Mediante o Acordo do Consello da Xunta de Galicia do 12 de abril de 2012 aprobouse a modificación da relación de postos de traballo da Consellería de Traballo e Benestar (DOG núm. 72, do 16 de abril), e establecéronse os efectos da súa entrada en vigor a partir do día seguinte ao da súa publicación no DOG, agás as amortizacións, creacións e modificacións dos postos de traballo afectados pola desaparición dos centros de menores Virxe do Carme e de Soutomaior, así como pola fusión do novo centro Complexo de Menores de Ferrol, que quedaban demoradas ata o día 18 de xuño de 2012.

Tendo en conta as novas circunstancias estimadas pola consellería, e considerando que a RPT é o instrumento técnico a través do cal se procede á ordenación do persoal de acordo coas necesidades do servizo, procede a modificación parcial do referido acordo do Consello da Xunta de Galicia, co fin de establecer unha nova data na cal terán efecto as amortizacións, creacións e modificacións dos postos de traballo afectados pola desaparición dos centros de menores de Virxe do Carme e de Soutomaior, así como pola fusión do novo centro Complexo de Menores de Ferrol, que será o 24 de maio de 2012.

En consecuencia, por proposta da Consellería de Traballo e Benestar, consultadas as organizacións sindicais presentes na mesa xeral de negociación da Comunidade Autónoma e a comisión de persoal, o Consello da Xunta de Galicia, na súa reunión do día 18 de maio de 2012, adoptou o seguinte

acordo:

Primeiro. Modificar parcialmente o punto segundo do Acordo do Consello da Xunta de Galicia do 12 de abril de 2012, polo que se aproba a modificación da relación de postos de traballo da Consellería de Traballo e Benestar, no que se refire á demora expresamente establecida, que se sitúa na nova data do 24 de maio de 2012.

Segundo. Ordénase a publicación deste acordo no Diario Oficial de Galicia para os efectos da súa entrada en vigor.

Visto o acordo adoptado polo Consello da Xunta de Galicia na súa reunión do 18 de maio de 2012, relativo á aprobación da modificación parcial do Acordo do Consello da Xunta de Galicia do 12 de abril de 2012 polo que se aproba a modificación da relación do postos de traballo da Consellería de Traballo e Benestar, coa finalidade de cumprir dito acordo, dispoño que se publique no Diario Oficial de Galicia.

Santiago de Compostela, 21 de maio de 2012.

Elena Muñoz Fonteriz
Conselleira de Facenda