Mediante a Resolución do 18 de xullo de 2014 publicouse o acordo, do Consello de Dirección do Instituto Galego de Promoción Económica, que aprobou as bases reguladoras das axudas do Igape aos organismos intermedios para a realización de actuacións e estratexias de promoción e internacionalización das empresas galegas, cofinanciadas polo Fondo Europeo de Desenvolvemento Rexional no marco do programa operativo Feder Galicia 2007-2013 (DOG núm. 141, do 28 de xullo), e procedeuse á súa convocatoria en réxime de concorrencia competitiva.
Esas bases establecen no seu artigo 10.5 que, con carácter xeral, non se enviarán notificacións individuais da resolución definitiva e substituirase a notificación individual pola publicación no Diario Oficial de Galicia e na páxina web do Igape, no enderezo
www.tramita.igape.es, ao cal se remitirá desde o texto publicado no DOG.
Na súa virtude e de conformidade coas facultades que teño conferidas,
RESOLVO:
Primeiro. Anunciar a publicación do texto completo da resolución definitiva do 30.10.2014, de concesión das axudas do Igape aos organismos intermedios para a realización de actuacións e estratexias de promoción e internacionalización das empresas galegas, cofinanciadas polo Fondo Europeo de Desenvolvemento Rexional no marco do programa operativo Feder Galicia 2007-2013, no enderezo www.tramita.igape.es (epígrafe «Consulta de resolucións definitivas» http://www.igape.es/gl/oficina-virtual/resolucions-definitivas).
Segundo. Unha vez transcorridos 10 días hábiles a partir do seguinte ao da publicación desta resolución sen que o interesado comunique expresamente a súa renuncia á subvención, entenderase que a acepta e, desde ese momento, adquirirá a condición de beneficiario. A aceptación por parte do interesado suporá a obriga de cumprir as condicións establecidas na resolución, nas bases reguladoras da axuda e nas demais disposicións legais e regulamentarias que sexan de aplicación. A renuncia á subvención poderase facer por calquera medio que permita a súa constancia, de acordo co establecido no artigo 91 da Lei 30/1992. No caso de que o beneficiario renunciase ás axudas unha vez percibidas, procederase conforme o artigo 38 da Lei de subvencións de Galicia.
Terceiro. A resolución definitiva do 30.10.2014 esgota a vía administrativa e contra ela poderá interpoñerse recurso contencioso-administrativo ante os xulgados do contencioso-administrativo de Santiago de Compostela, no prazo de dous meses contados a partir do día seguinte ao da publicación desta resolución no Diario Oficial de Galicia. Non obstante, previamente poderá interpoñer un recurso de reposición ante a persoa titular da Dirección Xeral do Igape, dentro do prazo dun mes contado a partir do día seguinte ao da publicación desta resolución no DOG.
Santiago de Compostela, 30 de outubro de 2014
Javier Aguilera Navarro
Director xeral do Instituto Galego de Promoción Económica