A evolución da distribución cinematográfica nos últimos anos está evolucionando ata formatos dixitais que permiten obter unha maior calidade e posibilidade de exhibición do produto final obxecto das subvencións convocadas pola Agadic e concedidas no ano 2011. Dado que a convocatoria prevé a entrega do produto final da actividade subvencionada e que a entrega noutros formatos distintos ao inicialmente exixido (35 mm) non afecta a igualdade dos subvencionados, xa que a entrega está prevista para a anualidade 2014, procédese á modificación da resolución, para permitir a entrega en varios formatos, máis acordes co avance da exhibición cinematográfica.
Por todo isto
DISPOÑO:
Artigo único
Modifícase o artigo 14.5, primeiro parágrafo, da Resolución do 18 de maio de 2011 pola que se establecen as bases reguladoras para a concesión de subvencións para producións ou coproducións audiovisuais en lingua galega con decidido contido artístico e cultural e se convocan para o ano 2011, que queda co seguinte contido:
«5. Entregar unha copia en versión galega, en perfecto estado, no formato elixido na solicitude segundo as modalidades de produción:
– Longametraxe cinematográfica e ópera prima ou segunda longametraxe: 35 mm ou en DCP (Digital Cinema Package). Se a produción está totalmente gravada en dixital entregarase unha copia no formato e no soporte de máis alta calidade na produción (para unha calidade de 2K ou superiores e entregarase un disco duro coa máis alta ratio de imaxe e sentido de compresión, .DPX ou .TIFF para as imaxes e .WAV ou .AIFF para o son».
Santiago de Compostela, 21 de decembro de 2012
Jesús Vázquez Abad
Presidente do Consello Reitor da Axencia Galega das Industrias Culturais