A Dirección da Axencia de Protección da Legalidade Urbanística ditou, o 9 de outubro de 2013, resolución pola que se declaran que poderían ser legalizables, por ser compatibles co ordenamento urbanístico, as obras executadas en solo rústico, sen autorización urbanística autonómica, consistentes na rehabilitación, reconstrución e ampliación ata un 10 % do volume orixinario da vivenda tradicional, situada no lugar do Portelo, parroquia de Aspai, no termo municipal de Outeiro de Rei, provincia de Lugo.

Ao non se poder realizar a notificación persoal desta resolución a Carlos Parga Ceide, mediante esta cédula, e ao abeiro do disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común (LRXPAC), notifícaselle ao interesado a dita resolución.

Tendo en conta que, en atención ao previsto no artigo 61 da LRXPAC, o acto non se publica na súa integridade, comunícaselle ao interesado que o texto íntegro da resolución que se notifica se atopa ao seu dispor nas dependencias da Axencia de Protección da Legalidade Urbanística, sitas no Edificio Witland, Salgueiriños, en Santiago de Compostela, para a súa consulta no prazo de 10 días hábiles, que se contarán desde o día seguinte ao da publicación desta cédula. Unha vez transcorrido ese prazo, a notificación entenderase producida.

Contra a dita resolución, que pon fin á vía administrativa, o interesado pode interpoñer recurso de reposición no prazo dun mes, contado a partir do día seguinte a aquel en que se producise a notificación, ante a Dirección da Axencia de Protección da Legalidade Urbanística, ou ben, se non exerce o seu dereito de presentar recurso potestativo de reposición, pode interpoñer, directamente, recurso contencioso-administrativo, no prazo de dous meses, ante o xulgado do contencioso-administrativo en cuxa circunscrición radique o inmoble afectado, conforme o disposto no artigo 14.1, regra terceira, da Lei 29/1998, reguladora da xurisdición contencioso-administrativa.

Para que conste e lle sirva de notificación ao citado interesado, en cumprimento do disposto no artigo 59.5 da LRXPAC, expido e asino esta cédula.

Santiago de Compostela, 5 de novembro de 2013

María Martínez Allegue
Directora da Axencia de Protección da Legalidade Urbanística