A secretaría do Comité Ético de Investigación Clínica de Galicia enviou o 19 de novembro de 2014 un escrito á Secretaría Xeral Técnica da Consellería de Sanidade en que comunica o cesamento por petición propia de dúas persoas membros dese comité e un novo nomeamento no seu lugar.

Antecedentes.

Mediante a Resolución do 21 de xaneiro de 2014, que se publicou no DOG núm. 22, do 3 de febreiro, concedeuse a acreditación do Comité Territorial de Ética da Investigación de Santiago-Lugo, estableceuse a súa sede e nomeáronse como membros as persoas que se relacionaban no seu anexo. Entre elas figuraban Carlos González Juanatey e Margarita Guillén Vázquez.

Consideracións legais e técnicas.

O Decreto 63/2013, do 11 de abril, regula os comités territoriais de ética da investigación. No relativo á súa composición, o artigo 9.5 sinala que «os membros destes comités serán designados/as e nomeados/as pola persoa titular da consellería competente en materia de sanidade, por proposta da Secretaría Xeral Técnica, garantindo en todo caso a representación equilibrada de homes e mulleres».

Pola súa banda, o número 6 do artigo 9 do citado Decreto 63/2013, do 11 de abril, dispón que «o nomeamento efectuarase por un período coincidente co de vixencia da acreditación do comité, aínda que poderá ser revogado ben por solicitude de baixa da persoa interesada, ben por se teren modificado as circunstancias que motivaron a súa designación de modo que supoña a perda dos requisitos para integrar o comité, ou por incumprimento notorio das súas funcións, a criterio do comité, e logo de audiencia do interesado».

Logo de ver o que se expuxo, e de acordo coa proposta que efectuou a Secretaría Xeral Técnica desta consellería,

RESOLVO:

Revogar o nomeamento de Carlos González Juanatey e Margarita Guillén Vázquez, á súa solicitude, como membros do Comité Territorial Ético de Investigación de Santiago-Lugo.

Así mesmo, nomear a Ricardo García Martínez, licenciado en Dereito, procedente da Estrutura Organizativa de Xestión Integrada de Lugo-Cervo-Monforte de Lemos, coa finalidade de manter os requisitos para a acreditación dese comité.

Santiago de Compostela, 25 de novembro de 2014

Rocío Mosquera Álvarez
Conselleira de Sanidade