Por Resolución da Dirección de Recursos Humanos do Servizo Galego de Saúde do 15 de febreiro de 2013 (DOG nº 39, do 25 de febreiro), abriuse o prazo para a inscrición de aspirantes nas listas para a formalización de vinculacións temporais no ámbito das institucións sanitarias do Servizo Galego de Saúde e entidades adscritas á Consellería de Sanidade, nas categorías de técnico/a superior, de xestión, e especialista de sistemas e tecnoloxías da información.

Na devandita resolución prevese unha xeración de listas coas persoas inscritas ata o 25 de marzo de 2013 que cumpran os requisitos determinados na anterior resolución.

Por Resolución do 6 de xuño de 2013 (DOG nº 112, do 13 de xuño), publicáronse as listas provisionais de admitidos/as e excluídos/as destas categorías estatutarias.

Finalizado o prazo de emenda previsto nesta última resolución, esta dirección xeral, de conformidade coa base sétima da Resolución do 15 de febreiro de 2013, de inicio do prazo de inscrición,

RESOLVE:

Primeiro. Publicar a relación definitiva de solicitantes admitidos/as e excluídos/as e os resultados provisionais de baremación no proceso de inscrición de aspirantes para a formalización de nomeamentos estatutarios temporais no ámbito do Servizo Galego de Saúde e entidades adscritas á Consellería de Sanidade, nas categorías de técnico/a superior de sistemas e tecnoloxías da información, técnico/a de xestión de sistemas e tecnoloxías da información e técnico/a especialista de sistemas e tecnoloxías da información, iniciado por Resolución do 15 de febreiro de 2013.

Segundo. As listas definitivas de excluídos/as e a lista definitiva de admitidos/as coa asignación da puntuación provisional e o número de orde acadados están publicadas, á disposición das persoas interesadas, na páxina web do Servizo Galego de Saúde (www.sergas.es).

Ademais, o estado de cada solicitude pode ser consultado polo/a solicitante no seu expediente electrónico persoal en Fides/expedient-e/sección de procesos

Terceiro. De conformidade coa base sétima da Resolución do 15 de febreiro de 2013, contra a lista definitiva de admitidos/as e excluídos/as as persoas interesadas poderán interpoñer recurso contencioso-administrativo, no prazo de dous meses contados a partir do día seguinte ao da súa publicación, ante o xulgado do contencioso-administrativo competente, de conformidade co establecido na Lei 29/1998, do 13 de xullo, reguladora da xurisdición contencioso-administrativa. Potestativamente, e con carácter previo, poderán interpoñer recurso de reposición, ante a Dirección Xeral de Recursos Humanos do Servizo Galego de Saúde, no prazo dun mes contado desde o día seguinte ao da súa publicación.

As persoas admitidas, con respecto aos resultados da baremación, poderán presentar reclamación ante as direccións de Xestión Integrada e direccións con competencias en xestión do persoal no suposto de entidades adscritas á Consellería de Sanidade, no prazo de dez días naturais contados a partir do seguinte ao da súa publicación.

As reclamacións presentadas entenderanse estimadas ou desestimadas na resolución pola que se publiquen as puntuacións e a orde de prelación definitivas.

Santiago de Compostela, 9 de xullo de 2014

Margarita Prado Vaamonde
Directora xeral de Recursos Humanos