Mediante a Resolución do 7 de xuño de 2013 publicouse o acordo do Consello de Dirección do Instituto Galego de Promoción Económica que aprobou as bases reguladoras das axudas do Igape á reorientación e competitividade das pemes galegas, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2007-2013 (DOG nº 114, do 17 de xuño) e procedeuse á convocatoria para o exercicio 2013, en réxime de concorrencia competitiva, das axudas aos proxectos de equipamento das pemes no sector dos servizos, cun investimento subvencionable entre 30.000 e 200.000 € (procedemento IG174).
Na dita resolución, no seu punto cuarto, establécese a súa dotación orzamentaria, así como que o director xeral do Igape poderá ampliar os créditos e modificar as partidas orzamentarias, logo de declaración de dispoñibilidade dos créditos nos termos referidos no artigo 30.2 do Decreto 11/2009, mediante resolución publicada para o efecto.
Tendo en conta o volume de solicitudes recibidas e tratando de dar resposta á ampla demanda de axuda, semella oportuno incrementar o importe aprobado para as axudas establecidas nestas bases.
Na súa virtude e de conformidade coas facultades que teño conferidas,
RESOLVO:
Único. Amplíase para o exercicio 2013 en 400.000 € o crédito establecido na partida orzamentaria 08.A1.741A.7706 (procedemento IG174) para as axudas aos proxectos de equipamento das pemes no sector dos servizos, cun investimento subvencionable entre 30.000 e 200.000 € (procedemento IG174) ao abeiro das bases reguladoras das axudas do Igape á reorientación e competitividade das pemes galegas, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2007-2013 (DOG nº 114, do 17 de xuño de 2013).
Santiago de Compostela, 23 de decembro de 2013
Javier Aguilera Navarro
Director xeral do Instituto Galego de Promoción Económica