Dentro do plan de actividades da Escola Galega de Administración Pública para o ano 2014 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración coa Secretaría Xeral para o Deporte, a Dirección Xeral de Traballo e Economía Social e a Dirección Xeral de Xuventude e Voluntariado, a xornada A natureza voluntaria ou laboral das actividades desenvolvidas nas entidades deportivas sen ánimo de lucro. Esta actividade desenvolverase conforme as seguintes bases:
1. Obxectivos.
Informar o sector deportivo sobre os distintos encadramentos xurídicos das actividades desenvolvidas nas entidades deportivas sen ánimo de lucro por adestradores, técnicos, deportistas e outras figuras.
De forma concreta, esta xornada ten por obxectivos facilitar información práctica sobre a normativa en vigor nos ámbitos laboral e de acción voluntaria, e actualizar os coñecementos dos axentes deportivos para a mellora última das súas competencias.
2. Contidos.
Serán tratados, entre outros, os seguintes temas:
– O voluntariado deportivo.
– As relacións laborais no ámbito deportivo.
3. Destinatarios.
Responsables das entidades deportivas galegas, principalmente clubs e federacións deportivas, e interesados en xeral.
4. Desenvolvemento.
Lugar: Escola Galega de Administración Pública (EGAP); rúa Madrid, 2-4, Santiago de Compostela.
Data e horario: 6 de novembro de 2014, das 16.00 ás 20.00 horas.
Duración: 4 horas lectivas.
5. Número de prazas.
Limitado pola capacidade do local.
6. Solicitudes.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/
As persoas solicitantes poderán obter máis información, das 8.30 ás 14.30 horas, chamando aos seguintes números: 981 54 62 41 e 981 54 62 39.
7. Prazo de inscrición.
O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o 5 de novembro de 2014.
8. Modificacións.
A EGAP reservase para si facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustifica a súa realización.
9. Certificado de asistencia.
Ao final da xornada entregaráselles un certificado de asistencia a aquelas persoas inscritas que participasen asiduamente e sempre que a súa asistencia sexa igual ou superior ao 90 % das horas lectivas programadas. Neste documento aparecerán de forma expresa o contido, a carga lectiva, a data, o lugar de realización e o selo oficial da institución.
Santiago de Compostela, 17 de outubro de 2014
Sonia Rodríguez-Campos González
Directora da Escola Galega de Administración Pública