O Pleno municipal, na sesión que tivo lugar o 6 de maio de 2013, adoptou, entre outros, o seguinte acordo:
«Primeiro. Aprobar definitivamente o estudo de detalle para a ampliación en edificio independente do CEIP Emilia Pardo Bazán da Coruña.
Segundo. Ordenar a dilixencia do documento, así como o cumprimento dos trámites administrativos recollidos nos artigos 92.2 e 92.3 da Lei 9/2002, do 30 de decembro, de ordenación urbanística e protección do medio rural de Galicia, para procurar a entrada en vigor do estudo de detalle.
Terceiro. Notificar o acordo de aprobación definitiva aos titulares catastrais, aos departamentos municipais de Licenzas e Disciplina Urbanística, Xestión do Solo, Sección de Patrimonio Urbanístico, Oficina do SIX de planeamento e ao promotor, que será requirido, ademais, para que no prazo de dez (10) días presente en soporte informático a documentación aprobada para a súa incorporación ao Sistema de información xeográfico municipal».
A documentación exixida polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia, tivo entrada na Consellería de Medio Ambiente, Territorio e Infraestruturas, para os efectos da entrada en vigor do estudo de detalle, o 3 de xuño de 2013.
Este acordo pon fin á vía administrativa e pódese interpor contra el recurso contencioso-administrativo, ante a sala correspondente do Tribunal Superior de Xustiza de Galicia, no prazo de dous meses contado a partir do día seguinte a aquel en que se realice a súa publicación, de conformidade co artigo 46 da Lei 29/1998, do 13 de xullo, da xurisdición contencioso-administrativa, sen prexuízo de calquera outro que se considere pertinente.
O que se publica para os efectos oportunos.
A Coruña, 3 de xuño de 2013
César de Jesús Otero Grille
Director de Urbanismo