A Resolución do 13 de setembro de 2013 pola que se aproba o Plan Marco Programa de mellora de camiños de titularidade municipal 2013-2014, financiado co Fondo Europeo Agrícola de Desenvolvemento Rural (Feader), no marco do PDR de Galicia 2007-2013 (DOG nº 186, do 30 de setembro de 2013), establece o 25 de novembro de 2013 como data en que debe estar executado e xustificado correctamente o investimento correspondente á anualidade 2013.

Debido á concorrencia no tempo de cinco convocatorias e ao gran número de expedientes manexados, é previsible que a resolución da convocatoria teña lugar moi preto da data prevista de xustificación.

Co obxecto de permitir unha tramitación administrativa axeitada e de non causar un prexuízo aos beneficiarios das axudas,

RESOLVO:

Artigo único

Modificación da Resolución do 13 de setembro de 2013 pola que se aproba o Plan Marco Programa de mellora de camiños de titularidade municipal 2013-2014, financiado co Fondo Europeo Agrícola de Desenvolvemento Rural (Feader), no marco do PDR de Galicia 2007-2013.

O número 2 do artigo 5 queda redactado do seguinte xeito:

«O 10 de decembro de 2013 deberá estar executado e xustificado correctamente o investimento correspondente á anualidade 2013. O feito de non xustificar correctamente esta anualidade suporá na perda do dereito á axuda da dita anualidade».

Santiago de Compostela, 21 de novembro de 2013

P.D. (DOG nº 148, do 5 de agosto de 2013)
Antonio Crespo Iglesias
Director xeral da Axencia Galega de Desenvolvemento Rural