A Reitoría da Universidade de Santiago de Compostela (USC), actuando en nome e representación da USC, en virtude das facultades legais que lle confiren a Lei orgánica 6/2001, do 21 de decembro, de universidades, e os estatutos da USC aprobados polo Decreto 14/2014, do 30 de xaneiro (DOG do 12 de febreiro),
EXPÓN:
Primeiro. A realización da obra de execución da mellora e adecuación da parcela do Xardín Botánico, etapa 1 e 2 (expediente 401/2014), foi encomendada á empresa Tragsa o día 2 de xuño de 2014.
Segundo. Unha vez iniciadas as obras, logo da limpeza do muíño de San Domingos, apreciouse unha fisura na bóveda do seu tremiñado e un avanzado estado de deterioración da cuberta de tella.
Terceiro. Os técnicos da Administración municipal e autonómica que interveñen na obra propoñen como solución provisional o apuntalamento da bóveda e a súa cubrición mediante unha lona de material adecuado, ancorada dun modo efectivo.
Cuarto. Para executar esta solución provisional urxente, o codirector facultativo da obra propuxo a modificación do proxecto.
Quinto. Por Resolución do 17 de setembro de 2014 autorizouse a modificación do proxecto.
Sexto. Por Resolución do 28 de outubro de 2014 aprobouse a modificación do proxecto.
Á vista do anterior, procede modificar as cláusulas primeira e quinta da encomenda, que quedan redactadas como a seguir se indica:
Modificación das cláusulas da encomenda
Primeira. O obxecto da encomenda é a realización da obra de mellora e adecuación da parcela do Xardín Botánico (etapa 1 e 2) da Universidade de Santiago de Compostela (expediente número 401/2014), coa execución das actuacións que se establecen no proxecto modificado.
Quinta. O prazo para a execución desta obra amplíase ata o 29 de maio de 2015.
Santiago de Compostela, 6 de novembro de 2014
Juan Viaño Rey
Reitor da Universidade de Santiago de Compostela