produtivo e memoria conceptual na cal se indique a intencionalidade da peza, as fontes de inspiración e calquera outro dato que axude á comprensión e ao bo entendemento da obra.
c) Presentación da peza orixinal e, no caso de que non poida ser presentada por cuestións de volume, peso ou localización. Exixirase unha maqueta cuxo volume non exceda o metro cúbico e os 40 quilogramos de peso, xunto con material fotográfico do orixinal.
O número máximo de obras por participante será de dúas. Asemade, os autores que desexen participar con máis dunha obra deberán cubrir toda a documentación por obra presentada.
A peza que se propón como candidata ao premio non poderá estar asinada nin conter distintivos que a identifiquen cunha marca ou cunha autoría determinada.
2. Premio Traxectoria.
Sobre pechado no cal figurará o nome da persoa candidata e que conterá a seguinte documentación:
En papel:
– Proposta da candidatura de acordo co modelo do anexo III. É obrigatorio que leve a sinatura da/o representante e o selo do obradoiro ou asociación profesional.
En soporte dixital:
– Memoria de presentación, cun mínimo de 15 imaxes en formato jpg cunha resolución de 300 dpi do traballo e currículo da persoa candidata e na cal se sinalen as razóns por que se propón ao premio.
3. Premio Bolsa Eloy Gesto.
Sobre pechado no cal figurará o nome e que conteña:
En papel:
– Proposta da candidatura de acordo co modelo do anexo II. É obrigatorio que leve a sinatura e o selo da empresa, de ser o caso.
– Documentación acreditativa de que a persoa candidata se atopa ao día das obrigas tributarias e fronte á Seguridade Social.
– Fotocopia do documento nacional de identidade.
– Currículo do artesán ou do obradoiro.
En soporte dixital un dossier que conteña:
– Memoria descritiva que inclúa o traballo principal da persoa candidata no eido da artesanía, programa ou principais contidos da formación que desexa adquirir a través da bolsa de formación, información principal do centro de formación para o cal solicitaría a bolsa e unha proposta razoada pola cal considera que a súa candidatura debe de ser elixida como gañadora nesta categoría.
Quinta. Premios
A dotación dos premios será a seguinte:
– Premio Artesanía de Galicia 2014.
Dotación de 6.000 € e diploma acreditativo.
A persoa gañadora cederá á Fundación Centro Galego da Artesanía e do Deseño a propiedade da obra premiada. No caso de que as características do produto gañador impidan a súa cesión, substituirase por documentación gráfica ou visual.
– Premio Traxectoria.
Sen dotación económica e trofeo acreditativo.
– Premio Bolsa Eloy Gesto.
Bolsa de formación de 3.000 € e diploma acreditativo.
Os premios estarán suxeitos ás retencións vixentes na data de concesión.
Sexta. Xurado
Constituirase unha comisión de selección cuxos/as membros serán nomeados/as pola persoa titular da Dirección Xeral de Comercio competente en materia de artesanía, e estará integrada por un/unha presidente/a, un/unha secretario/a e un máximo de 5 vogais.
Actuará como presidente/a a persoa titular da Dirección Xeral de Comercio ou a persoa en quen delegue, como vogais actuarán profesionais e expertos/as de recoñecido prestixio no eido da artesanía, do deseño e do comercio e a secretaría recaerá na xerente da Fundación Centro Galego da Artesanía e do Deseño, con voz pero sen voto.
A composición do xurado farase pública 30 días antes da resolución dos premios na páxina web artesaniadegalicia.xunta.es
No seu funcionamento, o xurado aterase ao seguinte:
a) A deliberación do xurado será secreta e a súa decisión inapelable.
b) O xurado proporá nas súas deliberacións unha única persoa gañadora para cada unha das categorías. No caso de empate, decidirá o voto de calidade do/a presidente/a. No momento das votacións só se terán en conta os votos emitidos polos membros presentes, xa que non se admitirá a delegación do voto.
c) O xurado poderá facer mencións honoríficas sen dotación económica a aquelas persoas candidatas que desexen destacar nalgún aspecto.
d) O xurado poderá propoñer declarar desertos os premios se considera que as obras presentadas non reúnen os méritos necesarios para acadar o galardón.
e) O xurado queda facultado para resolver sobre aspectos non previstos nestas bases, así como todas as cuestións que poidan suscitarse con motivo dos premios.
f) O xurado axustará o seu funcionamento ao sinalado nestas bases e ao disposto na sección 3ª do capítulo I do título I da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
Sétima. Presentación dos traballos e documentación
A documentación deberase presentar na Fundación Centro Galego da Artesanía e do Deseño, Local Comercial Área Central L25MN, 15707 Santiago de Compostela, das 8.00 ás 15.00 horas, ou faráselle chegar a esta fundación por calquera dos medios provistos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común, modificado pola Lei 4/1999, do 13 de xaneiro.
De acordo co artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común, no caso de que a solicitude e a documentación non reúnan os requisitos exixidos nestas bases, requirirase á persoa solicitante que a complete no prazo de 10 días coa advertencia de que, transcorridos eses días sen que se achegue a documentación, se terá por desistida da súa solicitude, logo de resolución expresa.
Oitava. Prazo de presentación
O prazo de presentación de candidaturas finalizará ás 15.00 horas, transcorridos 90 días naturais contados desde o día seguinte ao da publicación desta resolución no DOG.
Novena. Publicidade das propostas e dos premios
A Fundación Centro Galego da Artesanía e do Deseño fará publicidade das persoas galardoadas e dos finalistas coa merecida notoriedade nos medios que considere máis axeitados dadas as características dos premios.
Décima. Resolución
O xurado efectuará a proposta de resolución, á cal deberá incorporar o contido da avaliación realizada por este.
O órgano competente para ditar a resolución definitiva do procedemento é a xerente da Fundación Centro Galego da Artesanía e do Deseño. A resolución que adxudique o premio notificarase aos premiados mediante correo certificado con aviso de recepción e publicarase no Diario Oficial de Galicia.
A Fundación Centro Galego da Artesanía e do Deseño poderá suspender unha convocatoria anual cando concorran circunstancias que impidan o normal desenvolvemento do proceso de convocatoria e a concesión do premio.
Décimo primeria. Entrega de premios
A entrega dos premios realizarase nun acto público convocado para tal efecto ao cal se dará a publicidade e a transcendencia axeitadas.
Décimo segundo. Compatibilidade do premio
Estes premios serán compatibles con calquera outra subvención, axuda, ingreso ou recurso procedente de calquera Administración, ente público ou privado, galego, estatal ou europeo, ou organismos internacionais, que se lle puider outorgar ao beneficiario despois da concesión do presente galardón.
Décimo terceira. Recuperación das pezas presentadas
Os autores que desexen recuperar as pezas presentadas deberanas recoller persoalmente na Fundación Centro Galego da Artesanía e do Deseño. As obras que non se recollan pasados 40 días desde a publicación das persoas gañadoras na páxina web www.artesaniadegalicia.xunta.es pasarán a ser propiedade da fundación, xa que se entenderá que as persoas candidatas renuncian aos seus dereitos de propiedade sobre elas.
Décimo cuarta. Aceptación das bases
A participación neste concurso supón a plena aceptación das bases, cuxa interpretación corresponde ao xurado.
Décimo quinta. Protección de datos
Os datos persoais dos participantes incorporaranse a un ficheiro responsabilidade da Fundación Centro Galego da Artesanía e do Deseño coa finalidade de xestionar a súa participación nos premios.
Os gañadores autorizan expresamente que o seu nome e apelidos sexan publicados co fin de promocionar os premios e referenciar a obra gañadora.
En calquera caso, os participantes poderán exercer os seus dereitos de acceso, rectificación, cancelación e oposición dirixíndose á Área Central L25MN, 15707 Santiago de Compostela.
